অহৰহ ভাবুকি আৰু নিৰাপত্তাৰ চিন্তাৰ বাবে বলীউডৰ ছুপাৰষ্টাৰ ছলমান খানে নিজৰ আইকনিক ঘৰ ‘গেলেক্সি এপাৰ্টমেণ্টছ’ এৰি যাব পাৰে।

বলিউডৰ চুপাৰষ্টাৰ ছলমান খানে খুব সোনকালেই তেওঁৰ আটাইতকৈ প্ৰিয় আৰু বিখ্যাত ‘গেলেক্সি এপাৰ্টমেণ্ট’ক বিদায় জনাব পাৰে। খবৰ অনুসৰি, তেওঁ বান্দ্ৰা এলেকাতে নিৰ্মাণ হ’বলগীয়া এটা নতুন আৰু অতি বিলাসী ঘৰলৈ স্থানান্তৰিত হোৱাৰ প্ৰস্তুতি চলাইছে। সংবাদ মাধ্যমৰ প্ৰতিবেদন অনুসৰি, ছলমানৰ এই নতুন ঘৰটো নিৰ্মাণৰ পথ সম্পূৰ্ণৰূপে পৰিষ্কাৰ হৈছে। তেওঁৰ পৰিয়ালে বহু আগতেই এই ঠাইখিনি পছন্দ কৰিছিল, কিন্তু কিছুমান চৰকাৰী অনুমতিৰ বাবে কামটো ৰৈ গৈছিল। এতিয়া এই নতুন প্ৰজেক্টটো আগুৱাই নিবলৈ প্ৰয়োজনীয় অনুমতি পোৱা গৈছে।

এই নতুন বিলাসী ঘৰটো নিৰ্মাণৰ আঁৰৰ আটাইতকৈ ডাঙৰ কাৰণ হিচাপে ‘সুৰক্ষা’ৰ কথাক উল্লেখ কৰা হৈছে। দৰাচলতে, যোৱা কিছু সময় ধৰি ছলমান খানে ধাৰাবাহিকভাৱে প্ৰাণে মৰাৰ ভাবুকি পাই আহিছে। নিৰাপত্তা সংস্থাসমূহেও তেওঁক পৰামৰ্শ দিছিল যে ‘গেলেক্সি এপাৰ্টমেণ্ট’ত থকাটো এতিয়া তেওঁৰ বাবে সম্পূৰ্ণ সুৰক্ষিত নহয়, কাৰণ তাত নিৰাপত্তাৰ ব্যৱস্থা কৰাত বহু অসুবিধা হৈছে। সেয়েহে এতিয়া তেওঁৰ পৰিয়ালে এনে এখন ঠাইত থাকিবলৈ চিন্তা কৰিছে, য’ত তেওঁলোকে সম্পূৰ্ণ সুৰক্ষিত অনুভৱ কৰিব পাৰে। এনে পৰিস্থিতিত খবৰ ওলাইছে যে তেওঁ সোনকালেই নতুন ঘৰলৈ স্থানান্তৰিত হ’ব পাৰে।

লগতে জানিব পৰা গৈছে যে ছলমানৰ এই নতুন আৰু বিলাসী ঘৰটো নিৰ্মাণৰ প্ৰস্তুতি দ্ৰুতগতিত চলিছে। উল্লেখ্য যে, এই বহু মহলীয়া অট্টালিকাটো নিৰ্মাণৰ বাবে বৃহন্মুম্বাই মিউনিচিপাল কৰ্পৰেশ্যনে (BMC) ২০২৫ চনৰ অক্টোবৰ মাহতেই প্ৰাৰম্ভিক সেউজ সংকেত দিছিল। ইয়াক কাৰিকৰী ভাষাত ‘ইণ্টিমেশ্যন অৱ ডিছএপ্ৰুভেল’ বুলি কোৱা হয়। এই অনুমতি পোৱাৰ পিছৰে পৰা মাটিৰ কাম আৰম্ভ কৰাৰ বাবে যি আনুষ্ঠানিক প্ৰক্ৰিয়া আছিল, সেয়া দ্ৰুতগতিত আগবাঢ়িছে, যাৰ বাবে খান পৰিয়ালে দীৰ্ঘদিন ধৰি অপেক্ষা কৰি আছিল।

