অসমৰ মুখ্যমন্ত্ৰী হিমন্ত বিশ্ব শৰ্মাই শনিবাৰে কয় যে জম্মু-কাশ্মীৰত সংঘটিত সন্ত্ৰাসবাদী আক্ৰমণৰ পিছত এতিয়ালৈকে ৰাজ্যখনত পাকিস্তানৰ সমৰ্থকত সামাজিক মাধ্যমত পোষ্ট কৰাৰ অপৰাধত ১৪ জন লোকক গ্ৰেপ্তাৰ কৰা হৈছে । তেওঁ স্পষ্টকৈ কয় যে প্ৰয়োজন হ’লে এই লোকসকলৰ বিৰুদ্ধে ৰাষ্ট্ৰীয় নিৰাপত্তা আইন অৰ্থাৎ এন এছ এৰ অধীনত ব্যৱস্থা গ্ৰহণ কৰা হ’ব । গুৱাহাটীস্থিত ভাৰতীয় জনতা পাৰ্টিৰ ৰাজ্যিক কাৰ্যালয়ত অনুষ্ঠিত এক অনুষ্ঠানত ড০ শৰ্মাই কয় যে ভাৰত আৰু পাকিস্তানৰ মাজত কোনো সাদৃশ্য নাই । দুয়োখন দেশ শত্ৰু ৰাষ্ট্ৰ আৰু আমি তেনেকৈয়ে থকা উচিত ।
‘ছ’চিয়েল মিডিয়াৰ সকলো পোষ্ট পৰ্যালোচনা কৰা হৈছে’
মুখ্যমন্ত্ৰী ড০ শৰ্মাই কয় যে শুকুৰবাৰে কৃষক মুক্তি সংগ্ৰাম সমিতিৰ এজন নেতাক ‘ভাৰত বিৰোধী মন্তব্য’ কৰাৰ অপৰাধত গ্ৰেপ্তাৰ কৰা হৈছিল । এনে মনোভাৱ গ্ৰহণ কৰা যিকোনো লোককে গ্ৰেপ্তাৰ কৰা হ’ব বুলি সকীয়াই দিয়ে মুখ্যমন্ত্ৰীয়ে । তেওঁ কয়, ‘প্ৰয়োজন হ’লে আমি তেওঁলোকৰ ওপৰত এন এছ এৰ বিধান প্ৰয়োগ কৰিম । আমি সকলো (ছ’চিয়েল মিডিয়া) পোষ্ট পৰ্যালোচনা কৰি আছো আৰু যিকোনো ব্যক্তিক আমি যদি ৰাষ্ট্ৰবিৰোধী বুলি বিবেচনা কৰোঁ তেওঁলোকৰ বিৰুদ্ধে ব্যৱস্থা গ্ৰহণ কৰা হ’ব ।’ ছ’চিয়েল মিডিয়া প্লেটফৰ্ম ‘এক্স’ত এটা পোষ্টত মুখ্যমন্ত্ৰীগৰাকীয়ে কয় যে পাকিস্তানৰ সমৰ্থনত মন্তব্য কৰাৰ বাবে গ্ৰেপ্তাৰ হোৱা লোকৰ সংখ্যা ১৪লৈ বৃদ্ধি পাইছে ।
#Update on Crackdown against traitors- 19:00 hrs of 26 April 2025
1️⃣Sumon Mazumdar alias Bulbul Alom Mazumdar- arrested by @HailakandiPolic
2️⃣Mashud Azhar- arrested by @nagaonpolice
Total 14 arrests made till now against people who have made seditious comments.— Himanta Biswa Sarma (@himantabiswa) April 26, 2025
শনিবাৰে সন্ধিয়া ৭ বজালৈকে গ্ৰহণ কৰা ব্যৱস্থাৰ তথ্য দি তেওঁ লিখিছে, ‘এতিয়ালৈকে দেশদ্ৰোহীমূলক মন্তব্য কৰা ১৪ জন লোকক গ্ৰেপ্তাৰ কৰা হৈছে ।’ দিনটোত কাছাৰত ২ জন, হাইলাকান্দি, নগাঁও আৰু শ্ৰীভূমিত ১ জনকে ধৰি কমেও ৬ জন লোকক গ্ৰেপ্তাৰ কৰা হয় । ‘এক্স’ ত আন এটা পোষ্টত মুখ্যমন্ত্ৰীয়ে কয় যে শুকুৰবাৰে নিশা শ্ৰীভূমি জিলাত এজন ব্যক্তিক আটক কৰা হৈছিল । আন এটা পোষ্টত তেওঁ জনাইছে যে, ‘ছ’চিয়েল মিডিয়াত পাকিস্তানৰ সমৰ্থনত পোষ্ট দিয়াৰ বাবে কাছাৰ আৰক্ষীয়ে আৰু ২ জন লোকক গ্ৰেপ্তাৰ কৰিছে ।’
আৰক্ষীৰ জিম্মাত AIUDFৰ বিধায়ক-
ইয়াৰ পূৰ্বে ড০ শৰ্মাই কয় যে বৃহস্পতিবাৰে অল ইণ্ডিয়া ইউনাইটেড ডেম’ক্ৰেটিক ফ্ৰণ্টৰ বিধায়ক আমিনুল ইছলামকে ধৰি ২ জন লোকক গ্ৰেপ্তাৰ কৰাৰ বিপৰীতে শুকুৰবাৰে সমগ্ৰ ৰাজ্যতে আৰু ৬ জন লোকক গ্ৰেপ্তাৰ কৰা হৈছে । মঙলবাৰে জম্মু-কাশ্মীৰৰ পহলগামত সংঘটিত সন্ত্ৰাসবাদী আক্ৰমণৰ পিছতে এই ব্যৱস্থা গ্ৰহণ আৰম্ভ কৰা হয় । উল্লেখ্য যে, এই আক্ৰমণৰ পিছত অসম আৰক্ষীয়ে ছচিয়েল মিডিয়াত চোকা নিৰীক্ষণ কৰি ৰাষ্ট্ৰ বিৰোধী কাৰ্যকলাপৰ বিৰুদ্ধে কঠোৰ ব্যৱস্থা গ্ৰহণ কৰিছে ।
