টীম ইণ্ডিয়াৰ হৈ খেলপথাৰত নামিয়েই ইতিহাসৰ পৃষ্ঠাত নিজৰ নাম সোণালী আখৰেৰে লিখিলে যুৱ বেটছমেন বৈভৱ সূৰ্যবংশীয়ে

ভাৰত আৰু ইংলেণ্ডৰ মাজত অনুষ্ঠিত টি২০ শৃংখলাৰ দ্বিতীয়খন খেলত এক অভূতপূৰ্ব ইতিহাসৰ সাক্ষী হৈ ৰ’ল ক্ৰীড়াবিশ্ব । শনিবাৰে (৪ জুলাই) মানচেষ্টাৰৰ ওল্ড ট্ৰেফৰ্ডত অনুষ্ঠিত খেলখনত টীম ইণ্ডিয়াৰ হৈ খেলপথাৰত নামিয়েই ইতিহাসৰ পৃষ্ঠাত নিজৰ নাম সোণালী আখৰেৰে লিখিলে যুৱ বেটছমেন বৈভৱ সূৰ্যবংশীয়ে । বাওঁহতীয়া বিস্ফোৰক বেটছমেন বৈভৱ এতিয়া ভাৰতৰ হৈ আটাইতকৈ কম বয়সত আন্তঃৰাষ্ট্ৰীয় পৰ্যায়ত অভিষেক ঘটোৱা ক্ৰিকেটাৰ হিচাপে পৰিগণিত হৈছে ।

খেলৰ পূৰ্বে বৈভৱক তেওঁৰ ঐতিহাসিক অভিষেক কেপ তুলি দিয়ে দলৰ উপ-অধিনায়ক তিলক বাৰ্মাই । ইয়াৰ সৈতে বৈভৱ ভাৰতৰ হৈ টি২০ আন্তঃৰাষ্ট্ৰীয় মেচ খেলা ১২২ সংখ্যক খেলুৱৈ হিচাপে পৰিগণিত হয় ।

ভংগ হ’ল মহান ক্ৰিকেটাৰ শচীন টেণ্ডুলকাৰৰ অভিলেখ-
মাত্ৰ ১৫ বছৰ ৯৯ দিন বয়সত নিজৰ আন্তঃৰাষ্ট্ৰীয় অভিষেক ঘটাই বৈভৱ সূৰ্যৱংশীয়ে ক্ৰিকেটৰ ভগৱান হিচাপে পৰিচিত শচীন টেণ্ডুলকাৰৰ বহু পুৰণি অভিলেখ ভংগ কৰে ।

শচীন টেণ্ডুলকাৰৰ অভিলেখ : ১৯৮৯ চনৰ ১৫ নৱেম্বৰত পাকিস্তানৰ বিৰুদ্ধে কৰাচীত টেষ্ট মেচ খেলি শচীনে আন্তঃৰাষ্ট্ৰীয় কেৰিয়াৰ আৰম্ভ কৰিছিল । অভিষেকৰ সময়ত তেওঁৰ বয়স আছিল ১৬ বছৰ ২০৫ দিন ।

শ্বেফালী বাৰ্মাৰ অভিলেখ : কেৱল পুৰুষ ক্ৰিকেটেই নহয়, সামগ্ৰিক ভাৰতীয় ক্ৰিকেটৰ ইতিহাসতো বৈভৱে শীৰ্ষস্থান দখল কৰিছে । ইয়াৰ পূৰ্বে ভাৰতৰ হৈ মহিলা ক্ৰিকটত আটাইতকৈ কম বয়সত অভিষেক ঘটোৱাৰ অভিলেখ আছিল শ্বেফালী বাৰ্মাৰ নামত (১৫ বছৰ ২৩৯ দিন)। এতিয়া বৈভৱে তেওঁতকৈও কম বয়সত দেশক প্ৰতিনিধিত্ব কৰাৰ গৌৰৱ অৰ্জন কৰিলে ।