এই নতুন ছয় মহলীয়া বিলাসী অট্টালিকাটো বান্দ্ৰাৰ চিম্বাই এলেকাত সাগৰৰ ঠিক সন্মুখত নিৰ্মাণ কৰা হ’ব। এই বিলাসী ঘৰটোত গ্ৰাউণ্ড ফ্ল’ৰৰ লগতে গাড়ী ৰখাবলৈ এখন সুন্দৰ ষ্টিল্ট পাৰ্কিংও থাকিব। এই সমগ্ৰ অট্টালিকাটোৰ মুঠ কভাৰ্ড এৰিয়া প্ৰায় ১,০১৪ বৰ্গ মিটাৰ বুলি কোৱা হৈছে। ছলমান খানৰ পৰিয়ালে এই বহুমূলীয়া প্লটটো ২০১১ চনতেই ক্ৰয় কৰিছিল, যিটো তেওঁৰ মাতৃৰ নামত পঞ্জীয়ন কৰা আছে। এতিয়া এই ঠাইত নিৰ্মাণৰ কামে দ্ৰুতগতিত আগবাঢ়িছে, যিটো অতি সোনকালে সম্পূৰ্ণ কৰা হ’ব।

ছলমান খানৰ এই প্ৰজেক্টৰ আটাইতকৈ ডাঙৰ বাধা আছিল ‘কোষ্টেল ৰেগুলেচন জ’ন’ (CRZ)-ৰ অনুমতি। সাগৰৰ পাৰত অৱস্থিত হোৱাৰ বাবে ‘মহাৰাষ্ট্ৰ কোষ্টেল জ’ন মেনেজমেণ্ট অথৰিটি’ৰ অনুমতি পোৱাটো অত্যন্ত প্ৰয়োজনীয় আছিল। অৱশেষত ১৬ জুনত এই অনুমতি পোৱা গৈছে। অনুমতি পোৱাৰ পিছত এতিয়া এই বিলাসী অট্টালিকাটো নিৰ্মাণৰ পথ সম্পূৰ্ণৰূপে পৰিষ্কাৰ হৈছে। এই সুৰক্ষিত আৰু সুন্দৰ অট্টালিকাটো সম্পূৰ্ণ হোৱাৰ লগে লগে বলিউডৰ তাৰকা ছলমান খানে তেওঁৰ সমগ্ৰ পৰিয়ালৰ সৈতে ‘গেলেক্সি এপাৰ্টমেণ্ট’ৰ পৰাল স্থানান্তৰিত হ’ব।

উল্লেখ্য যে, ছলমান খানৰ বৰ্তমানৰ ঘৰ ‘গেলেক্সি এপাৰ্টমেণ্ট’ৰ বাহিৰত ২০২৪ চনত দুজন বাইক আৰোহীয়ে হঠাতে গুলীবৰ্ষণ কৰিছিল, যাৰ দায়িত্ব বিষ্ণৈ গেঙে লৈছিল। এই ভয়ংকৰ ঘটনাৰ পিছত চৰকাৰে ছলমান খানৰ নিৰাপত্তা তাৎক্ষণিকভাৱে বৃদ্ধি কৰি ‘ৱাই প্লাছ’ (Y+) শ্ৰেণীলৈ উন্নীত কৰিছিল। অৱশ্যে, এই নতুন ঘৰটোলৈ স্থানান্তৰিত হোৱাৰ বিষয়ত এতিয়ালৈকে ছলমান বা তেওঁৰ দলৰ তৰফৰ পৰা কোনো আনুষ্ঠানিক মন্তব্য অহা নাই।

