শুকুৰবাৰে বিশাখাপট্টনমত ষ্টীল্থ ফ্ৰিগেট আই এন এচ তাৰাগিৰিক ভাৰতীয় নৌসেনাত অন্তৰ্ভুক্ত কৰা হয়

প্ৰতিৰক্ষা মন্ত্ৰী ৰাজনাথ সিঙে শুকুৰবাৰে বিশাখাপট্টনমত ষ্টীল্থ ফ্ৰিগেট আই এন এচ তাৰাগিৰিক ভাৰতীয় নৌসেনাত অন্তৰ্ভুক্ত কৰে । এই যুদ্ধজাহাজখন ভাৰতীয় নৌসেনাৰ প্ৰজেক্ট ১৭এ-ৰ অধীনত নিৰ্মিত এক অত্যাধুনিক ষ্টীল্থ ফ্ৰিগেট । এই অনুষ্ঠানত ভাৰতীয় নৌসেনাৰ মুৰব্বী এডমিৰেল দিনেশ কুমাৰ ত্ৰিপাঠী আৰু চিফ অফ ডিফেন্স ষ্টাফ অনিল চৌহানৰ লগতে নৌসেনাৰ অন্যান্য জ্যেষ্ঠ বিষয়াসকল উপস্থিত থাকে ।

বিৱৰ্তিত আঞ্চলিক নিৰাপত্তা গতিশীলতা আৰু ইণ্ডো-পেচিফিক অঞ্চলত ভাৰতৰ গভীৰ সক্ৰিয়তাৰ পৰিপ্ৰেক্ষিতত ভাৰতৰ পূব উপকূলৰ কৌশলগত আৰু সামুদ্ৰিক গুৰুত্ব বৃদ্ধি পাই অহাৰ সময়তে তাৰাগিৰিক নৌসেনাত অন্তৰ্ভুক্ত কৰা হৈছে । তাৰাগিৰিৰ কমিচনিং কাৰ্যসূচীয়ে নৌসেনাৰ উচ্চাভিলাষী নৌবহৰ বৃদ্ধিৰ আঁচনিৰ জৰিয়তে নিজৰ যুদ্ধ প্ৰস্তুতি আৰু কাৰ্যক্ষম শক্তি শক্তিশালী কৰাৰ ক্ষেত্ৰত থকা নিৰন্তৰ গুৰুত্বক প্ৰতিফলিত কৰিছে ।

প্ৰজেক্ট ১৭এ শ্ৰেণীৰ চতুৰ্থখন শক্তিশালী প্লেটফৰ্ম হিচাপে তাৰাগিৰি কেৱল এখন জাহাজেই নহয়; ই ৬৬৭০ টন ওজনৰ ‘মেক ইন ইণ্ডিয়া’ উদ্দীপনা আৰু আমাৰ থলুৱা জাহাজ নিৰ্মাণ কেন্দ্ৰসমূহৰ অত্যাধুনিক অভিযান্ত্ৰিক দক্ষতাৰ প্ৰকাশ । মুম্বাইৰ মাজাগাঁও ডক শ্বিপবিল্ডাৰ্ছ লিমিটেড (MDL)ৰ দ্বাৰা নিৰ্মিত হৈছে এই ফ্ৰিগেট । । ইয়াৰ মসৃণ গঠন আৰু হ্ৰাস পোৱা ৰাডাৰ ক্ৰছ-চেকচনে ইয়াক মাৰাত্মক গোপনীয়তাৰে কাম কৰাৰ সুবিধা প্ৰদান কৰে । ৭৫ শতাংশতকৈ অধিক থলুৱা সামগ্ৰীৰে নিৰ্মিত এই জাহাজখনে এক ঘৰুৱা ঔদ্যোগিক পৰিৱেশ তন্ত্ৰৰ পৰিপক্কতাক দৰ্শায়, য’ত এতিয়া ২০০ তকৈও অধিক ক্ষুদ্ৰ, লঘু আৰু মজলীয়া উদ্যোগ অন্তৰ্ভুক্ত হৈ আছে ।