IPL 2026 আৰু শ্ৰীলংকাত চমকপ্ৰদ প্ৰদৰ্শন-
বিগত কেইমাহমানৰ পৰা ভাৰতীয় ক্ৰিকেটত বৈভৱ সূৰ্যৱংশীৰ নাম জোৰদাৰভাৱে চৰ্চিত হৈ আহিছে । আই পি এল ২০২৬ ত ৰাজস্থান ৰয়েলছৰ হৈ খেলি তেওঁ বেটেৰে এনে ধুমুহাৰ সৃষ্টি কৰিছিল যে সমগ্ৰ বিশ্বই তেওঁৰ প্ৰতিভাৰ উমান পাইছিল । সমগ্ৰ ছিজনত আক্ৰমণাত্মক শৈলীৰে বেটিং কৰি তেওঁ ৭৭৬ ৰান সংগ্ৰহ কৰিছিল । এই সময়ছোৱাত তেওঁৰ বেটিং ষ্ট্ৰাইক ৰেট আছিল ২৩৭.৩০, যিয়ে টি২০ ক্ৰিকেটত তেওঁৰ বিস্ফোৰক মানসিকতা প্ৰদৰ্শন কৰে ।

আইপিএলৰ ধুমুহাৰ পিছতে বৈভৱে ইণ্ডিয়া-এ দলত সুযোগ লাভ কৰে । শ্ৰীলংকাত অনুষ্ঠিত ত্ৰিকোণীয় শৃংখলাত শ্ৰীলংকা-এ দলৰ বিৰুদ্ধে খিতাপ দখলৰ যুঁজখনত বৈভৱে মাত্ৰ ১১টা বলতে অৰ্ধশতক অৰ্জন কৰিছিল । এইটো লিষ্ট-এ ক্ৰিকেটৰ ইতিহাসত যিকোনো বেটছমেনৰ বাবে আটাইতকৈ দ্ৰুততম অৰ্ধশতক হিচাপে ধৰা হৈছে ।

বিচিচিআইৰ ভাইৰেল ভিডিঅ’:

আয়াৰলেণ্ড আৰু ইংলেণ্ড ভ্ৰমণৰ আৰম্ভণিৰে পৰাই বৈভৱ চৰ্চাত আছিল । বিচিচিআইয়ে শ্বেয়াৰ কৰা তেওঁৰ প্ৰথমটো নেট চেশ্বনৰ ভিডিঅ’ ছচিয়েল মিডিয়াত ব্যাপকভাৱে ভাইৰেল হৈ পৰিছি ল।

মাত্ৰ ১৫ বছৰ বয়সতে বৈভৱ সূৰ্যৱংশীয়ে যিধৰণে ইটোৰ পিছত সিটো অভিলেখ গঢ়িছে, সি ক্ৰিকেট বিশেষজ্ঞ তথা প্ৰাক্তন ক্ৰিকেটাৰসকলকো আপ্লুত কৰিছে । ক্ৰিকেট অনুৰাগীসকলে এতিয়া আশা প্ৰকাশ কৰিছে যে এই যুৱ তাৰকাগৰাকীয়ে অনাগত দিনত টীম ইণ্ডিয়াৰ হৈ বহু স্মৰণীয় ইনিংছ খেলি বিশ্ব ক্ৰিকেটত ভাৰতৰ নাম উজলাই তুলিব ।

লগতে পঢ়ক : ‘তেওঁ শচীন আৰু বিৰাটৰ দৰেই প্ৰতিভাশালী’; বৈভৱ সূৰ্যৱংশীক লৈ কপিল দেবৰ বিশেষ মন্তব্য

এক নাটকীয় ছুপাৰ অভাৰত ভাৰত ‘এ’ দলক পৰাস্ত কৰি শ্ৰীলংকা ‘এ’ দলে ফাইনেলৰ পথ প্ৰায় নিশ্চিত কৰাৰ পিছতে এই উত্তপ্ত পৰিস্থিতিৰ সূত্ৰপাত ঘটে

ডাম্বোল্লাত অনুষ্ঠিত এদিনীয়া ত্ৰিকোণীয় শৃংখলাৰ এখন গুৰুত্বপূৰ্ণ মেচত সোমবাৰে তীব্ৰ উত্তেজনাৰ সৃষ্টি হয় । খেলৰ শেষৰ ফালে কেৱল বেট-বলৰ যুঁজেই নহয়, খেলপথাৰত দুই দলৰ খেলুৱৈৰ মাজত সৃষ্টি হোৱা অনাকাংক্ষিত পৰিস্থিতিয়ে ক্ৰীড়াপ্ৰেমীসকলক স্তম্ভিত কৰি তোলে । এক নাটকীয় ছুপাৰ অভাৰত ভাৰত ‘এ’ দলক পৰাস্ত কৰি শ্ৰীলংকা ‘এ’ দলে ফাইনেলৰ পথ প্ৰায় নিশ্চিত কৰাৰ পিছতে এই উত্তপ্ত পৰিস্থিতিৰ সূত্ৰপাত ঘটে ।

