বছৰৰ প্ৰথমখন গ্ৰেণ্ড শ্লেম প্ৰতিযোগিতা অষ্ট্ৰেলিয়ান অ’পেন ২০২৫ত মঙলবাৰে (২১ জানুৱাৰী) এক ৰোমাঞ্চকৰ কোৱাৰ্টাৰ ফাইনেল মেচ অনুষ্ঠিত হয় । য’ত ছাৰ্বিয়াৰ ন’ভাক জ’কভিচে স্পেইনৰ কাৰ্লোছ আলকাৰাজ গাৰ্ফিয়াৰ সৈতে সংঘৰ্ষত লিপ্ত হয় । য’ত জ’কভিচে বিশ্বৰ ৩ নম্বৰ আলকাৰাজক ৪-৬, ৬-৪, ৬-৩, ৬-৪ ব্যৱধানত পৰাস্ত কৰে ।
৩৭ বছৰীয়া জ’কভিচৰ বাবে ২১ বছৰীয়া যুৱক আলকাৰাজৰ সৈতে প্ৰতিযোগিতা কৰাটো সহজ নাছিল । প্ৰথম ছেটতে তেওঁ ৪-৬ ব্যৱধানত পৰাজয়ৰ সন্মুখীন হ’বলগীয়া হৈছিল । ইয়াৰ পিছত জ’কভিচে শক্তিশালী প্ৰত্যাৱৰ্তন কৰি একেৰাহে ৩টা ছেটত জয়লাভ কৰি মেচখনত জয়ী হয় । দুয়োগৰাকী খেলুৱৈৰ মাজত এই খেলখন ৩ ঘণ্টা ৩৭ মিনিট ধৰি চলিছিল ।
এই জয়ৰ জৰিয়তে জ’কভিচে ছেমি ফাইনেলত প্ৰৱেশ কৰিছে । ২৪ জানুৱাৰীত অনুষ্ঠিত হ’বলগীয়া এই মেচখনত জ’কভিচে বিশ্বৰ ২ নম্বৰ স্থানৰ জাৰ্মানীৰ আলেকজেণ্ডাৰ ঝভেৰেভৰ সৈতে মুখামুখি হ’ব । কোৱাৰ্টাৰ ফাইনেলত জয়লাভ কৰি জ’কভিচে টেনিছ জগতত নিজৰ আধিপত্য প্ৰতিষ্ঠা কৰিছে ।
জ’কভিচক অষ্ট্ৰেলিয়ান অ’পেনৰ ৰজা হিচাপে গণ্য কৰা হয় । তেওঁ এই অষ্ট্ৰেলিয়ান অ’পেন খিতাপ সৰ্বাধিক বাৰ অৰ্থাৎ পুৰুষৰ একক শাখাত ১০ বাৰ জয় কৰিছে । তেওঁৰ পিছতে মহিলাৰ একক শাখাত দ্বিতীয় নাম হৈছে ৭ বাৰ এই খিতাপ দখল কৰা ছেৰেনা উইলিয়ামছ । আলকাৰাজৰ বিৰুদ্ধে এই খেলখন সহজ নাছিল । এনে পৰিস্থিতিত এই বিজয়ে তেওঁৰ আধিপত্যৰ প্ৰতিফলন ঘটায় ।
ইতিহাস ৰচনা কৰাৰ সুযোগ আছে জ’কভিচৰ-
এ টি পি ৰেংকিঙত ৭ নম্বৰ স্থানত থকা জ’কভিচে বৰ্তমান (পুৰুষৰ মাজত) সৰ্বাধিক ২৪টা গ্ৰেণ্ড শ্লেম খিতাপ দখল কৰা খেলুৱৈ । এইবাৰ যদি তেওঁ অষ্ট্ৰেলিয়ান অ’পেনৰ খিতাপ দখল কৰে তেন্তে তেওঁ ইতিহাসৰ সৃষ্টি কৰিব । তেওঁ টেনিছ জগতৰ (পুৰুষ আৰু মহিলা) সৰ্বাধিক ২৫ টা গ্ৰেণ্ড শ্লেম জয় কৰা একমাত্ৰ খেলুৱৈ হিচাপে পৰিগণিত হ’ব ।
অষ্ট্ৰেলিয়াৰ প্ৰাক্তন মহিলা টেনিছ খেলুৱৈ মাৰ্গাৰেট ক’ৰ্টেও ২৪টা গ্ৰেণ্ড শ্লেম খিতাপ দখল কৰিছে । এনে পৰিস্থিতিত জ’কভিচে অষ্ট্ৰেলিয়ান অ’পেনত জয়লাভ কৰি মাৰ্গাৰেটক পৰাস্ত কৰি ইতিহাসৰ সৃষ্টি কৰিব । পুৰুষৰ ভিতৰত দ্বিতীয় স্থানত আছে স্পেইনৰ ৰাফেল নাডাল, যিয়ে ২২টা গ্ৰেণ্ড শ্লেম খিতাপ দখল কৰিছে ।
