শুকুৰবাৰে আলিয়া ভাটৰ ছবি ‘জিগৰা’ ছবিগৃহত মুক্তি লাভ কৰিছিল যদিও মুক্তিৰ পূৰ্বেই এই ছবিখন বিতৰ্কৰ বাবে বাতৰিৰ শিৰোনাম দখল কৰিছে । ‘জিগৰা’ই মিশ্ৰিত সমালোচনা লাভ কৰাৰ লগতে বক্স অফিচত শক্তিশালী আৰম্ভণি কৰিবলৈ সক্ষম নহ’ল । ইয়াৰ মাজতে মণিপুৰৰ অভিনেতা বিজৌ থাংজামে ছবিখনৰ নিৰ্মাতাসকলৰ বিৰুদ্ধে ‘অপেছাদাৰী আচৰণ’ৰ অভিযোগ উত্থাপন কৰিছে ।
ছ’চিয়েল মিডিয়া প্লেটফৰ্ম এক্সত পোষ্ট কৰি বিজৌৱে লিখিছে যে তেওঁক ছবিখনত এটা চৰিত্ৰ দিয়াৰ প্ৰতিশ্ৰুতি দিয়া হৈছিল আৰু ষ্টেণ্ডবাইত থাকিবলৈ কোৱা হৈছিল । ইয়াৰ বাবে তেওঁ আন আন প্ৰজেক্ট এৰি থৈ গৈছিল আৰু শেষত তেওঁ ‘জিগৰা’ত কাম নাপালে ।
বিজৌৱে সামাজিক মাধ্যমৰ পোষ্টত লিখিছে যে তেওঁ এইটো ‘জিগৰা’ বা কোনো কাৰ্যসূচীৰ বাবে চলি থকা বিতৰ্কৰ সৈতে জড়িত হ’বলৈ লিখা নাই । তেওঁৰ পোষ্টৰ জৰিয়তে, তেওঁ দেখুৱাব বিচাৰে যে ডাঙৰ প্ৰযোজনা গৃহবোৰে প্ৰায়ে উত্তৰ-পূৰ্বাঞ্চলৰ অভিনেতাসকলৰ সৈতে কেনে ব্যৱহাৰ কৰে ।
ছ’চিয়েল মিডিয়াত এটা বিবৃতি শ্বেয়াৰ কৰি বিজৌৱে লিখিছে, ‘দিব্যা খোচলা কুমাৰৰ ‘সাৱী’ নকল কৰাৰ বাবে জিগৰাক লৈ হোৱা বিতৰ্কৰ মাজত জঁপিয়াই পৰাৰ বাবে মই এইটো লিখা নাই । অৱশ্যে, মই কিছু সময়ৰ পৰা জিগৰা দলৰ আচৰণৰ বিষয়ে নীৰৱ হৈ আছোঁ আৰু সম্ভৱতঃ এতিয়া কথা কোৱাৰ সঠিক সময়। ২০২৩ চনত, তেওঁলোকৰ দলে এটা চৰিত্ৰৰ অডিচনৰ বাবে মোৰ ওচৰলৈ গৈছিল । তেওঁলোকৰ সময়ৰেখা অনুসৰণ কৰি, মই চাৰি মাহত দুবাৰ মোৰ অডিচন টেপ প্ৰেৰণ কৰিছিলো । নৱেম্বৰৰ শেষত, তেওঁলোকে মোক কৈছিল যে মই ডিচেম্বৰত দৃশ্যগ্ৰহণ কৰিব লাগিব । যদিও তেওঁলোকে মোক শ্বুটিঙৰ সঠিক তাৰিখ কোৱা নাছিল । তথাপিও তেওঁলোকে মোক ডিচেম্বৰৰ বাবে বুকিং কৰিলে, এই আশাত যে মই যিকোনো সময়তে তেওঁলোকৰ বাবে শ্বুটিং কৰিবলৈ উপলব্ধ হ’ম ।’
নিৰ্মাতাসকলে দৃশ্যগ্ৰহণৰ বিষয়ে সোধাত কোনো সঁহাৰি দিয়া নাছিল-
বিজৌৱে বৰ্ণনা কৰিছে যে যিহেতু তেওঁ মণিপুৰ, ইম্ফলত আছিল, তেওঁ আৰম্ভণিৰে পৰা স্পষ্ট কৰি দিছিল যে ভ্ৰমণৰ ব্যৱস্থাৰ প্ৰয়োজন হ’ব, কিন্তু নিৰ্মাতাসকলে কোনো গুৰুত্ব দিয়া নাছিল ।
বিজৌৱে প্ৰকাশ কৰিছিল যে ডিচেম্বৰত, তেওঁ ছবিখনৰ কাষ্টিং দলৰ সৈতে কথা পাতি আছিল, কিন্তু তেওঁক কেতিয়া প্ৰয়োজন হ’ব সেই বিষয়ে অৱগত কৰা হোৱা নাছিল। ২৬ ডিচেম্বৰত তেওঁ এটা অন্তিম বাৰ্তা পাইছিল, ‘সঁহাৰিৰ বাবে অপেক্ষা কৰি আছো ।’ তাৰ পিছত, দলটোৱে তেওঁৰ সৈতে যোগাযোগ কৰা নাছিল । বিজৌৱে উল্লেখ কৰিছিল যে এই সময়ছোৱাত, তেওঁ আন প্ৰজেক্ট বাদ দিছিল, কিন্তু ‘জিগৰা’ দলে তেওঁক শ্বুটিঙৰ বাবে সেউজ সংকেত দিয়া নাছিল ।
বিজৌৱে আৰু কয়, ‘মই বুজি পাওঁ যে ডাঙৰ ডাঙৰ প্ৰডাকচন হাউচবোৰে কিমান কাম কৰে । পৰিচালকজনো অতি প্ৰতিভাশালী যদিও এই সমগ্ৰ পৰিস্থিতিৰ চম্ভালি লোৱা ধৰণটো আছিল অতি অপেছাদাৰী । উত্তৰ-পূৰ্বাঞ্চলৰ পৰা অহা মোৰ দৰে অভিনেতাৰ বাবে সেয়া আছিল প্ৰত্যাখ্যান আৰু প্ৰায় বৈষম্যৰ দৰেই । মোৰ সময় নষ্ট হ’ল আৰু মই আন সুযোগ হেৰুৱালোঁ কাৰণ তেওঁলোকে কৈছিল যে তেওঁলোকে কোৱাৰ লগে লগে মই শ্বুটিঙৰ বাবে সাজু হ’ম । ‘
বিজৌৱে পুনৰ কয় যে ‘জিগৰা’ৰ কাহিনী সন্দৰ্ভত চলি থকা বিতৰ্ক বা কোনো এজেণ্ডাৰ প্ৰতি তেওঁৰ আগ্ৰহ নাই । তেওঁ মাত্ৰ দেখুৱাব বিচাৰে যে ডাঙৰ ডাঙৰ প্ৰডাকচন হাউছে উত্তৰ-পূবৰ অভিনেতাসকলৰ লগত কেনে ব্যৱহাৰ কৰে ।