খেলপথাৰত তীব্ৰ বাক-বিতণ্ডা আৰু শাৰীৰিক সংঘাত

খবৰ অনুসৰি, মেচখন শেষ হোৱাৰ লগে লগে কম পোহৰৰ মাজতে ভাৰতৰ বৈভৱ সূৰ্যবংশী আৰু শ্ৰীলংকাৰ বিষেন হালাম্বাগেৰ মাজত পথাৰতে তীব্ৰ বাক-বিতণ্ডা আৰম্ভ হয় । ক্ৰীড়া ৱেবছাইট ESPNcricinfo-ৰ ৰিপৰ্ট অনুসৰি, আৱেগ নিয়ন্ত্ৰণ কৰিব নোৱাৰি দুই খেলুৱৈৰ মাজত শাৰীৰিক টনা-আঁতৰা বা হতা-হতিও সংঘটিত হয় । অৱশ্যে পৰিস্থিতি অধিক বেয়াৰ ফাললৈ যোৱাৰ পূৰ্বেই শ্ৰীলংকা ‘এ’ দলৰ অভিজ্ঞ উইকেটকীপাৰ নিৰোশন ডিকৱেলাই মাজত সোমাই দুয়োকে আঁতৰাই পঠিয়ায় আৰু পৰিস্থিতি শান্ত কৰে ।

কেনেকৈ হ’ল মেচখন টাই ?

প্ৰথমে বেটিং কৰি ভাৰত ‘এ’ দলে এক সময়ত ১৪৩ ৰানতে ৭ টা উইকেট হেৰুৱাই চৰম সংকটত পৰিছিল । কিন্তু তাৰ পিছতেই সূৰ্যাংশ শ্বেদগে আৰু বিপ্ৰজ নিগমে অষ্টম উইকেটৰ বাবে ১০৪ ৰানৰ এক চমৎকাৰ অংশীদাৰিত্ব গঢ়ি তুলি দলৰ স্ক’ৰ ২৬৫ ৰানলৈ লৈ যায় ।

২৬৬ ৰানৰ লক্ষ্য খেদি শ্ৰীলংকা ‘এ’ দলে সদিৰা সমৰাৱিক্ৰমাৰ ৯৩ ৰানৰ সংযত ইনিংছৰ সহায়ত জয়ৰ দিশে আগবাঢ়িছিল । কিন্তু অন্তিম অভাৰত ভাৰতৰ আৰ্ছাদ খানে অসাধাৰণ বলিং কৰি শ্ৰীলংকাক জয়ৰ ঠিক মুখে মুখে ৰখাই মেচখন টাই কৰিবলৈ বাধ্য কৰে ।

ছুপাৰ অভাৰৰ ৰোমাঞ্চ

নিয়মিত ৫০ অভাৰৰ খেলখন টাই হোৱাৰ পিছত বিজয়ী দল বাছনিৰ বাবে ছুপাৰ অভাৰৰ আশ্ৰয় লোৱা হয় । শ্ৰীলংকা ‘এ’: ছুপাৰ অভাৰত প্ৰথমে বেটিং কৰি সংগ্ৰহ কৰে ১৬ ৰান । ভাৰত ‘এ’: ১৭ ৰানৰ লক্ষ্য অনুসৰণ কৰিবলৈ নামি ভাৰতীয় দলটোৱে মাত্ৰ ৯ ৰানহে কৰিবলৈ সক্ষম হয় । মথীছা পাথিৰানা, নৱাগত শ্ৰীলংকান পেচাৰ কুগাথাস মাথুলানে এক সুন্দৰ অভাৰ কৰি ভাৰতৰ বৈভৱ সূৰ্যবংশী আৰু সূৰ্যাংশ শ্বেদগেক বান্ধি ৰাখে আৰু আয়োজক দলৰ ঐতিহাসিক জয় নিশ্চিত কৰে ।

