ফ্ৰান্স ভ্ৰমণৰ পিছত ১৩ ফেব্ৰুৱাৰীত প্ৰধানমন্ত্ৰী নৰেন্দ্ৰ মোদীয়ে আমেৰিকা ভ্ৰমণ কৰিব, য’ত তেওঁ মাৰ্কিন ৰাষ্ট্ৰপতি ড’নাল্ড ট্ৰাম্পক সাক্ষাৎ কৰিব । এই বৈঠকত বাণিজ্য, নিৰাপত্তা, প্ৰতিৰক্ষা সহযোগিতা আৰু ভিছা নীতিৰ দৰে গুৰুত্বপূৰ্ণ বিষয়সমূহৰ ওপৰত আলোচনা হোৱাৰ সম্ভাৱনা আছে ।
ট্ৰাম্প পুনৰ ৰাষ্ট্ৰপতি হোৱাৰ পিছত এইটোৱেই হ’ব প্ৰধানমন্ত্ৰী মোদীৰ আমেৰিকা ভ্ৰমণ । এই ভ্ৰমণৰ ওপৰত বিশ্বৰ দৃষ্টি নিবদ্ধ আছে, কিয়নো দুয়োখন দেশে কৌশলগত আৰু অৰ্থনৈতিক অংশীদাৰিত্ব শক্তিশালী কৰাৰ বাবে কেইবাখনো চুক্তিত স্বাক্ষৰ কৰিব পাৰে ।
প্ৰধানমন্ত্ৰী মোদীৰ দশম আমেৰিকা ভ্ৰমণ-
প্ৰধানমন্ত্ৰী মোদীৰ এয়া হ’ব তেওঁৰ দশম আমেৰিকা ভ্ৰমণ । ২০১৪ চনৰ পৰা মোদীয়ে বাৰাক ওবামা, ড’নাল্ড ট্ৰাম্প আৰু জো বাইডেনক সাক্ষাৎ কৰি আহিছে । এতিয়া ট্ৰাম্প পুনৰ ৰাষ্ট্ৰপতি হোৱাৰ পিছত হোৱাইট হাউছত দুয়োগৰাকী নেতাৰ মাজত এক গুৰুত্বপূৰ্ণ বৈঠক অনুষ্ঠিত হ’ব ।
মূল আলোচনাৰ বিষয়সমূহ-
১/ অবৈধ প্ৰব্ৰজনকাৰীক ভাৰতলৈ ঘূৰাই অনা-
আমেৰিকাই অবৈধ অনুপ্ৰৱেশকাৰীক ঘূৰাই পঠিয়াইছে, য’ত ভাৰতীয় নাগৰিকো আছে । ভাৰতে ইতিমধ্যে স্পষ্ট কৰি দিছে যে ভাৰতে নিজৰ নাগৰিকক ঘূৰাই ল’বলৈ সাজু । কিন্তু ভাৰতীয় নাগৰিকক হেণ্ডকাফত পঠিওৱা পদ্ধতিয়ে ভাৰতত বিতৰ্কৰ সৃষ্টি কৰিছে ।
প্ৰধানমন্ত্ৰী মোদীয়ে এই বিষয়ত ট্ৰাম্পৰ সৈতে আলোচনা কৰিব যাতে ভৱিষ্যতে ভাৰতীয় নাগৰিকক সন্মানজনকভাৱে উভতাই পঠিওৱা হয় ।
২/ শুল্ক আৰু আমদানি শুল্ক-
ট্ৰাম্প প্ৰশাসনে বহু দেশৰ ওপৰত গধুৰ শুল্ক আৰোপ কৰিছে যদিও ভাৰতে এতিয়ালৈকে ইয়াৰ পৰা ৰেহাই লাভ কৰিছে । এই ভ্ৰমণত শুল্ক আৰু বাণিজ্যিক শুল্ক সন্দৰ্ভত আলোচনাৰ সম্ভাৱনা আছে ।
৩/ দ্বিপাক্ষিক বাণিজ্য-
আমেৰিকা ভাৰতৰ সৰ্ববৃহৎ বাণিজ্যিক অংশীদাৰ । ভাৰত-আমেৰিকাৰ বাণিজ্যত আমেৰিকাৰ অংশীদাৰিত্ব ১০.৭৩% । এই ভ্ৰমণৰ সময়ত বাণিজ্যিক সম্পৰ্ক আৰু অধিক শক্তিশালী কৰাৰ বাবে চুক্তি স্বাক্ষৰিত হ’ব পাৰে ।
৪/ প্ৰতিৰক্ষা সহযোগিতা-
ভাৰতে আমেৰিকাৰ পৰা পি-৮আই নিৰীক্ষণ বিমান ক্ৰয়ৰ চুক্তিৰ ওপৰত চকু ৰাখিছে । এই চুক্তিয়ে ভাৰতৰ নিৰাপত্তা আৰু প্ৰতিৰক্ষা সামৰ্থ্য শক্তিশালী কৰিব । ভাৰত-প্ৰশান্ত মহাসাগৰীয় কৌশল আৰু QUAD অংশীদাৰিত্ব সন্দৰ্ভতো দুয়োগৰাকী নেতাৰ মাজত আলোচনা হ’ব ।
৫/ ভিছা আৰু ইমিগ্ৰেচন নীতি-
ভাৰতীয় আই টি পেছাদাৰীসকলৰ বাবে এইচ-১বি ভিছা নীতি উন্নত কৰাৰ বিষয়ে আলোচনা হ’ব পাৰে । আমেৰিকাত ভাৰতীয় প্ৰৱাসীৰ অৱস্থা উন্নত কৰাৰ বাবেও আলোচনা হ’ব ।
৬/ ভাৰত-পূব ইউৰোপ অৰ্থনৈতিক কৰিডৰ-
এই প্ৰকল্পই ইউৰোপ আৰু এছিয়াৰ মাজত বাণিজ্যিক যোগাযোগ বৃদ্ধিত সহায় কৰিব । এই কৰিডৰ সন্দৰ্ভত ভাৰত আৰু আমেৰিকাই পাৰস্পৰিক সহযোগিতা আৰু অধিক শক্তিশালী কৰিব পাৰে ।
উল্লেখ্য যে শুল্ক, ভিছা নীতি আৰু প্ৰবাসী ভাৰতীয়ৰ বিষয়ত ট্ৰাম্প প্ৰশাসনৰ স্থিতি ভাৰতৰ বাবে গুৰুত্বপূৰ্ণ হ’ব । ভাৰত-আমেৰিকাৰ প্ৰতিৰক্ষা আৰু বাণিজ্যিক অংশীদাৰিত্ব শক্তিশালী কৰাৰ ক্ষেত্ৰত এই ভ্ৰমণ গুৰুত্বপূৰ্ণ বুলি প্ৰমাণিত হ’ব পাৰে ।
