আগৰতলাৰ বাংলাদেশ কনছুলেটত প্ৰতিবাদকাৰীৰ আক্ৰমণক লৈ তীব্ৰ অসন্তুষ্টি প্ৰকাশ কৰিছে বাংলাদেশে । এই ঘটনাৰ পিছতে বাংলাদেশৰ বৈদেশিক মন্ত্ৰালয়ে ভাৰতৰ উচ্চায়ুক্ত প্ৰাণয় বাৰ্মাক চমন কৰিছে । বাংলাদেশৰ সংবাদ মাধ্যমৰ মতে প্ৰাণয় বাৰ্মা বাংলাদেশৰ ভাৰপ্ৰাপ্ত বৈদেশিক সচিব ৰিয়াজ হামিদুল্লাক সাক্ষাৎ কৰিবলৈ আহিছিল । বৈদেশিক পৰিক্ৰমা উপদেষ্টা মহম্মদ তৌহিদ হুছেইনেও ভাৰতীয় উচ্চায়ুক্তক চমন কৰাৰ কথা স্বীকাৰ কৰে । একে সময়তে আগৰতলাত থকা বাংলাদেশ সহকাৰী উচ্চায়ুক্তৰ ভিছা আৰু কনছুলাৰ সেৱা তাৎক্ষণিকভাৱে কাৰ্যকৰী হোৱাকৈ বন্ধ কৰি দিয়া হৈছে ।
সোমবাৰে আগৰতলাত থকা বাংলাদেশী সহকাৰী উচ্চায়ুক্তৰ চৌহদত ৫০ জনতকৈ অধিক প্ৰতিবাদকাৰী প্ৰৱেশ কৰা বুলি জানিব পৰা গৈছে । এই বিষয়ত বৈদেশিক পৰিক্ৰমা মন্ত্ৰালয়ে কয় যে আগৰতলাত বাংলাদেশৰ সহকাৰী উচ্চায়ুক্তৰ চৌহদত অনুপ্ৰৱেশৰ ঘটনা অত্যন্ত দুখজনক । বৈদেশিক পৰিক্ৰমা মন্ত্ৰালয়ে নতুন দিল্লীত বাংলাদেশ উচ্চায়ুক্ত আৰু ভাৰতত দেশৰ অন্যান্য মিছনসমূহৰ নিৰাপত্তা বৃদ্ধিৰ বাবে ব্যৱস্থা গ্ৰহণ কৰিছে বুলি জানিবলৈ দিয়ে ।
বাংলাদেশ চৰকাৰে সোমবাৰে বাংলাদেশৰ সহকাৰী উচ্চায়ুক্তৰ চৌহদত হিন্দু সংগ্ৰাম সমিতিৰ এক বৃহৎ প্ৰতিবাদকাৰীয়ে কৰা হিংসাত্মক বিক্ষোভ আৰু আক্ৰমণক লৈ গভীৰ অসন্তুষ্টি প্ৰকাশ কৰাৰ লগতে এই ঘটনা সন্দৰ্ভত শীঘ্ৰে ব্যৱস্থা আৰু পুংখানুপুংখ তদন্তৰ দাবী জনাইছে ৷
ভাৰত-বাংলাদেশৰ সম্পৰ্ক কেৱল এটা বিষয়তে সীমাবদ্ধ নহয় : প্ৰাণনয় বাৰ্মা
বাংলাদেশৰ বৈদেশিক মন্ত্ৰালয়ে চমন কৰাৰ পিছত ভাৰতীয় উচ্চায়ুক্ত প্ৰণয় বাৰ্মাই কয় যে ভাৰত-বাংলাদেশৰ সম্পৰ্ক বহুমাত্ৰিক আৰু ব্যাপক, ইয়াক এটা বিষয় বা এজেণ্ডাত সীমাবদ্ধ থাকিব নোৱাৰে । তেওঁ কয় যে, আমি ইতিবাচক, সুস্থিৰ, গঠনমূলক সম্পৰ্ক লৈ আগবাঢ়িব বিচাৰো । ইয়াৰ বাবে আমি বহু কাম কৰি আছো । আমি আমাৰ সহযোগিতাই যাতে আমাৰ দুয়োখন দেশৰ জনসাধাৰণক উপকৃত কৰে, তাৰ প্ৰতি লক্ষ্য ৰাখি যাম ।
তেওঁ কয় যে যোৱা কেইমাহমানত আমাৰ সম্পৰ্কত ইতিবাচক অগ্ৰগতি হৈছে, সেয়া বাণিজ্যই হওক, শক্তি সঞ্চাৰণ হওক, অত্যাৱশ্যকীয় সামগ্ৰীৰ যোগান হওক, আমি অতি ইতিবাচক গতি বজাই ৰাখিছো । আমি বাংলাদেশৰ অন্তৱৰ্তীকালীন চৰকাৰৰ সৈতে আলোচনাৰ বাবে সাজু হৈ আছো আৰু শান্তি, নিৰাপত্তা আৰু উন্নয়নৰ বাবে আমাৰ ভাগ-বতৰা আকাংক্ষা পূৰণৰ বাবে একেলগে কাম কৰিবলৈ প্ৰতিশ্ৰুতিবদ্ধ ।
চাৰিজন আৰক্ষী বিষয়াৰ বিৰুদ্ধে ব্যৱস্থা-
বাংলাদেশ উচ্চায়ুক্তই আগৰতলাত থকা মিছনত নিৰাপত্তা ভংগক লৈ অসন্তুষ্টি ব্যক্ত কৰিছে । কনছুলেটৰ নিৰাপত্তাৰ ক্ষেত্ৰত হোৱা ভুলৰ সৈতে জড়িত চাৰিজন আৰক্ষী বিষয়াৰ বিৰুদ্ধে ৰাজ্য চৰকাৰে ব্যৱস্থা গ্ৰহণ কৰিছে । এই ঘটনাৰ লগত জড়িত ৭ জন লোকক গ্ৰেপ্তাৰ কৰা হৈছে । পশ্চিম ত্ৰিপুৰাৰ আৰক্ষী অধীক্ষক কিৰণ কুমাৰে কয় যে গাফিলতিৰ অভিযোগত তিনিজন উপ-পৰিদৰ্শকক নিলম্বন কৰা হৈছে আৰু এজন উপ-আৰক্ষী অধীক্ষকক আৰক্ষী মুখ্য কাৰ্যালয়ত ৰিপৰ্ট কৰিবলৈ নিৰ্দেশ দিয়া হৈছে ।
ঘটনা সন্দৰ্ভত নিউ কেপিটেল কমপ্লেক্স (এন চি চি) আৰক্ষী থানাত এটা স্বতঃপ্ৰণোদিত গোচৰ ৰুজু কৰা হৈছে । কনচুলেটত নিৰাপত্তা বৃদ্ধি কৰা হৈছিল আৰু ঘটনাটোৰ পিছত কেন্দ্ৰীয় ৰিজাৰ্ভ আৰক্ষী বাহিনী (চি আৰ পি এফ) আৰু ত্ৰিপুৰা ষ্টেট ৰাইফলছ (টিএছআৰ)ৰ জোৱান মোতায়েন কৰা হৈছিল ।
