বিৰোধীয়ে ৰাজ্যসভাৰ অধ্যক্ষ জগদীপ ধনখৰৰ বিৰুদ্ধে অনাস্থা প্ৰস্তাৱ অনাৰ সম্ভাৱনা ব্যক্ত কৰিছে । বিৰোধী দলৰ সৈতে জড়িত একাংশ দলে অধ্যক্ষৰ বিৰুদ্ধে অনাস্থা প্রস্তাৱ অনা সন্দর্ভত আলোচনা আৰম্ভ কৰিছে ৷ অৱশ্যে এই সন্দৰ্ভত এতিয়ালৈকে কোনো একমত হোৱা নাই । আগন্তুক এদিন বা দুদিনত এই সন্দৰ্ভত এক ঐকমত্য সৃষ্টিৰ বাবে প্ৰচেষ্টা কৰিব বিৰোধীয়ে ।
সোমবাৰে (৯ ডিচেম্বৰ ২০২৪) ৰাজ্যসভাত ভাৰতীয় জনতা পাৰ্টিৰ সম্বিত পাত্ৰ আৰু নিশিকান্ত ডুবেই কংগ্ৰেছৰ শীৰ্ষ নেতাসকলে কোটিপতি বিনিয়োগকাৰী জৰ্জ ছ’ৰছৰ সৈতে গোপন বুজাবুজি কৰি দেশক অস্থিৰ কৰাৰ অভিযোগ উত্থাপন কৰে । বিজেপিয়ে ৰাহুল গান্ধীক ‘উচ্চতম স্তৰৰ বিশ্বাসঘাতক’ বুলি অভিযোগ কৰি কংগ্ৰেছ দলে ভাৰতৰ বিৰুদ্ধে ছ’ৰছৰ এজেণ্ডা আগবঢ়োৱাৰ অভিযোগ উত্থাপন কৰে । এই অভিযোগ সন্দৰ্ভত কংগ্ৰেছে ক্ষমা বিচৰাৰ দাবী জনায় । এই সন্দৰ্ভত সদনত হুলস্থুল অব্যাহত থাকে আৰু সদন স্তব্ধ হৈ পৰে ।
সদন কেনেকৈ চলাব লাগে সেই সন্দৰ্ভত বৈঠক অনুষ্ঠিত হয়-
সদন স্থবিৰ হৈ পৰাৰ লগে লগে অধ্যক্ষ জগদীপ ধনখৰে ভাৰতৰ ঐক্য আৰু সাৰ্বভৌমত্বৰ প্ৰতি আভ্যন্তৰীণ আৰু বাহ্যিক ভাবুকিৰ বিষয়ে উদ্বেগ প্ৰকাশ কৰি সকীয়াই দিয়ে যে “ডীপ ষ্টেট”ৰ প্ৰভাৱ “কোভিড ৰোগতকৈ অধিক মাৰাত্মক“ ।
এদিনতে তিনিবাৰকৈ স্থগিত ৰখাৰ অন্তত অধ্যক্ষ ধনখৰে সদনৰ নেতা আৰু বিৰোধী দলপতিৰ মাজত বৈঠক অনুষ্ঠিত কৰে । জগদীপ ধনখৰে কয়, “সেই বৈঠকৰ উদ্দেশ্য আছিল সদন যাতে সুচাৰুৰূপে চলি থাকে । দুয়োপক্ষই মুকলিকৈ আলোচনা কৰিছিল আৰু তেওঁলোকে দুটা কথাৰ ইংগিত দিছিল । প্ৰথমতে, ৰাষ্ট্ৰৰ অখণ্ডতা আৰু সাৰ্বভৌমত্ব আমাৰ বাবে পবিত্ৰ । আমি দেশৰ ভিতৰত বা বাহিৰত কোনো শক্তিক আমাৰ ঐক্য, আমাৰ অখণ্ডতা আৰু আমাৰ সাৰ্বভৌমত্ব কলুষিত কৰিবলৈ অনুমতি দিব নোৱাৰো ।”
হুলস্থুল সন্দৰ্ভত পুনৰ এখন বৈঠক অনুষ্ঠিত হ’ব-
তেওঁ কয় যে নেতাসকলে মঙলবাৰে (১০ ডিচেম্বৰ ২০২৪) পুৱা ১০:৩০ বজাত তেওঁৰ চেম্বাৰত পুনৰ বৈঠকত মিলিত হৈ আলোচনা অব্যাহত ৰাখিবলৈ সন্মত হৈছে । অধ্যক্ষ ধনখৰে সদস্যসকলক সাংবিধানিক শপত পালন কৰি ৰাষ্ট্ৰীয় অখণ্ডতাক অগ্ৰাধিকাৰ দিবলৈ আহ্বান জনায় । তেওঁ কয় যে “আমি সকলোৱে একত্ৰিত হৈ ৰাষ্ট্ৰৰ ঐক্য আৰু অখণ্ডতাৰ প্ৰতি যিকোনো প্ৰত্যাহ্বানক ভিতৰৰ পৰা বা বাহিৰৰ পৰা প্ৰত্যাহ্বান জনোৱাটো প্ৰয়োজন । এয়া আমাৰ অস্তিত্বৰ প্ৰতি প্ৰত্যাহ্বান ।”
