‘পুষ্পা ২’ৰ অভিনেতা আল্লু অৰ্জুন কাৰামুক্ত হৈ ঘৰলৈ উভতিছে । হায়দৰাবাদৰ চাঞ্চলগুডা কেন্দ্ৰীয় কাৰাগাৰত নিশা কটাই ঘৰলৈ উভতি আহিছে অভিনেতাগৰাকী । ইয়াৰ পিছতে তেওঁ পত্নী স্নেহা ৰেড্ডী আৰু সন্তানক সাক্ষাৎ কৰে । এতিয়া অভিনেতাজনৰ ঘৰত দক্ষিণৰ তাৰকাৰ সোঁত দেখা গৈছে । নাগা চৈতন্য, ৰাণা দগ্গুবতীকে ধৰি বহু তাৰকাই আল্লু অৰ্জুনক তেওঁৰ জুবলী হিলছৰ ঘৰত সাক্ষাৎ কৰিবলৈ অহা পৰিলক্ষিত হৈছে ।
আল্লু অৰ্জুনক সাক্ষাৎ কৰিবলৈ আহিল বহুতো তাৰকা-
আল্লু অৰ্জুনৰ ছবি ‘পুষ্পা ২’ৰ পৰিচালক সুকুমাৰ তেওঁক লগ কৰিবলৈ অহা পৰিলক্ষিত হয় । ছবিখনৰ প্ৰযোজক ৱাই ৰবি শংকৰ আৰু নবীন য়েৰ্নেনীও এই সময়ত তেওঁৰ লগত আছিল । অভিনেতা আৰু পৰিচালকজনৰ এটা ভিডিঅ’ প্ৰকাশ পাইছে, য’ত তেওঁলোকে বাৰ্তালাপ কৰা দেখা গৈছে । অভিনেতা নাগা চৈতন্য, ৰাণা দগ্গুবাটি আৰু বিজয় দেৱেৰাকোণ্ডাও আল্লু অৰ্জুনক সাক্ষাৎ কৰিবলৈ আহে । সকলোৱে সাৱটি ধৰি তেওঁৰ অৱস্থাৰ বিষয়ে সোধে । ছুপাৰষ্টাৰ চিৰঞ্জীৱীৰ পত্নী সুৰেখা কনিডেলেও আল্লু অৰ্জুনক সাক্ষাৎ কৰে ।
ঘটনাতো কি ?
মুক্তিৰ পূৰ্বে ৪ ডিচেম্বৰত হায়দৰাবাদৰ সন্ধ্যা থিয়েটাৰত ‘পুষ্পা ২’ৰ বিশেষ প্ৰদৰ্শনীৰ আয়োজন কৰা হৈছিল । ছবিখনৰ প্ৰদৰ্শনীৰ সময়তে আল্লু অৰ্জুনো উপস্থিত হৈছিল । এই সময়ছোৱাতে এগৰাকী মহিলাই ব্যাপক ভিৰৰ মাজত পদপিষ্ট হৈ প্ৰাণ হেৰুৱাইছিল । মহিলাগৰাকীৰ পৰিয়ালে আল্লু অৰ্জুন, তেওঁৰ নিৰাপত্তাৰক্ষী দল আৰু থিয়েটাৰ পৰিচালনাৰ বিৰুদ্ধে গোচৰ ৰুজু কৰিছিল । এই গোচৰত ১৩ ডিচেম্বৰৰ পুৱা আল্লু অৰ্জুনক গ্ৰেপ্তাৰ কৰা হৈছিল । নিম্ন আদালতত শুনানি গ্ৰহণ কৰি আল্লু অৰ্জুনক ১৪ দিনৰ কাৰাদণ্ড বিহা হয় । ইয়াৰ পিছতে বিষয়টো তেলেংগানা উচ্চ ন্যায়ালয় পাইগৈ, য’ত তেওঁক ৫০ হাজাৰ টকাৰ ব্যক্তিগত বণ্ডত অন্তৱৰ্তীকালীন জামিন প্ৰদান কৰা হয় ।
জেলৰ পৰা ওলাই কি ক’লে আল্লু অৰ্জুনে ?
জেলৰ পৰা ওলাই অহাৰ পিছত আল্লু অৰ্জুনে সংবাদ মাধ্যমৰ সৈতে বাৰ্তালাপ কৰে । তেওঁ কয়- কোনো চিন্তা নাই । মই ঠিকে আছো । মই আইনত বিশ্বাস কৰোঁ । এই গোচৰটো আদালতত চলি আছে গতিকে মাজত কোনো মন্তব্য নকৰো । মই এজন আইন পালনকাৰী নাগৰিক । আৰক্ষীক সহযোগ কৰিম ।
