পাকিস্তানক সকীয়নি প্ৰধানমন্ত্ৰী মোদীৰ
ভূপালত লোকমাতা অহিল্যাবাই মহিলা সশক্তিকৰণ কাৰ্যসূচীত ভাষণ দি প্ৰধানমন্ত্ৰী মোদীয়ে দেশৰ কন্যাসকলৰ বাবে কৰা উন্নয়নমূলক কামৰ কথা উল্লেখ কৰে । পহলগাম আক্ৰমণত কন্যাৰ সেন্দুৰ মচি পেলোৱা সন্ত্ৰাসবাদীৰ বিৰুদ্ধে আৰম্ভ হোৱা অপাৰেচন সিন্দুৰৰ কথা উল্লেখ কৰি প্ৰধানমন্ত্ৰী মোদীয়ে কয় যে সন্ত্ৰাসবাদীয়ে নাৰী শক্তিক প্ৰত্যাহ্বান জনাইছিল । এই প্ৰত্যাহ্বান সন্ত্ৰাসবাদী আৰু সন্ত্ৰাসবাদৰ পৃষ্ঠপোষকৰ বাবে কাল হৈ পৰিল ।
তেওঁ কয় যে, অপাৰেচন সিন্দুৰ হৈছে ভাৰতৰ ইতিহাসত সন্ত্ৰাসবাদীৰ বিৰুদ্ধে চলোৱা আটাইতকৈ ডাঙৰ আৰু সফল অভিযান । য’ত পাকিস্তানী সেনাই ভাবিবও পৰা নাছিল, তাত আমাৰ সেনাই সন্ত্ৰাসবাদীৰ আত্মগোপন কৰা ঠাইবোৰ ধ্বংস কৰে । শ কিলোমিটাৰ ভিতৰলৈ সোমাই গৈ সন্ত্ৰাসবাদীক মাটিৰ লগত মিলাই দিয়ে ।
অপাৰেচন সিন্দুৰে স্পষ্টকৈ উল্লেখ কৰিছে যে সন্ত্ৰাসবাদীৰ জৰিয়তে ছাঁয়া যুদ্ধ নচলিব । আমি ঘৰত সোমাই হত্যা কৰিম আৰু সন্ত্ৰাসবাদীক সহায় কৰা সকলে তাৰ বাবে ডাঙৰ মূল্য ভৰিব লাগিব । প্ৰধানমন্ত্ৰীয়ে কয় যে এতিয়া ভাৰতৰ প্ৰতিজন নাগৰিকে কৈছে যে যদি আপুনি গুলী চলায় তেন্তে ধৰি লওক যে গুলীৰ উত্তৰ গোলাৰে দিয়া হ’ব ।
সিন্দুৰ এতিয়া ভাৰতৰ বীৰত্বৰ প্ৰতীক হৈ পৰিছে-
প্ৰধানমন্ত্ৰী মোদীয়ে দেৱী অহিল্যাবাই হোলকাৰৰ জন্ম বাৰ্ষিকী কাৰ্যসূচীত মহিলাৰ বাবে কৰা চৰকাৰী কামৰ কথাও উল্লেখ কৰে । তেওঁ কয় যে সেয়া তেওঁলোকৰ বেংক একাউণ্টেই হওক বা তেওঁলোকক শক্তিশালী কৰাৰ আঁচনি হওক । চৰকাৰে এই দিশত গুৰুত্বপূৰ্ণ পদক্ষেপ গ্ৰহণ কৰিছে । লগতে প্ৰধানমন্ত্ৰী মোদীয়ে ভূপালৰ পৰা ড্ৰোন দিদি অভিযানৰ বিষয়ে সমগ্ৰ দেশক জনায় । সিন্দুৰৰ কথা উল্লেখ কৰি প্ৰধানমন্ত্ৰী মোদিয়ে কয় যে ৰাম ভক্তিত নিমজ্জিত হনুমান জীয়েও সিন্দুৰ ধাৰণ কৰিছে । এই সিন্দুৰ এতিয়া ভাৰতৰ বীৰত্বৰ প্ৰতীক হৈ পৰিছে । পহলগামত সন্ত্ৰাসবাদীয়ে কেৱল ভাৰতীয়ৰ তেজ বোৱাই নহয় আমাৰ সংস্কৃতিক আক্ৰমণ কৰি সমাজখনক বিভাজিত কৰাৰ চেষ্টা চলাইছিল ।
দৃঢ় সংকল্প থাকিলে ফলাফল লাভ কৰিব পৰা যায়-
প্ৰধানমন্ত্ৰী মোদীয়ে কয় যে দেৱী অহিল্যাবাই হোলকাৰৰ নাম শুনি মনত শ্ৰদ্ধাৰ অনুভূতি উদ্ভৱ হয় । তেওঁৰ মহান ব্যক্তিত্বৰ বিষয়ে ক’বলৈ শব্দৰ অভাৱ । যেতিয়া ইচ্ছাশক্তি আৰু শক্তিশালী সংকল্প থাকে, পৰিস্থিতি যিমানেই প্ৰতিকূল নহওক কিয়, ফলাফল লাভ কৰিব পৰা যায়- তেওঁ এই কথাৰ প্ৰতীক । আঢ়ৈ-তিনিশ বছৰৰ আগতে যেতিয়া দেশখন দাসত্বৰ শিকলিত আছিল, তেতিয়া ইমান ডাঙৰ কাম কৰা, যি আগন্তুক বহু প্ৰজন্মই ক’ব, ক’বলৈ সহজ যদিও কৰাটো সহজ নাছিল । লোকমাতা অহিল্যাবাই কেতিয়াও ভগৱানৰ সেৱা আৰু জনসাধাৰণৰ সেৱাক বেলেগ বুলি গণ্য কৰা নাছিল ।
লগতে পঢ়ক : ১৪ বছৰীয়া বৈভৱ সূৰ্যবংশীক সাক্ষাৎ প্ৰধানমন্ত্ৰীৰ; ভৰি চুই ললে আশীৰ্বাদ
