চীনৰ উপ-ৰাষ্ট্ৰপতিক সাক্ষাৎ এছ জয়শংকৰৰ
বৈদেশিক পৰিক্ৰমা মন্ত্ৰী এছ জয়শংকৰে আজি চীনৰ উপ-ৰাষ্ট্ৰপতি হান ঝেঙক সাক্ষাৎ কৰে।তেওঁ ভাৰত-চীনৰ সম্পৰ্ক ক্ৰমান্বয়ে স্বাভাৱিক কৰাৰ প্ৰয়োজনীয়তাৰ ওপৰত গুৰুত্ব আৰোপ কৰিছে।
এছ জয়শংকৰৰ এই ভ্ৰমণ বিশেষভাৱে গুৰুত্বপূৰ্ণ বুলি বিবেচিত হৈছে, কাৰণ ২০২০ চনত পূব লাডাখৰ নিয়ন্ত্ৰণ ৰেখাত সামৰিক ষ্টেণ্ডঅফৰ পিছত এইটোৱেই তেওঁৰ প্ৰথম চীন ভ্ৰমণ।
বৈদেশিক পৰিক্ৰমা মন্ত্ৰী এছ জয়শংকৰে চাংঘাই সহযোগিতা সংস্থাৰ বৈদেশিক মন্ত্ৰীসকলৰ বৈঠকৰ বাবে চীনলৈ গৈছে।
ইয়াত দিয়া বক্তব্যত তেওঁ কৈছে যে বৰ্তমানৰ পৰিস্থিতিত ভাৰত আৰু চীনৰ মাজৰ সম্পৰ্ক স্বাভাৱিক কৰাটো প্ৰয়োজনীয়।
বেইজিঙত উপস্থিত হোৱাৰ পিছত বৈদেশিক মন্ত্ৰীগৰাকীয়ে চীনৰ উপ-ৰাষ্ট্ৰপতি হান ঝেঙক সাক্ষাৎ কৰি ইয়াক লৈ সুখ প্ৰকাশ কৰে।তেওঁ চীনৰ চাংঘাই সহযোগিতা সংস্থা (SCO)ৰ অধ্যক্ষতাত ভাৰতৰ সমৰ্থন পুনৰ দৃঢ় কৰে।
বৈদেশিক মন্ত্ৰীগৰাকীয়ে কয় যে যি সময়ত দুয়োখন দেশৰ মাজত বৈঠক চলি আছে, সেই সময়ত আন্তঃৰাষ্ট্ৰীয় পৰিস্থিতি অত্যন্ত জটিল।
এনে পৰিস্থিতিত চুবুৰীয়া দেশ আৰু প্ৰধান অৰ্থনীতি হিচাপে ভাৰত আৰু চীনৰ মাজত মত আৰু দৃষ্টিভংগীৰ মুকলি আদান-প্ৰদান অতি গুৰুত্বপূৰ্ণ।
তেওঁ কয় যে চীনৰ এছ চি অ’ৰ অধ্যক্ষ পদৰ সফলতা ভাৰতে সমৰ্থন কৰে আৰু অনুমান কৰা হৈছে যে যোৱা অক্টোবৰ মাহত কাজানত প্ৰধানমন্ত্ৰী মোদী আৰু ৰাষ্ট্ৰপতি ছি জিনপিঙৰ মাজত হোৱা বৈঠকৰ পিছৰে পৰা আমাৰ দ্বিপাক্ষিক সম্পৰ্ক ক্ৰমাগতভাৱে উন্নত হৈছে।
বৈদেশিক পৰিক্ৰমা মন্ত্ৰীগৰাকীয়ে কয় যে কৈলাশ মানসৰোৱৰ যাত্ৰা পুনৰ আৰম্ভ হোৱাৰ কথা ভাৰতত অতি ইতিবাচকভাৱে শলাগ লোৱা হৈছে।
ইয়াৰ জৰিয়তে দুয়োখন দেশৰ জনসাধাৰণৰ মাজত সাংস্কৃতিক আৰু ধৰ্মীয় সম্পৰ্ক সুদৃঢ় কৰাৰ সুযোগ আহিছে।লগতে দ্বিপাক্ষিক আলোচনাক আগুৱাই নিয়াৰ প্ৰয়োজনীয়তাৰ ওপৰত গুৰুত্ব আৰোপ কৰি সকলো সমস্যা শান্তিপূৰ্ণভাৱে সমাধান হ’ব বুলি আশা প্ৰকাশ কৰে।
লগতে পঢ়ক: দালাই লামাৰ উত্তৰাধিকাৰীত্বক লৈ বিচলিত চীন; এছ জয়শংকৰৰ ভ্ৰমণৰ পূৰ্বে দিলে সতৰ্কবাণী