ভাৰত ‘এ’ দলৰ পৰিস্থিতি-

তিলক বাৰ্মাৰ নেতৃত্বাধীন ভাৰত ‘এ’ দলটোৰ তিনিখন খেলৰ ভিতৰত এয়া দ্বিতীয়টো পৰাজয় । ইয়াৰ পূৰ্বে আফগানিস্তানৰ বিৰুদ্ধে বৰষুণ বিঘ্নিত খেলখনত তেওঁলোকে ডি এল এছ পদ্ধতিৰে ৪ ৰানত পৰাস্ত হৈছিল । শৃংখলাত টিকি থাকিবলৈ হ’লে এতিয়া ভাৰতীয় দলটোক পৰৱৰ্তী মেচসমূহত উন্নত প্ৰদৰ্শনৰ প্ৰয়োজন হ’ব ।

লগতে পঢ়ক : চিৰবৈৰী পাকিস্তানক পৰাস্ত কৰি টি-২০ বিশ্বকাপৰ অভিযান আৰম্ভ ভাৰতৰ

ঋতুৰাজ গাইকোৱাডে অধিনায়ক তিলক বাৰ্মাৰ সৈতে মিলি ভাৰতীয় ইনিংছক এক মজবুত ভেটি প্ৰদান কৰে

শ্ৰীলংকাত অনুষ্ঠিত ত্ৰিকোণীয় এদিনীয়া শৃংখলাৰ প্ৰথমখন মেচত মঙলবাৰে ভাৰত A দলে এক নাটকীয় জয় সাব্যস্ত কৰে । ডাম্বুলাৰ ৰণগিৰি ইণ্টাৰনেচনেল ষ্টেডিয়ামত খেলা এই অতি উত্তেজনাপূৰ্ণ মেচখনত ভাৰতীয় দলে আয়োজক শ্ৰীলংকা A ক ৮ ৰানত পৰাস্ত কৰি শৃংখলাটোত শুভ আৰম্ভণি কৰে ।

মেচখনত টছত জিকি প্ৰথমে বেটিং কৰিবলৈ নামি ভাৰত A দলে নিৰ্ধাৰিত অভাৰত ৬ টা উইকেট হেৰুৱাই ২৭৭ ৰান সংগ্ৰহ কৰে । দলৰ আৰম্ভণি অৱশ্যে আশানুৰূপ নাছিল । আইপিএলত সুন্দৰ প্ৰদৰ্শন কৰা উদীয়মান বিস্ফোৰক বেটাৰ বৈভৱ সূৰ্যৱংশী মাত্ৰ ১৪ ৰান কৰি বিদায় লয় । ইয়াৰ পিছতে প্ৰভচিমৰন সিঙো মাত্ৰ ২ ৰানতে আউট হোৱাত ভাৰতৰ স্ক’ৰ ১৬ ৰানত ২ উইকেট হৈ পৰে । এই সংকটপূৰ্ণ অৱস্থাত প্ৰিয়াংশ আৰ্যই ৩২ ৰানৰ বৰঙণি যোগাই ঋতুৰাজ গাইকোৱাডৰ সৈতে ৫৩ ৰানৰ এক গুৰুত্বপূৰ্ণ পাৰ্টনাৰশ্বিপ গঢ়ি তোলে, যদিও আৰ্য দুৰ্ভাগ্যজনকভাৱে ৰান-আউট হয় ।

ইয়াৰ পিছত ঋতুৰাজ গাইকোৱাডে অধিনায়ক তিলক বাৰ্মাৰ সৈতে মিলি ভাৰতীয় ইনিংছক এক মজবুত ভেটি প্ৰদান কৰে । দুয়োৰে মাজত চতুৰ্থ উইকেটৰ বাবে ১৫০ ৰানৰ এক বৃহৎ পাৰ্টনাৰশ্বিপ গঢ়ি উঠে । গাইকোৱাডে ১১২ টা বলত ৬ টা চাৰি আৰু ৩ টা ছিক্সাৰেৰে নিজৰ আকৰ্ষণীয় শতক অৰ্জন কৰে । অৱশ্যে শতক সম্পূৰ্ণ কৰাৰ ঠিক পিছতেই ১০১ ৰানত তেওঁ ৱানুজা সাহানৰ বলত আভিষ্কা ফাৰ্নাণ্ডোক কেচ দি আউট হয় ।