কম্বাইণ্ড ডিজেল বা গেছ (CODOG) প্ৰপালচন প্লাণ্টৰ দ্বাৰা পৰিচালিত তাৰাগিৰিক ‘উচ্চ গতি-উচ্চ সহনশীলতা’ৰ বহুমুখী আৰু বহুমাত্রিক সামুদ্ৰিক কাৰ্যকলাপৰ বাবে ডিজাইন কৰা হৈছে । জাহাজখনৰ অস্ত্ৰ সম্ভাৰ বিশ্বমানৰ, য’ত ছুপাৰচনিক উপৰিভাগৰ পৰা উপৰিভাগলৈ নিক্ষেপ কৰিব পৰা মিছাইল, মধ্যম দূৰত্বৰ উপৰিভাগৰ পৰা আকাশলৈ নিক্ষেপ কৰিব পৰা মিছাইল আৰু এক বিশেষ চাবমেৰিন বিৰোধী যুদ্ধ সঁজুলি আছে । এই ব্যৱস্থাসমূহ এক অত্যাধুনিক কমবেট মেনেজমেণ্ট চিষ্টেমৰ জৰিয়তে নিৰৱচ্ছিন্নভাৱে একত্ৰিত কৰা হৈছে, যাতে জাহাজৰ কৰ্মীসকলে চকুৰ পচাৰতে ভাবুকিৰ সঁহাৰি দিব পাৰে । সাগৰৰ শ্ৰেষ্ঠ চিকাৰী হিচাপে নিজৰ ভূমিকাৰ উপৰিও তাৰাগিৰিক আধুনিক কূটনীতি আৰু মানৱীয় সংকটৰ জটিলতাৰ বাবে নিৰ্মাণ কৰা হৈছে । ইয়াৰ নমনীয় মিছন প্ৰফাইলে ইয়াক উচ্চ-তীব্ৰতাৰ যুঁজৰ পৰা আৰম্ভ কৰি মানৱীয় সাহায্য আৰু দুৰ্যোগ সাহায্যলৈকে সকলোৰে বাবে আদৰ্শ কৰি তুলিছে ।

লগতে পঢ়ক : সমুদ্ৰ বক্ষত বাঢ়িল ভাৰতৰ শক্তি, শত্ৰুৰ নিদ্ৰা হৰণ কৰিবলৈ সাজু আই এন এছ আৰিধমন আৰু তাৰাগিৰি

আই এন এছ আৰিধমনত দীৰ্ঘ দূৰত্বৰ ক্ষেপণাস্ত্ৰ সজ্জিত কৰা হৈছে যিয়ে ইয়াক অধিক দূৰত্বৰ পৰা শত্ৰুক লক্ষ্য কৰি ল’ব পৰাকৈ সক্ষম কৰিব

প্ৰতিৰক্ষা মন্ত্ৰী ৰাজনাথ সিঙে শুকুৰবাৰে ছ’চিয়েল মিডিয়া প্লেটফৰ্ম এক্সত এক পোষ্টযোগে ভাৰতৰ তৃতীয়খন থলুৱা পাৰমাণৱিক চাবমেৰিন আই এন এছ আৰিধমন নৌসেনাত অন্তৰ্ভূক্ত কৰাৰ ইংগিত দিয়ে । তেওঁ লিখিছে যে- এয়া কোনো শব্দ নহয়, এয়া শক্তি । এই চাবমেৰিনে ভাৰতৰ সামুদ্ৰিক পাৰমাণৱিক সুৰক্ষা আৰু অধিক শক্তিশালী কৰিব । ইয়াৰ উপৰিও তেওঁ বিশাখাপট্টনমত নৌসেনাক গতাই দিব উন্নত ষ্টীলথ্ ফ্ৰিগেট আই এন এছ তাৰাগিৰি ।

আই এন এছ আৰিধমনত দীৰ্ঘ দূৰত্বৰ ক্ষেপণাস্ত্ৰ সজ্জিত কৰা হৈছে যিয়ে ইয়াক অধিক দূৰত্বৰ পৰা শত্ৰুক লক্ষ্য কৰি ল’ব পৰাকৈ সক্ষম কৰিব । এতিয়া এই ছাবমেৰিনখনে চূড়ান্ত সাগৰীয় পৰীক্ষা সম্পূৰ্ণ কৰিছে আৰু অতি সোনকালে ইয়াক ষ্ট্ৰেটেজিক কমাণ্ড ফৰ্ছেচত অন্তৰ্ভূক্ত হ’ব । ইয়াৰ পূৰ্বে ২০১৬ চনত আই এন এছ অৰিহান্ত, আৰু ২০২৪ চনৰ আগষ্ট মাহত আই এন এছ আৰিঘাট নৌসেনাত কমিচন কৰা হৈছিল ।

