বৰ্তমান পৰিস্থিতিৰ পৰিপ্ৰেক্ষিতত, চুবুৰীয়া দেশসমূহৰ পৰা যিকোনো পদক্ষেপৰ সম্ভাৱনা খাৰিজ কৰিব নোৱাৰি আৰু সশস্ত্ৰ বাহিনীয়ে নিশ্চিত কৰিব লাগিব যে তেওঁলোক সম্পূৰ্ণৰূপে প্ৰস্তুত । এই মন্তব্য কৰিছে প্ৰতিৰক্ষা মন্ত্ৰী ৰাজনাথ সিঙে ।
প্ৰতিৰক্ষা মন্ত্ৰী সিঙে বিজয়া দশমী বা দশেৰা উপলক্ষে দাৰ্জিলিঙৰ চুকনা কেণ্টনমেণ্টত ‘শস্ত্ৰ পূজা’ কৰাৰ পিছত এই মন্তব্য কৰে আৰু সেনা জোৱানসকলৰ সৈতে এই উৎসৱ উদযাপন কৰে ।
সেনা জোৱানসকলক সম্বোধন কৰি তেওঁ কয় যে তেওঁ প্ৰতিৰক্ষা মন্ত্ৰালয়ৰ দায়িত্ব লোৱাৰ পিছৰে পৰা তেওঁ সদায় এই কথাৰ ওপৰত গুৰুত্ব আৰোপ কৰি আহিছে যে বিশ্বৰ পৰিস্থিতি যিয়েই নহওঁক, তেওঁলোকে প্ৰস্তুতিত কোনো ধৰণৰ প্ৰচেষ্টা এৰি দিব নালাগে ।
তেওঁ কয়, “আমি যিকোনো পৰিস্থিতিৰ বাবে আৰু প্ৰতিটো বিকল্পৰ সৈতে সদায় সক্ৰিয়ভাৱে প্ৰস্তুত থাকিব লাগিব । এয়া সময়ৰ প্ৰয়োজন আৰু আমি সতৰ্ক হৈ থাকিব লাগিব ।”
শস্ত্ৰ পূজা কৰা সন্দৰ্ভত তেওঁ কয় যে যিকোনো বস্তুৰ পূজা কৰাটো এটা স্পষ্ট ইংগিত যে প্ৰয়োজন হ’লে ইয়াক সম্পূৰ্ণ শক্তিৰে ব্যৱহাৰ কৰা হ’ব । এই অনুষ্ঠানটোৱে ৰাষ্ট্ৰীয় সুৰক্ষাৰ প্ৰতি সতৰ্কতা আৰু দায়বদ্ধতাক সূচায় ।
শুকুৰবাৰে, সিঙে দাৰ্জিলিঙৰ চুকনা কেণ্টৰ পৰা ভিডিঅ’ কনফাৰেন্সৰ জৰিয়তে ২০২৪ চনৰ সেনা কমাণ্ডাৰ সন্মিলনত ভাষণ দিয়ে ।
ইয়াৰ পূৰ্বে, তেওঁ সন্মিলনত অংশগ্ৰহণ কৰিবলৈ গেংটকত উপস্থিত হোৱাৰ কথা আছিল কিন্তু বেয়া বতৰৰ বাবে, তেওঁৰ বিমানখন শিলিগুৰিলৈ উভতি আহে, য’ত তেওঁ চুকনা কেণ্টৰ পৰা ভিডিঅ’ কনফাৰেন্সৰ জৰিয়তে সন্মিলনখন সম্বোধন কৰে ।