আনহাতে অধিনায়ক তিলক বাৰ্মাই এক মন্থৰ কিন্তু দায়িত্বশীল অৰ্ধশতকীয় ইনিংছ খেলি ৮৫ টা বলত ৬০ ৰান কৰি মহম্মদ চিৰাজৰ বলত ব’ল্ড হয় । অন্তিম অভাৰকেইটাত সূৰ্যাংশ চেডগেই ১৪ বলত অপৰাজিত ২৬ ৰান আৰু আয়ুষ বাদোনীয়ে ১৮ বলত ২৪ ৰানৰ দ্ৰুত ইনিংছ খেলি দলৰ স্ক’ৰ ২৭৭ লৈ লৈ যায়। অনুকূল ৰয় ১ ৰান কৰি অপৰাজিত হৈ ৰয় । শ্ৰীলংকা A ৰ হৈ মহম্মদ চিৰাজে সৰ্বাধিক ২ টা উইকেট লাভ কৰে ।

২৭৮ ৰানৰ লক্ষ্য খেদিবলৈ নামি শ্ৰীলংকা A দলে এক শক্তিশালী আৰম্ভণি কৰে । অপেনাৰ নিৰোচন ডিকৱেলাই ৪৭ ৰান আৰু আভিষ্কা ফাৰ্নাণ্ডোৱে ৪৫ ৰান কৰাৰ বিপৰীতে চদীৰা সমৰাৱিক্ৰমাই ৪৬ ৰান যোগ কৰে । মধ্যক্ৰমত শ্ৰীলংকাৰ অধিনায়ক সাহান আৰাচিগেই দলৰ দায়িত্ব লয় আৰু ৭২ টা বলত ৭৪ ৰানৰ এক দৰ্শনীয় ইনিংছ খেলি দলক জয়ৰ নিচেই ওচৰলৈ লৈ যায় । তেওঁৰ এই ইনিংছটোত ৬ টা চাৰি আৰু ২ টা ছিক্সাৰ আছিল ।

খেলখনৰ আটাইতকৈ নিৰ্ণায়ক মুহূৰ্তটো আহে ৪৮ নম্বৰ অভাৰত, যেতিয়া ভাৰতৰ অংশুল কাম্বোজে থিতাপি লৈ থকা শ্ৰীলংকান অধিনায়ক সাহান আৰাচিগেৰ উইকেট দখল কৰে । সেই সময়ত শ্ৰীলংকাক জয়ৰ বাবে মাত্ৰ ১০ টা বলত ৯ ৰানৰ প্ৰয়োজন আছিল আৰু হাতত ৩ টা উইকেট বাকী আছিল । কিন্তু অধিনায়ক আউট হোৱাৰ লগে লগেই আয়োজক দলটো চৰম চাপত পৰে ।

ইয়াৰ পিছৰ অভাৰত ৱানুজা সাহান ২৩ ৰান কৰি ৰান-আউট হয় আৰু মহম্মদ চিৰাষ্ট শূন্য ৰানতে বিদায় লয় । ফলত শ্ৰীলংকা A ৰ সমগ্ৰ দলটো ৪৮.৫ অভাৰত ২৬৯ ৰানতে অল-আউট হয় । ভাৰতৰ হৈ অৰ্শদ খান, অনুকূল ৰয়, আয়ুষ বাদোনী আৰু বিপ্ৰাজ নিগমে সুন্দৰ বলিং কৰি ২ টাকৈ উইকেট লাভ কৰে আৰু ৭ টা বল বাকী থকা অৱস্থাতে ভাৰতক এক স্মৰণীয় জয় উপহাৰ দিয়ে ।

এই মেচখনৰ বাবে ভাৰত A দলৰ খেলুৱৈসকল আছিল- বৈভৱ সূৰ্যৱংশী, প্ৰভচিমৰন সিং (উইকেট কীপাৰ), প্ৰিয়াংশ আৰ্য, ঋতুৰাজ গাইকোৱাড়, তিলক বাৰ্মা (অধিনায়ক), আয়ুষ বাদোনী, অনুকূল ৰয়, সূৰ্যাংশ চেডগে, অংশুল কাম্বোজ, অৰ্শদ খান আৰু বিপ্ৰাজ নিগম ।

লগতে পঢ়ক : আফগানিস্তানৰ শৃংখলাৰ পূৰ্বে ভাৰতীয় দললৈ সকাহ : ৰোহিত-হাৰ্দিকক বিচিচিআইৰ সেউজ সংকেত