এই ছিজনত মুম্বাই ইণ্ডিয়ানে যশপ্ৰীত বুমৰাহ অবিহনে আই পি এলত প্ৰৱেশ কৰিছে। বুমৰাহৰ অনুপস্থিতিৰ বাবে অনুৰাগীসকল হতাশ হৈ পৰিছে যদিও এতিয়া দ্ৰুত বলাৰগৰাকীৰ উভতি অহাৰ সন্দৰ্ভত নতুন আপডেট আহিছে।
খেলপথাৰলৈ বুমৰাহ উভতি অহাত পলম হ’ব পাৰে। জানিব পৰা মতে বুমৰাহৰ পুনৰ্বাসন প্ৰায় সম্পূৰ্ণ হৈছে যদিও আই পি এলৰ বাকী ছিজনৰ বাবে এতিয়াও অনিশ্চয়তা আছে।
বুমৰাহে এতিয়াও বিচিচিআইৰ চেণ্টাৰ অৱ এক্সেলেন্স (চিঅ’ই)ত সম্পূৰ্ণ শক্তিৰে বলিং কৰিব পৰা নাই।দ্ৰুত বলাৰসকলে নিজেই নিজৰ কামৰ বোজা নিৰীক্ষণ কৰি আছে, যিটো ক্ৰমান্বয়ে চিকিৎসকৰ তত্বাৱধানত বৃদ্ধি কৰা হৈছে।
এক তথ্য অনুসৰি এপ্ৰিলৰ মাজভাগৰ ভিতৰত বুমৰাহ মুম্বাই ইণ্ডিয়ানছত যোগদান কৰিব পাৰিব। এনে পৰিস্থিতিত মুম্বাই ইণ্ডিয়ানছৰ হৈ আৰু কমেও তিনিখন মেচ খেলিব নোৱাৰিব বুমৰাহ।
বুমৰাহৰ কামৰ বোজা বিবেচনা কৰি বি চি চি আইয়ে সাৱধানতা অৱলম্বন কৰিছে।আচলতে আই পি এলৰ ঠিক পিছতেই ভাৰতে ইংলেণ্ডৰ বিৰুদ্ধে টেষ্ট মেচৰ শৃংখলা খেলিব লাগিব।
এই কথা মনত ৰাখি বুমৰাহ সন্দৰ্ভত মেনেজমেণ্টৰ খৰখেদা কৰা নাই।বুমৰাহৰ কামৰ বোজাৰ প্ৰতি লক্ষ্য ৰাখি ইংলেণ্ডৰ বিৰুদ্ধে ৫ খন টেষ্ট শৃংখলাত কমেও তিনিখন টেষ্ট মেচৰ বাবে তেওঁক দলত অন্তৰ্ভুক্ত কৰাৰ পৰিকল্পনা কৰা হৈছে।
উল্লেখ্য যে অষ্ট্ৰেলিয়াৰ বিৰুদ্ধে বৰ্ডাৰ-গাভাস্কাৰ ছিৰিজৰ পঞ্চম টেষ্ট মেচত বুমৰাহ আঘাতপ্ৰাপ্ত হৈছিল।টেষ্ট মেচৰ সময়ত পিঠিৰ স্পামৰ অভিযোগত খেলপথাৰৰ পৰা ওলাই আহিছিল।
এই বেগী বলাৰগৰাকীয়ে তাৰ পিছত অষ্ট্ৰেলিয়াৰ দ্বিতীয় ইনিংছৰ সময়ত বলিং কৰা নাছিল। সেই মেচৰ পিছৰে পৰা বুমৰাহ টিম ইণ্ডিয়াৰ পৰা বাহিৰ হৈ আছে। আঘাতৰ বাবে বুমৰাহ চেম্পিয়নছ ট্ৰফীৰ অংশও হ’ব নোৱাৰিলে।
