আধাৰ, এল পি জিৰ পৰা ইউ পি আইলৈ…
প্ৰতি মাহৰ দৰেই জুন মাহতো কিছু নিয়মত ডাঙৰ পৰিৱৰ্তন হ’ব, যিয়ে আপোনাৰ পকেটত প্ৰভাৱ পেলাব পাৰে । UPI, PF ৰ পৰা LPG চিলিণ্ডাৰৰ দামলৈ ১ জুনৰ পৰা অৰ্থাৎ কাইলৈৰ পৰা নিয়ম সলনি হ’বলৈ গৈ আছে । এনে পৰিস্থিতিত আপোনাৰ আৰ্থিক অৱস্থাৰ ওপৰত প্ৰভাৱ পৰিব পাৰে । ইয়াৰ লগতে কিছু সুবিধাও লাভ কৰিব পাৰিব । জুন মাহৰ পৰা সলনি হ’ব এইকেইটা ডাঙৰ নিয়ম ।
EPFO 3.0 ৰোলআউট-
জুন মাহত আৰম্ভ হ’ব লগা ই পি এফ অ’ৰ নতুন সংস্কৰণ ই পি এফ অ’ ৩.০ মুকলি কৰাৰ পৰিকল্পনা কৰিছে চৰকাৰে । এই ব্যৱস্থা আৰম্ভ হোৱাৰ পিছতে আপোনাৰ পি এফ দাবী অতি সহজ হৈ পৰিব । লগতে এ টি এম আৰু ইউ পি আইৰ পৰাও আপুনি ধন উলিয়াব পাৰিব । এই ব্যৱস্থা আৰম্ভ হোৱাৰ পিছত দেশৰ ৯ কোটিৰো অধিক লোকে লাভ কৰিব ইয়াৰ সুবিধা ।
আধাৰ আপডেটৰ সুবিধা শেষ-
জুন মাহত হ’বলগীয়া পৰৱৰ্তী পৰিৱৰ্তন আধাৰ কাৰ্ডৰ সৈতে জড়িত । আচলতে ইউ আই ডি এ আইয়ে আধাৰ ব্যৱহাৰকাৰীসকলক বিনামূলীয়াকৈ আধাৰ কাৰ্ড আপডেট কৰাৰ সুবিধা প্ৰদান কৰিছে আৰু ইয়াৰ অন্তিম তাৰিখ ১৪ জুন । অৰ্থাৎ এই শেষ তাৰিখৰ ভিতৰত যদি আপুনি আধাৰ বিনামূলীয়া আপডেট কৰিব নোৱাৰে, তেন্তে এই কামৰ বাবে আপুনি ৫০ টকা নিৰ্দিষ্ট মাচুল দিব লাগিব ।
ক্ৰেডিট কাৰ্ডৰ সৈতে জড়িত নিয়ম-
জুনৰ ১ তাৰিখৰ পৰা তৃতীয়টো ডাঙৰ পৰিৱৰ্তন ক্ৰেডিট কাৰ্ড ব্যৱহাৰকাৰীৰ সৈতে জড়িত । যদি আপুনি কোটক মহিন্দ্ৰা বেংকৰ ক্ৰেডিট কাৰ্ড ব্যৱহাৰ কৰে, তেন্তে ১ জুনৰ পৰা আপুনি ডাঙৰ আঘাত পাব পাৰে । যদি এই বেংকৰ ক্ৰেডিট কাৰ্ড ব্যৱহাৰকাৰীৰ অটো ডেবিট লেনদেন বিফল হয়, তেন্তে বেংকে ২ শতাংশ বাউন্স চাৰ্জ প্ৰয়োগ কৰিব পাৰে । ই নূন্যতম ৪৫০ টকা আৰু সৰ্বাধিক ৫০০০ টকা হ’ব পাৰে ।
চি এন জি-পি এন জি আৰু এ টি এফৰ মূল্য-