লগতে পঢ়ক: সকলো অভিলেখ ভংগ কৰিবলৈ আহি আছে ‘বাহুবলী ৩’; প্ৰভাসে দিলে ডাঙৰ ইংগিত

বলীউডৰ অভিনেতা ছলমান খানে ব্যক্তিত্বৰ অধিকাৰ খৰ্বৰ বিষয়টো উত্থাপন কৰিছে। কালা হিৰণ ছবিখনৰ নিৰ্মাতাসকলে তেওঁৰ জনপ্ৰিয়তাৰ শোষণ কৰিছে বুলিও অভিযোগ কৰিছে।

ছলমান খানৰ ছবি ‘কালা হিৰণ: দ্য বেটেল ফৰ লেগেচি’ ৰ নিৰ্মাণ আৰু মুক্তিৰ ওপৰত নিষেধাজ্ঞা আৰোপ কৰাৰ দাবী জনাই বলীউডৰ অভিনেতা গৰাকীয়ে দিল্লী উচ্চ ন্যায়ালয়ত এখন আবেদন দাখিল কৰিছে। ছলমান খানৰ অভিযোগ যে ছবিখনৰ পোষ্টাৰে তেওঁৰ ব্যক্তিত্বৰ অধিকাৰৰ স্পষ্ট উলংঘন কৰিছে আৰু তেওঁৰ নাম, ছবি তথা ৰাজহুৱা পৰিচয় বাণিজ্যিক লাভৰ বাবে অনুমতি অবিহনে ব্যৱহাৰ কৰা হৈছে। ছলমান খানে কৈছে যে এই আগন্তুক ছবিখন আৰু ইয়াৰ সৈতে জড়িত প্ৰচাৰ সামগ্ৰীসমূহে তেওঁৰ ব্যক্তিত্বৰ অধিকাৰ খৰ্ব কৰিছে, যাৰ ফলত তেওঁৰ প্ৰতিষ্ঠা আৰু আইনী অধিকাৰ প্ৰভাৱিত হ’ব পাৰে।

ছলমান খানে ছবিখনৰ প্ৰযোজক অমিত জানী, জানী ফায়াৰফক্স ফিল্মছ, ভৰত শ্ৰীনেট, অক্ষয় পাণ্ডে আৰু ছবিখনৰ সৈতে জৰিত অন্যান্য লোকসকলৰ বিৰুদ্ধে অন্তৱৰ্তীকালীন নিষেধাজ্ঞা জাৰি কৰাৰ দাবী জনাইছে। তেওঁৰ অভিযোগ যে ছবিখনৰ পোষ্টাৰ, টিজাৰ আৰু ছ’চিয়েল মিডিয়াৰ প্ৰচাৰত তেওঁৰ পৰিচয়ৰ সৈতে জড়িত উপাদানসমূহ ব্যৱহাৰ কৰা হৈছে। আবেদনখনত উল্লেখ কৰা হৈছে যে ছবিখনৰ পোষ্টাৰত দেখুওৱা চৰিত্ৰটো ছলমান খানৰ সৈতে বহু পৰিমাণে মিলে। পোষ্টাৰখনত থকা ব্যক্তিজনক ছলমানৰ বিখ্যাত নীলা ব্ৰেছলেটৰ দৰে এডাল ব্ৰেছলেট পিন্ধি বন্দুক ধৰি থকা দেখুওৱা হৈছে। ছলমানৰ মতে, ইয়াৰ দ্বাৰা ৰাইজৰ মাজলৈ এই বাৰ্তাই যায় যে ছবিখন তেওঁৰ ওপৰতেই আধাৰিত।