বৰ্তমান ৰাজনাথ সিং বিশাখাপট্টনমত আছে, য’ত ভাৰতৰ সকলো পাৰমাণৱিক চাবমেৰিন নিৰ্মাণ কৰা হয় । আজি তেওঁ থলুৱাভাৱে নিৰ্মিত উন্নত ষ্টীলথ্ ফ্ৰিগেট তাৰাগিৰি ভাৰতীয় নৌসেনাত কমিচন কৰিব । এই সময়ছোৱাত তেওঁ অৰিদমনৰ বিষয়ে পোষ্ট কৰিছে । নৌসেনাৰ মুৰব্বী এডমিৰেল দিনেশ কে ত্ৰিপাঠীয়ে ইতিমধ্যে ২০২৫ চনৰ ডিচেম্বৰ মাহত উল্লেখ কৰিছিল যে এপ্ৰিলৰ পৰা মে’ মাহৰ ভিতৰত চাবমেৰিনখনে সেৱাত প্ৰৱেশ কৰিব । এতিয়া চূড়ান্ত পৰীক্ষা সম্পূৰ্ণ হৈছে ।

আই এন এছ অৰিহান্ত আৰু আই এন এছ অৰিঘাটৰ তুলনাত অৰিদমন যথেষ্ট উন্নত । ইয়াত আঠটা ভাৰ্টিকেল লঞ্চ টিউব আছে, অৰিহান্তত মাত্ৰ চাৰিটা আছে । অৰ্থাৎ ই একেলগে আৰু অধিক ক্ষেপণাস্ত্ৰ কঢ়িয়াই নিব পৰাকৈ সক্ষম । ইয়াত ৩৫০০ কিলোমিটাৰ দূৰত্বত আঘাত হানিব পৰা আঠটা কে-৪ ক্ষেপণাস্ত্ৰ বা ৭৫০ কিলোমিটাৰ দূৰত্ব আঘাত কৰিব পৰা ২৪টা কে-১৫ ক্ষেপণাস্ত্ৰ কঢ়িয়াই নিব পাৰে । ইয়াৰ ফলত ভাৰতৰ নৌসেনাৰ পাৰমাণৱিক শক্তি বহু পৰিমাণে বৃদ্ধি পাব ।

আই এন এছ অৰিধমন হৈছে অৰিহান্ত শ্ৰেণীৰ এখন উন্নত পাৰমাণৱিক শক্তিসম্পন্ন বেলিষ্টিক মিছাইল চাবমেৰিন (এছ এছ বি এন)। ক’ড নাম ‘S4’, ইয়াৰ দৈৰ্ঘ প্ৰায় ১২৫ মিটাৰ আৰু ওজন ৭,০০০ টন, যাৰ ফলত ই পূৰ্বৰ মডেলতকৈ ১০০০ টন গধুৰ । ভাৰতীয় নৌসেনাৰ এডভান্সড টেকন’লজি ভেহিকেল (এটিভি) প্ৰকল্পৰ অধীনত বিশাখাপট্টনমত নিৰ্মাণ কৰা হৈছে এই চাবমেৰিনখন ।

আই এন এছ আৰিধমনৰ জৰিয়তে ভাৰতৰ পাৰমাণৱিক সামৰ্থ্য আৰু অধিক শক্তিশালী হ’ব । ইয়াৰ দ্বাৰা ভাৰতৰ “প্ৰথম ব্যৱহাৰ নহয়” নীতিক সমৰ্থন কৰা হয়, অৰ্থাৎ শত্ৰুৱে প্ৰথমে আক্ৰমণ কৰিলে প্ৰতিশোধ ল’বলৈ সাজু হোৱা ।

ইফালে চীনৰ ক্ৰমবৰ্ধমান নৌসেনাৰ উপস্থিতি আৰু পাকিস্তানৰ সৈতে উত্তেজনাৰ পৰিপ্ৰেক্ষিতত এই চাবমেৰিনখন হ’ব এক শক্তিশালী উপস্থিতি । ইয়াৰ জৰিয়তে আৰব সাগৰ আৰু ভাৰত মহাসাগৰত ভাৰতৰ উপস্থিতি বৃদ্ধি পাব, যিটো আঞ্চলিক শান্তিৰ বাবে অতি প্ৰয়োজনীয় ।

লগতে পঢ়ক : যিকোনো পৰিস্থিতিৰ সন্মুখীন হ’বলৈ সাজু ভাৰতঃ পশ্চিম এছিয়াৰ সংকটক লৈ ৰাজনাথ সিঙৰ মন্তব্য