ভাৰতীয় নৌসেনাৰ মুৰব্বী এডমিৰেল দিনেশ কে. ত্ৰিপাঠী তিনিদিনীয়া ইণ্ডোনেছিয়া ভ্ৰমণত আছে । মঙলবাৰে তেওঁ ইণ্ডোনেছিয়াৰ প্ৰতিৰক্ষা মন্ত্ৰী শ্বাফ্ৰি শ্বামছ’ইদ্দিনৰ সৈতে প্ৰতিৰক্ষা প্ৰযুক্তিৰ ক্ষেত্ৰত দ্বিপাক্ষিক বৈঠকত মিলিত হয় । এই বৈঠকত প্ৰতিৰক্ষা প্ৰযুক্তিৰ ক্ষেত্ৰত ভাৰতৰ সৈতে সহযোগিতা কৰাৰ প্ৰতি তীব্ৰ আগ্ৰহ প্ৰকাশ কৰে প্ৰতিৰক্ষা মন্ত্ৰীজনে । তেওঁ ইণ্ডোনেছিয়াৰ শীৰ্ষ সামৰিক বিষয়াসকলক সাক্ষাৎ কৰে । ইণ্ডোনেছিয়াৰ প্ৰতিৰক্ষা মন্ত্ৰালয়ে কয় যে দুয়োপক্ষৰ মাজত দ্বিপাক্ষিক সম্পৰ্ক শক্তিশালী কৰা আৰু প্ৰতিৰক্ষা সহযোগিতা বৃদ্ধিৰ বিষয়টো আলোচনা কৰা হৈছে ।
মন্ত্ৰালয়ে কয় যে, “এডমিৰেল দীনেশ ত্ৰিপাঠীয়ে লক্ষ্য কৰে যে ভাৰতে নিজৰ নৌসেনাৰ উন্নতিত সহায়ক হোৱাকৈ থলুৱা প্ৰযুক্তি বিকশিত কৰি আছে । প্ৰতিৰক্ষা মন্ত্ৰী শ্বাফ্ৰি শ্বামছ’ইদ্দিনে ইয়াৰ শলাগ লয় । তেওঁ ইণ্ডোনেছিয়াৰ প্ৰতিৰক্ষা উন্নতিৰ দিশত একেলগে কাম কৰাৰ আশাও প্ৰকাশ কৰে ।” মন্ত্ৰালয়ে আৰু কয় যে, “ভাৰত-ইণ্ডোনেছিয়াৰ প্ৰতিৰক্ষা সম্পৰ্ক সম্প্ৰসাৰণ আৰু সামুদ্ৰিক সহযোগিতা আৰু অধিক শক্তিশালী কৰাৰ ব্যৱস্থাৰ বিষয়ে আলোচনা কৰা হয় ।”
এডমিৰেল দিনেশ ত্ৰিপাঠীয়ে দুয়োখন দেশৰ মাজত প্ৰতিৰক্ষা ঔদ্যোগিক সহযোগিতাৰ সম্ভাৱ্য পথসমূহৰ ওপৰত আলোকপাত কৰে । ভাৰতীয় নৌসেনাই যোৱা সপ্তাহত কয় যে এডমিৰেল ত্ৰিপাঠীৰ এই ভ্ৰমণে ভাৰত-প্ৰশান্ত মহাসাগৰীয় অঞ্চলৰ প্ৰতি তেওঁলোকৰ দৃষ্টিভংগীৰ সৈতে সংগতি ৰাখি দুয়োখন দেশৰ মাজত শক্তিশালী সামুদ্ৰিক সম্পৰ্কক আলোকপাত কৰিছে ।
