আমেৰিকা যুক্তৰাষ্ট্ৰৰ ৰাষ্ট্ৰপতি ডনাল্ড ট্ৰাম্প আৰু ইউক্ৰেইনৰ ৰাষ্ট্ৰপতি ভলোডিমিৰ জেলেনস্কিৰ মাজত ওভাল অফিচত যি ঘটিছিল সেয়া বিশ্বই প্ৰত্যক্ষ কৰিছিল। বিবাদৰ পিছৰে পৰা শান্তি চুক্তি স্থগিত ৰখা হৈছে।
হোৱাইট হাউচত আমেৰিকা যুক্তৰাষ্ট্ৰৰ ৰাষ্ট্ৰপতি ডনাল্ড ট্ৰাম্প আৰু ইউক্ৰেইনৰ ৰাষ্ট্ৰপতি ভলোডিমিৰ জেলেনস্কিৰ মাজত হোৱা তীব্ৰ বিতৰ্কৰ পিছত ইউৰোপীয় নেতাসকলে জেলেনস্কিৰ প্ৰতি সমৰ্থন ব্যক্ত কৰিছে।
ফ্ৰান্সৰ ৰাষ্ট্ৰপতি ইমানুৱেল মেক্ৰ’নে ৰাছিয়াক আক্ৰমণকাৰী বুলি অভিহিত কৰি কয়, ‘ৰাছিয়া আক্ৰমণকাৰী, আৰু ইউক্ৰেইন হৈছে ভুক্তভোগী ৰাষ্ট্ৰ।’
তেওঁ লগতে উল্লেখ কৰে যে ইউক্ৰেইনে নিজৰ মৰ্যাদা, স্বাধীনতা, নিজৰ সন্তান আৰু ইউৰোপৰ নিৰাপত্তাৰ বাবে যুঁজ দি আছে।
জাৰ্মান চাঞ্চেলৰ ওলাফ শ্চোলজে আশ্বাস দিছিল যে ইউক্ৰেইন জাৰ্মানী আৰু ইউৰোপৰ ওপৰত নিৰ্ভৰ কৰিব পাৰে। স্পেইন আৰু পোলেণ্ডৰ প্ৰধানমন্ত্ৰীসকলেও জেলেনস্কিৰ সৈতে একাত্মতা প্ৰকাশ কৰি কয়, ‘আপুনি অকলশৰীয়া নহয়।’
ইউৰোপীয় আয়োগৰ সভাপতি উৰসুলা ভন ডেৰ লেয়েনে প্ৰতিক্ৰিয়া ব্যক্ত কৰি কয়, “আপুনি কেতিয়াও অকলশৰীয়া নহয়, মৰমৰ ৰাষ্ট্ৰপতি।”
তেওঁ টুইট কৰি লিখিছে যে, “আপোনাৰ মৰ্যাদাই ইউক্ৰেইনৰ লোকসকলৰ সাহসিকতাক সন্মান জনাইছে। শক্তিশালী হৈ থাকক, সাহসী হওক, নিৰ্ভীক হওক। আমি এক ন্যায়সংগত আৰু স্থায়ী শান্তিৰ বাবে আপোনাৰ সৈতে কাম কৰি যাম।”
ইটালীৰ প্ৰধানমন্ত্ৰী জিঅৰ্জিয়া মেলোনিয়ে আমেৰিকা যুক্তৰাষ্ট্ৰ, ইউৰোপীয় ৰাজ্য আৰু মিত্ৰশক্তিৰ মাজত এক জৰুৰী সন্মিলনৰ আহ্বান জনাইছে যাতে আজিৰ মুখ্য প্ৰত্যাহ্বানসমূহৰ মোকাবিলা কেনেদৰে কৰিব বিচাৰে সেই বিষয়ে মুকলিকৈ আলোচনা কৰিব পাৰি।
নৰৱেৰ প্ৰধানমন্ত্ৰী জোনাছ গহৰে শুক্ৰবাৰে হোৱাইট হাউচত সংঘটিত ঘটনাটোক এক গুৰুতৰ আৰু হতাশাজনক ঘটনা বুলি বৰ্ণনা কৰিছে।
