১৯০ ৰাণ কৰিও ৰক্ষা নপৰিল বিশ্ব চেম্পিয়ন ভাৰত! দ্বিতীয় টি-২০ত ইংৰাজ বাহিনীৰ হাতত শোচনীয় পৰাজয় ।
মানচেষ্টাৰৰ অ’ল্ড ট্ৰেফ’ৰ্ডত অনুষ্ঠিত পাঁচখনীয়া টি-২০ শৃংখলাৰ দ্বিতীয়খন মেচত ইংলেণ্ডে ভাৰতীয় দলক ৪ উইকেটত পৰাস্ত কৰে । ১৯১ ৰাণৰ লক্ষ্য অনুসৰণ কৰি ইংলেণ্ডে ৬ টা বল বাকী থকা অৱস্থাতে জয়লাভ কৰে । এই জয়েৰে ইংলিছ দলটোৱে শৃংখলাত ১-০ ব্যৱধানত অগ্ৰগতি লাভ কৰিছে । ইফালে শৃংখলাৰ প্ৰথমখন খেল বৰষুণৰ বাবে পৰিত্যক্ত হৈছিল ।
জেকব বেথেলৰ বেটিং ধুমুহা-
ইংলেণ্ডৰ এই আকৰ্ষণীয় জয়ৰ মুখ্য নায়ক আছিল জেকব বেথেল । তেওঁ মাত্ৰ ৪৬ টা বলত ৫ টা চাৰি আৰু ৫ টা ছয়ৰ সহায়ত ৭৬ ৰাণ কৰি অপৰাজিত হৈ ৰয় ।
ৰাণ খেদিবলৈ নামি ইংলেণ্ডৰ আৰম্ভণি দুৰ্বল আছিল । প্ৰথম অভাৰতে অৰ্শদীপ সিঙে ফিল ছল্ট (০) আৰু জচ বাটলাৰক (০) আউট কৰি ভাৰতক এক শক্তিশালী আৰম্ভণি দিছিল । ইয়াৰ পিছত হেৰী ব্ৰুকে ১৫ টা বলত ৩৯ ৰাণৰ এক দ্ৰুত ইনিংছ খেলে । টম বেণ্টন (৩৯ ৰাণ) আৰু জেকব বেথেলে চতুৰ্থ উইকেটৰ বাবে ৬৭ ৰাণৰ গুৰুত্বপূৰ্ণ অংশীদাৰিত্ব গঢ়ি তোলে । ১৭ নম্বৰ অভাৰত ভাৰতীয় স্পীনাৰ ৰবি বিষ্ণোইয়ে ২৯ ৰাণ ব্যয় কৰে, যিটো খেলখনৰ আটাইতকৈ ডাঙৰ টাৰ্নিং পইণ্ট হিচাপে বিবেচিত হয় ।
ভাৰতৰ বেটিং প্ৰদৰ্শন-
টছত জিকি প্ৰথমে বেটিং কৰা ভাৰতীয় দলে নিৰ্ধাৰিত ২০ অভাৰত ৭ উইকেট হেৰুৱাই ১৯০ ৰাণ সংগ্ৰহ কৰে । ভাৰতৰ হৈ অপেনাৰ অভিষেক শৰ্মাই ২৪ টা বলত ৪৩ ৰাণৰ এক বিস্ফোৰক ইনিংছ খেলে । আনহাতে, ঈশান কিষাণে ৪০ টা বলত সৰ্বাধিক ৪৯ ৰাণৰ অৱদান আগবঢ়ায় ।
অধিনায়ক শ্ৰেয়াছ আয়াৰে ৩৭ ৰাণ আৰু শেষৰফালে তিলক বাৰ্মাই মাত্ৰ ১১ টা বলত ২৪ ৰাণ কৰি ভাৰতৰ স্ক’ৰ ১৯০ লৈ লৈ যায় । ইংলেণ্ডৰ হৈ পেচাৰ ছেম কাৰণে উৎকৃষ্ট বলিং কৰি ৩ টা উইকেট লাভ কৰে ।
১৫ বছৰীয়া বৈভৱ সূৰ্যবংশীৰ ঐতিহাসিক অভিষেক
এই খেলখন ভাৰতীয় ক্ৰিকেটৰ বাবে ঐতিহাসিক আছিল, কিয়নো মাত্ৰ ১৫ বছৰ বয়সতে বৈভৱ সূৰ্যবংশীয়ে আন্তঃৰাষ্ট্ৰীয় ক্ৰিকেটত অভিষেক ঘটায় । সঞ্জু চেমছনৰ স্থানত দলত সুযোগ পোৱা বৈভৱক সহ-অধিনায়ক তিলক বাৰ্মাই অভিষেক কেপ প্ৰদান কৰে ।
নিজৰ প্ৰথম মেচতে বৈভৱে জোফ্ৰা আৰ্চাৰৰ দৰে তাৰকা বলাৰক ছয় কোবাই নিজৰ প্ৰতিভা প্ৰদৰ্শন কৰে । তেওঁ ১০ টা বলত ১৪ ৰাণ সংগ্ৰহ কৰে । আনহাতে, ইংলেণ্ডৰ হৈ জচ টাঙেও এই মেচখনৰ জৰিয়তে টি-২০ ক্ৰিকেটত পদাৰ্পণ কৰে ।
লগতে পঢ়ক : বৈভৱ সূৰ্যবংশীয়ে ৰচিলে ইতিহাস, ভংগ হ’ল মাষ্টাৰ-ব্লাষ্টাৰৰ অভিলেখ
