১৯ বছৰ অনুৰ্ধ এছিয়া কাপ ২০২৪ৰ ফাইনেলত পৰাজয়ৰ সন্মুখীন হ’বলগীয়া হৈছে ভাৰতীয় দল । বাংলাদেশে ৫৯ ৰানত পৰাস্ত কৰে ভাৰতক । এই জয়েৰে বাংলাদেশে ১৯ বছৰ অনুৰ্ধ এছিয়া কাপৰ খিতাপ দখল কৰে । ফাইনেলত নিমাত হৈ থাকিল টিম ইণ্ডিয়াৰ উদীয়মান তাৰকা বৈভৱ সূৰ্যবংশীৰ বেট । বিশেষ একো প্ৰদৰ্শন কৰিব নোৱাৰিলে আই পি এলত কোটি টকাত বিক্ৰী হোৱা খেলুৱৈজনে । ৯ ৰান সংগ্ৰহ কৰি আউট হয় বৈভৱ । বৈভৱৰ লগতে সমগ্ৰ দলৰ বেটিং বিপৰ্যয়ৰ সন্মুখীন হয় । ই ভাৰতৰ পৰাজয়ৰ এটা ডাঙৰ কাৰণ হৈ পৰে ।
ছেমি ফাইনেলত শ্ৰীলংকাক পৰাস্ত কৰি ভাৰত ফাইনেলত প্ৰৱেশ কৰিছিল । কিন্তু ফাইনেলত বাংলাদেশে ৫৯ ৰানত পৰাস্ত কৰে দলটোক । প্ৰথমে বেটিং কৰি বাংলাদেশে ১৯৮ ৰান সংগ্ৰহ কৰে । ইয়াৰ প্ৰত্যুত্তৰত টিম ইণ্ডিয়াই মাত্ৰ ১৩৯ ৰানহে সংগ্ৰহ কৰিবলৈ সক্ষম হয় । ৩৫.২ অভাৰত অল আউট হয় ভাৰতীয় দলটো । আয়ুষ মহাত্ৰে আৰু আন্দ্ৰে সিদ্ধাৰ্থেও দলৰ হৈ বিশেষ প্ৰদৰ্শন কৰাত ব্যৰ্থ হয় ।
বৈভৱ সূৰ্যবংশীৰ যাদু কিয় কাম নকৰিলে-
টিম ইণ্ডিয়াৰ হৈ একেৰাহে দুটা অৰ্ধশতক অৰ্জন কৰিছিল বৈভৱে । ইউ এ ইৰ বিৰুদ্ধে বিস্ফোৰক ইনিংছ খেলিছিল তেওঁ । ইয়াৰ পিছত তেওঁ শ্ৰীলংকাৰ বিৰুদ্ধে শক্তি প্ৰদৰ্শন কৰে । কিন্তু ফাইনেলত নিমাত হৈ থাকিল তেওঁৰ বেট । ৭ টা বলত ৯ ৰান সংগ্ৰহ কৰি আউট হয় বৈভৱ । লগতে ২টা চাৰিটাও কোবাইছিল তেওঁ । মাৰুফ মিৰ্ধৰ বলত বৈভৱ পেভিলিয়নমুখী হয় । সেইবাবেই তেওঁৰ যাদুৱে ফাইনেলত কাম কৰিব নোৱাৰিলে । বৈভৱ অপৰাজিত হা থকা হ’লে ভাৰতীয় দলটো খিতাপৰ ওচৰ চাপিব পৰাৰ সম্ভাৱনা আছিল ।
প্ৰতিযোগিতাখনত সূৰ্যবংশীৰ প্ৰদৰ্শন কেনেকুৱা আছিল –
পাকিস্তানৰ বিৰুদ্ধে মাত্ৰ ১ ৰান সংগ্ৰহ কৰি আউট হৈছিল বৈভৱ সূৰ্যবংশী । ইয়াৰ পিছত তেওঁ জাপানৰ বিৰুদ্ধে ২৩ ৰানৰ ইনিংছ খেলিছিল । ইউ এ ইৰ বিৰুদ্ধে বৈভৱে নিজৰ শক্তি দেখুৱাইছিল । শ্বাৰজাহত খেলা খেলখনত অপৰাজিত হৈ ৭৬ ৰান সংগ্ৰহ কৰে তেওঁ । বৈভৱে ছেমি ফাইনেলতো ভাল প্ৰদৰ্শন কৰিছিল । শ্ৰীলংকাৰ বিৰুদ্ধে তেওঁ ৬৭ ৰান সংগ্ৰহ কৰে । কিন্তু বাংলাদেশৰ বিৰুদ্ধে ফাইনেলত তেওঁ মাত্ৰ ৯ ৰান সংগ্ৰহ কৰি আউট হয় ।