২০২৫ চনৰ ১ জুনত চতুৰ্থটো বৃহৎ পৰিৱৰ্তন হ’ব পাৰে চি এন জি-পি এন জি আৰু এ টি এফৰ মূল্যৰ সন্দৰ্ভত । তেল বিপণন কোম্পানীসমূহে প্ৰতি মাহৰ প্ৰথম দিনাই এল পি জি চিলিণ্ডাৰৰ লগতে এয়াৰ টাৰ্বাইন ইন্ধনৰ (এ টি এফ মূল্য) মূল্য সংশোধন কৰে । মে’ মাহত ইয়াৰ দাম হ্ৰাস পাইছিল আৰু জুন মাহৰ আৰম্ভণিতো ইয়াত পৰিৱৰ্তন দেখা যাব পাৰে ।
এল পি জি চিলিণ্ডাৰৰ মূল্য-
প্ৰতি মাহৰ প্ৰথম দিনাই এল পি জি চিলিণ্ডাৰৰ দাম সলনি হয় । জুন মাহৰ প্ৰথম দিনাও এল পি জিৰ দামৰ পৰিৱৰ্তন হ’ব পাৰে । ইয়াৰ পূৰ্বে মে’ মাহৰ আৰম্ভণিতে তেল বিপণন কোম্পানীসমূহে ১৪ কেজি ঘৰুৱা গেছ চিলিণ্ডাৰৰ মূল্য অপৰিৱৰ্তিত ৰখাৰ বিপৰীতে ১৯ কেজিৰ বাণিজ্যিক এল পি জি চিলিণ্ডাৰৰ মূল্য প্ৰতি চিলিণ্ডাৰত ১৭ টকা পৰ্যন্ত হ্ৰাস কৰিছিল ।
এফ ডিৰ সুত-
জুন মাহত বেংকসমূহে ফিক্সড ডিপ’জিট আৰু ঋণৰ সুতৰ হাৰ সলনি কৰিব পাৰে । কাৰণ ৰিজাৰ্ভ বেংকে ৰেপো ৰেট কৰ্তন কৰিছে আৰু আগলৈয়ো অধিক হ্ৰাস হোৱাৰ সম্ভাৱনা আছে । উদাহৰণস্বৰূপে, সূৰ্যোদয় ক্ষুদ্ৰ বিত্ত বেংকে ৫ বছৰৰ এফ ডিৰ সুত ৮.৬%ৰ পৰা ৮%লৈ হ্ৰাস কৰিছে ।
মিউচুৱেল ফাণ্ডৰ নিয়ম-
অভাৰনাইট মিউচুৱেল ফাণ্ড আঁচনিৰ বাবে নতুন কাট অফ টাইম ৰূপায়ণ কৰিছে ছেবিয়ে । এই নিয়ম ১ জুন, অফলাইন লেনদেনৰ বাবে বিয়লি ৩ বজাৰ পৰা আৰু অনলাইনৰ বাবে বিয়লি ৭ বজাৰ পৰা কাৰ্যকৰী হ’ব । ইয়াৰ পিছত দিয়া অৰ্ডাৰসমূহ পৰৱৰ্তী কৰ্মদিনত বিবেচনা কৰা হ’ব ।
ইউ পি আই লেনদেন-
এন পি চি আইয়ে ইউ পি আই সন্দৰ্ভত নতুন নিয়ম ৰূপায়ণ কৰিছে, যাৰ অধীনত ইউ পি আই পেমেণ্ট কৰাৰ সময়ত ব্যৱহাৰকাৰীয়ে কেৱল ‘আলটিমেট বেনিফিচিয়াৰী’ অৰ্থাৎ প্ৰকৃত ৰিচিভাৰৰ বেংকিং নামহে দেখিব । QR ক’ড বা সম্পাদিত নাম আৰু দেখা নাযাব । এই নিয়মসমূহ ৩০ জুনৰ ভিতৰত সকলো ইউ পি আই এপত কাৰ্যকৰী হ’ব ।
লগতে পঢ়ক : গিনিজ বুক অৱ ৱৰ্ল্ড ৰেকৰ্ডত লিপিবদ্ধ হ’ল ভাৰতীয় জীৱন বীমা নিগমৰ নাম… গঢ়িলে এই অভিলেখ
