অতি সোনকালে ভাৰতত চেটেলাইটৰ জৰিয়তে ব্ৰডবেণ্ড ইণ্টাৰনেটৰ সুবিধা উপলব্ধ হ’ব।ভাৰতত চেটেলাইটৰ জৰিয়তে ইণ্টাৰনেট সেৱা লাভ কৰিবৰ বাবে জিঅ’ আৰু এয়াৰটেলৰ উপৰিও এলন মাস্কৰ কোম্পানী ষ্টাৰলিংকৰ লগতে এমাজন কুইপাৰেও দৌৰত নামি পৰিছে।
সেৱা প্ৰদানকাৰীসকলে উপগ্ৰহ স্পেকট্ৰম আবণ্টনৰ বাবে অপেক্ষা কৰি আছে। চৰকাৰৰ তৰফৰ পৰাও স্পেকট্ৰম আবণ্টনৰ পিছত উপগ্ৰহ ব্ৰডবেণ্ড সেৱা আৰম্ভ হ’ব পাৰে।
উপগ্ৰহ স্পেকট্ৰম আবণ্টনক লৈ কেন্দ্ৰীয় যোগাযোগ মন্ত্ৰী জ্যোতিৰাদিত্য সিন্ধিয়াই ৰাজ্যসভাত এটা ডাঙৰ বক্তব্য কৰিছে, ইয়াৰ পিছত অতি সোনকালে চেটেলাইট ইণ্টাৰনেট সেৱা আৰম্ভ হোৱাৰ সম্ভাৱনা আছে।
উল্লেখ্য যে ৰাজ্যসভাত প্ৰশ্নকালৰ সময়ত কংগ্ৰেছ নেতা ৰনদীপ সিং সুৰজেৱালাই উত্থাপন কৰা এক প্ৰশ্নৰ উত্তৰত কেন্দ্ৰীয় মন্ত্ৰীগৰাকীয়ে কয় যে, “উপগ্ৰহৰ স্পেকট্ৰম আবণ্টন প্ৰশাসনিকভাৱে কৰা হ’ব।
ইয়াৰ নিলাম কৰা নহয় কাৰণ আমি এনে কোনো সম্পত্তি নিলাম কৰিব নোৱাৰো, যাৰ ওপৰত আমাৰ সম্পূৰ্ণ নিয়ন্ত্ৰণ নাই।
এই কথা কেৱল ভাৰতৰ ক্ষেত্ৰতে নহয়, পৃথিৱীৰ প্ৰতিখন দেশৰ ক্ষেত্ৰতো প্ৰযোজ্য।” লগতে জ্যোতিৰাদিত্য সিন্ধিয়াইও মোবাইল আৰু চেটেলাইট যোগাযোগৰ পাৰ্থক্য সদনৰ মজিয়াত ৰাখিছিল।
কেন্দ্ৰীয় যোগাযোগ মন্ত্ৰী গৰাকীয়ে সদনত লগতে কয় যে “ভাৰতীয় টেলিকম ৰেগুলেটৰী অথৰিটি (TRAI)-এ স্পেকট্ৰম ৰেট নিৰ্ধাৰণ কৰে।”
TRAI ৰ দ্বাৰা স্পেকট্ৰমৰ হাৰ নিৰ্ধাৰণ কৰাৰ পিছত স্পেকট্ৰমৰ সকলো সেৱা প্ৰদানকাৰীক আবণ্টন দিয়া হ’ব। ইয়াত কোনো কাৰণতে ভেদ-ভাব কৰা নহ’ব।
একে সময়তে আন্তঃৰাষ্ট্ৰীয় দূৰসংযোগ সংঘই কোনো বিশেষ দেশত উপগ্ৰহৰ কক্ষপথ আৰু কম্পাংক নিযুক্ত কৰাৰ কাম কৰে,যিটো দেশৰ সীমাৰ ভিতৰত ব্যৱহাৰ কৰিব পাৰিব।
