শেহতীয়াকৈ প্ৰায় প্ৰতিজন ইণ্টাৰনেট ব্যৱহাৰকাৰীয়ে ঘিবলী শৈলীত ছবি নিৰ্মাণৰ প্ৰতিযোগিতাত অৱতীৰ্ণ হৈছে । মানুহে নিজাকৈ ঘিবলী ছবি তৈয়াৰ কৰি ছ’চিয়েল মিডিয়াত শ্বেয়াৰ কৰিছে । আজি এই শিল্পকলাক ইণ্টাৰনেটত জনপ্ৰিয় কৰি তোলাত ChatGPT, Google Gemini আৰু Meta AI ৰ দৰে AI সঁজুলিয়ে গুৰুত্বপূৰ্ণ ভূমিকা পালন কৰিছে । কিন্তু ঘিবলী আৰ্টৰ প্ৰতিষ্ঠাপকে এ আইয়ে সৃষ্টি কৰা ছবিক তীব্ৰ সমালোচনা কৰিছে আৰু ইয়াক জীৱনৰ অপমান বুলি অভিহিত কৰিছে ।
ঘিবলী আৰ্টৰ প্ৰতিষ্ঠাপক ‘মিয়াজাকি হায়াও’ কোন ?
আচলতে আজি ঘিবলী শিল্পক যাৰ বাবে জনা যায় তাৰ কৃতিত্ব ষ্টুডিঅ’ ঘিবলীলৈ যায় । ষ্টুডিঅ’ ঘিবলীয়েই এই শিল্পক ছবিত বন্দী কৰি বাস্তৱ জগতলৈ আনিছিল । ১৯৮৫ চনত জাপানত মিয়াজাকি হায়াও, ইছাও টাকাহাটা, টোছিঅ’ চুজুকি আৰু ইয়াছুয়োছি টোকুমাই এই ষ্টুডিঅ’টো প্ৰতিষ্ঠা কৰিছিল ।
জাপানীজ ‘এনিমে’ নামটো নিশ্চয় শুনিছে আৰু বহু কাৰ্টুনতো দেখিছে । ঘিবলী (Ghibli) হৈছে এক প্ৰকাৰৰ জাপানীজ শিল্প য’ত এনিমে চৰিত্ৰসমূহ ছবিত অংকন কৰা হয় । ষ্টুডিঅ’ ঘিবলীৰ আটাইতকৈ অনন্য কথাটো আছিল যে ইয়াৰ এনিমেটৰসকলে এই ছবিবোৰ কম্পিউটাৰ ব্যৱহাৰ নকৰাকৈ হাতেৰে সৃষ্টি কৰিছিল । ইয়াৰ পিছত এই ছবিবোৰ ক্ৰম অনুসৰি সজাই এনিমেচন সৃষ্টি কৰা হৈছিল । প্ৰায় ৪০ বছৰৰ পাছতো ষ্টুডিঅ’ ঘিবলীৰ এনিমেচনসমূহ হাতেৰে অংকন কৰি সৃষ্টি কৰা হয় ।
বৰ্তমান কম্পিউটাৰ ব্যৱহাৰ কৰি এনিমেচন তৈয়াৰ কৰা হৈছে, ইয়াৰ সহ-প্ৰতিষ্ঠাপক মিয়াজাকি হায়াওৱে আজিও হাতেৰে নিৰ্মিত এই শিল্পক জীয়াই ৰখাত অৰিহণা যোগাই আহিছে । এনিমেটেড ছবিৰ উপৰিও তেওঁ এজন মাংগা (Manga) শিল্পী, বিশেষকৈ ১৯৮২ চনৰ পৰা ১৯৮৪ চনলৈকে তেওঁ কাম কৰা মাংগা ধাৰাবাহিক ‘নাউচিকা অৱ দ্য ভেলী অৱ দ্য উইণ্ড’ৰ লগতে আন আন এনিমেটেড ছবি যেনে ‘হিকোটেই জিদাই’ আৰু ‘পৰ্কো ৰছ’পাৰ’ৰ বাবেও পৰিচিত ।
এ আইৰ ওপৰত কঠোৰ মিয়াজাকি-
বিগত কিছুদিনত ঘিবলীৰ ছবি ভাইৰেল হোৱাৰ পিছত এ আইৰ ওপৰত এনিমেটৰ মিয়াজাকি হায়াওৰ প্ৰতিক্ৰিয়াও ভাইৰেল হ’বলৈ ধৰে । তেওঁৰ এটা ভিডিঅ’ ইণ্টাৰনেটত বহুলভাৱে শ্বেয়াৰ কৰা হৈছে য’ত তেওঁক এ আই-জেনেৰেটেড এনিমেচনৰ প্ৰতি অতিশয় ক্ষুব্ধ হোৱা দেখা গৈছে । খবৰ অনুসৰি এই ভিডিঅ’টো ২০১৬ চনৰ য’ত তেওঁ এ আইক সমালোচনা কৰি কৈছে যে এয়া ‘জীৱনৰ অপমান’ আৰু তেওঁ এনে কন্টেন্ট চাবলৈ আগ্ৰহী নহয় ।
মিয়াজাকিয়ে কয়, “এনে বস্তু দেখি মই ৰোমাঞ্চিত হ’ব নোৱাৰো । এইবোৰ বনোৱা মানুহে বিষৰ অনুভৱ বুজি নাপায় । মই ইয়াৰ বাবে অত্যন্ত বিতৃষ্ণাত ভুগিছো আৰু মোৰ শিল্পত এই কৌশল কেতিয়াও গ্ৰহণ কৰিব নিবিচাৰো । মই ভাবো এইটো জীৱনৰ অপমান ।”
