ভাৰত আৰু পাকিস্তানৰ মাজত ক্ৰমাৎ বৃদ্ধি পোৱা উত্তেজনাক লৈ সমগ্ৰ বিশ্বতে উদ্বেগ বৃদ্ধি পাইছে । জি-৭ দেশ আৰু ছিংগাপুৰৰ বৈদেশিক মন্ত্ৰীসকলে দুয়োখন দেশক সংযম প্ৰয়োগ কৰি আলোচনাৰ জৰিয়তে বিবাদ নিষ্পত্তি কৰিবলৈ আহ্বান জনাইছে । জি-৭ দেশৰ বৈদেশিক মন্ত্ৰী — কানাডা, ফ্ৰান্স, জাৰ্মানী, ইটালী, জাপান, ব্ৰিটেইন, আমেৰিকা আৰু ইউৰোপীয় সংঘই ২২ এপ্ৰিলত ভাৰতৰ জম্মু-কাশ্মীৰৰ পহলগামত সংঘটিত সন্ত্ৰাসবাদী আক্ৰমণক তীব্ৰ গৰিহণা দি এক যৌথ বিবৃতি প্ৰকাশ কৰিছে ।
ভাৰত-পাকিস্তানক সংযম ৰখাৰ আহ্বান-
জি-৭ৰ বিবৃতিত কোৱা হৈছে যে, ‘আমি ভাৰত আৰু পাকিস্তানক সৰ্বাধিক সংযম প্ৰয়োগ কৰিবলৈ আহ্বান জনাইছো । পৰৱৰ্তী যিকোনো সামৰিক ব্যৱস্থাই অঞ্চলটোৰ শান্তি আৰু স্থিতিশীলতাৰ প্ৰতি গুৰুতৰ ভাবুকি কঢ়িয়াই আনিব । আমি দুয়োখন দেশকে তৎকালীনভাৱে উত্তেজনা হ্ৰাস কৰি শান্তিৰ বাবে প্ৰত্যক্ষ আলোচনাত মিলিত হ’বলৈ আহ্বান জনাইছো ।’
ভাৰত-পাকিস্তানৰ উত্তেজনাক লৈ উদ্বেগ প্ৰকাশ ছিংগাপুৰৰ-
ইফালে ছিংগাপুৰেও এই বিষয়ত উদ্বেগ প্ৰকাশ কৰিছে । শুকুৰবাৰে ছিংগাপুৰৰ বৈদেশিক পৰিক্ৰমা মন্ত্ৰালয়ে এক বিবৃতিত কয় যে, ‘ভাৰত আৰু পাকিস্তানৰ মাজত চলি থকা সামৰিক সংঘাতক লৈ আমি গভীৰ উদ্বিগ্ন । আমি দুয়োপক্ষক আহ্বান জনাইছো যে উত্তেজনা হ্ৰাস কৰি আলোচনাৰ জৰিয়তে সমাধান বিচাৰি উলিয়াওক । লগতে দুয়োখন দেশৰ সাধাৰণ নাগৰিকৰ সুৰক্ষা সুনিশ্চিত কৰিব লাগে ।
ছিংগাপুৰে নিজৰ নাগৰিকৰ বাবে জাৰি কৰিলে পৰামৰ্শ-
ইফালে ছিংগাপুৰে নিজৰ নাগৰিকসকলক জম্মু-কাশ্মীৰ আৰু পাকিস্তান যাত্ৰা নকৰিবলৈ পৰামৰ্শ জাৰি কৰিছে । বৈদেশিক পৰিক্ৰমা মন্ত্ৰালয়ে কয় যে ‘ভাৰত আৰু পাকিস্তানৰ সীমান্তৱৰ্তী অঞ্চলত ছিংগাপুৰৰ নাগৰিকসকল বিশেষভাৱে সজাগ হৈ থাকিব লাগে আৰু প্ৰয়োজনীয় সকলো নিৰাপত্তা ব্যৱস্থা গ্ৰহণ কৰিব লাগে ।’ ছিংগাপুৰে নিজৰ নাগৰিকসকলক ভিৰ হোৱা ঠাইৰ পৰা আঁতৰি থাকিবলৈ, স্থানীয় বাতৰি নিৰীক্ষণ কৰিবলৈ আৰু স্থানীয় কৰ্তৃপক্ষৰ নিৰ্দেশনা মানি চলিবলৈ পৰামৰ্শ দিছে ।
পহলগাম আক্ৰমণ আৰু অপাৰেচন সিন্দুৰৰ পিছত উত্তেজনা তুংগত-
উল্লেখ্য যে, ২২ এপ্ৰিলত পহলগামত সংঘটিত সন্ত্ৰাসবাদী আক্ৰমণৰ পিছত ভাৰতে প্ৰতিশোধ লৈ পাকিস্তান আৰু পাক অধিকৃত কাশ্মীৰ (PoK)ৰ সন্ত্ৰাসবাদী আত্মগোপন স্থানত ‘নিখুঁত আক্ৰমণ’ চলাইছিল । ইয়াৰ প্ৰতিক্ৰিয়া স্বৰূপে বৃহস্পতিবাৰ আৰু শুকুৰবাৰে নিশা পাকিস্তানে জম্মু-কাশ্মীৰৰ পৰা গুজৰাটলৈকে ভাৰতৰ ২৬টা স্থানত ড্ৰ’ন আক্ৰমণ চলায় । অৱশ্যে ভাৰতে পাকিস্তানৰ এই আক্ৰমণ সফলতাৰে প্ৰতিহত কৰি পাকিস্তানক যোগ্য প্ৰত্যুত্তৰ দিছে ।