তেওঁ লগতে কয় যে অস্ত্ৰ আইন গোচৰত তেওঁ ইতিমধ্যে আদালতৰ পৰা সকাহ লাভ কৰিছে, কিন্তু পোষ্টাৰখনত বন্দুকৰ সৈতে তেওঁৰ দৰে অবয়ব দেখুৱাই এক ভুল বাৰ্তা প্ৰেৰণ কৰা হৈছে। ছলমান খানে আবেদনখনত উল্লেখ কৰিছে যে কৃষ্ণসাৰ হৰিণ গোচৰৰ সৈতে জড়িত কিছুমান গোচৰ এতিয়াও ৰাজস্থান উচ্চ ন্যায়ালয় আৰু উচ্চতম ন্যায়ালয়ত বিচাৰাধীন হৈ আছে। এনে পৰিস্থিতিত এই বিষয়টোক লৈ চলচ্চিত্ৰ নিৰ্মাণ আৰু ইয়াৰ প্ৰচাৰ কৰিলে ন্যায়িক প্ৰক্ৰিয়া প্ৰভাৱিত হ’ব পাৰে। তেওঁৰ মতে, ছবিখনৰ জৰিয়তে মানুহৰ মনত পূৰ্বৰে পৰা এটা ধাৰণা গঢ়ি তুলিবলৈ চেষ্টা কৰা হৈছে।

আবেদনখনত এইটোও কোৱা হৈছে যে ২০২৫ চনৰ নৱেম্বৰ মাহত দিল্লী উচ্চ ন্যায়ালয়ে ছলমান খানৰ ব্যক্তিত্বৰ অধিকাৰ সুৰক্ষিত কৰি নিৰ্দেশ দিছিল যে অনুমতি অবিহনে তেওঁৰ ফটো, নাম, কণ্ঠস্বৰ বা তেওঁৰ সৈতে জড়িত পৰিচয় ব্যৱহৰ কৰিব নোৱাৰিব। ছলমানৰ অভিযোগ যে এই প্ৰস্তাৱিত ছবিখনে সেই নিৰ্দেশ উলংঘন কৰিছে।

ছলমান খানৰ মতে, ২০২৬ চনৰ এপ্ৰিল মাহত ছবিখনৰ সৈতে জড়িত ব্যক্তিসকললৈ আইনী জাননী প্ৰেৰণ কৰা হৈছিল। ইয়াৰ পিছতো ছবিখনৰ প্ৰচাৰ চলাই থকা হ’ল। আবেদনখনত দাবী কৰা হৈছে যে প্ৰযোজক অমিত জানীয়ে ছ’চিয়েল মিডিয়াত কেইবাটাও পোষ্ট আৰু ভিডিঅ’ মুকলি কৰি নিজেই স্বীকাৰ কৰিছে যে ছবিখন কৃষ্ণসাৰ হৰিণ গোচৰ আৰু ছলমান খানৰ সৈতে জড়িত ঘটনাৱলীৰ ওপৰত আধাৰিত। গোচৰটোৰ চূড়ান্ত ৰায় প্ৰকাশ নোহোৱালৈকে ছবিখনৰ নিৰ্মাণ, শ্বুটিং, প্ৰচাৰ, বিতৰণ, ষ্ট্ৰীমিং আৰু মুক্তিৰ ওপৰত তাৎক্ষণিক নিষেধাজ্ঞা আৰোপ কৰিবলৈ ছলমান খানে আদালতৰ ওচৰত দাবী জনাইছে। ইয়াৰ লগতে ছবিখনৰ কাহিনী, চিত্ৰনাট্য, পোষ্টাৰ, কাষ্টিং আৰু অন্যান্য প্ৰচাৰ সামগ্ৰীৰ প্ৰসাৰ ৰোধ কৰিবলৈও নিৰ্দেশ দিবলৈ অনুৰোধ জনাইছে।

লগতে পঢ়ক: ২৭১ কোটি অৰ্জন কৰি আলোড়ন সৃষ্টি ‘পেড্ডী’ৰ; ১০খন ছবিৰ অভিলেখ ভংগ