বৰ্তমান ছিৰিয়াৰ পৰিস্থিতি অতি উদ্বেগজনক হৈ আছে । বিদ্ৰোহী বাহিনীয়ে ৰাষ্ট্ৰপতি বাছাৰ আছাদক ক্ষমতাৰ পৰা উৎখাত কৰাৰ দুদিন পিছত ভাৰতে মঙলবাৰে অশান্ত জৰ্জৰ দেশখনৰ পৰা ৭৫ জন প্ৰবাসী ভাৰতীয় নাগৰিকক স্থানান্তৰ কৰে । এই ভাৰতীয়সকল লেবানন হৈ ভাৰতত উপস্থিত হ’ব । বৈদেশিক পৰিক্ৰমা মন্ত্ৰালয়ে কয় যে ডামাস্কাছ আৰু বেইৰুটত থকা ভাৰতীয় দূতাবাসসমূহৰ দ্বাৰা সমন্বিত স্থানান্তৰ নিৰাপত্তা পৰিস্থিতি মূল্যায়ন কৰাৰ পিছত কাৰ্যকৰী কৰা হয় ।
বৈদেশিক মন্ত্ৰালয়ৰ বিবৃতি-
গভীৰ নিশা বৈদেশিক পৰিক্ৰমা মন্ত্ৰালয়ে এক বিবৃতিত কয় যে ছিৰিয়াৰ শেহতীয়া পৰিস্থিতিৰ পিছত ভাৰত চৰকাৰে আজি দেশখনৰ পৰা ৭৫ জন ভাৰতীয় নাগৰিকক উদ্ধাৰ কৰিছে । সকলো ভাৰতীয় নাগৰিক নিৰাপদে লেবাননত উপস্থিত হৈছে আৰু উপলব্ধ বাণিজ্যিক বিমানেৰে ভাৰতলৈ উভতি আহিব । ডামাস্কাছ আৰু বেইৰুটত থকা ভাৰতীয় দূতাবাসৰ সমন্বয়ত কৰা এই কাম নিৰাপত্তা পৰিস্থিতিৰ ওপৰত আমাৰ মূল্যায়ন আৰু ছিৰিয়াত ভাৰতীয় নাগৰিকৰ অনুৰোধৰ পিছত কাৰ্যকৰী কৰা হৈছিল ।
পৰিস্থিতিৰ ওপৰত তীক্ষ্ণ দৃষ্টি থাকিব চৰকাৰৰ-
বৈদেশিক পৰিক্ৰমা মন্ত্ৰালয়ে কয় যে চৰকাৰে বহিঃৰাষ্ট্ৰত থকা ভাৰতীয় নাগৰিকৰ সুৰক্ষাক সৰ্বোচ্চ অগ্ৰাধিকাৰ দিয়ে । বিবৃতিটোত আৰু কোৱা হৈছে যে ছিৰিয়াত থকা ভাৰতীয় নাগৰিকসকলক ডামাস্কাছত থকা ভাৰতীয় দূতাবাসৰ সৈতে যোগাযোগত থাকিবলৈ পৰামৰ্শ দিয়া হৈছে । বৈদেশিক পৰিক্ৰমা মন্ত্ৰালয়ে কয় যে চৰকাৰে পৰিস্থিতিৰ ওপৰত তীক্ষ্ণ নজৰ ৰাখিব ।
