দিল্লী উচ্চ ন্যায়ালয়ৰ ন্যায়াধীশ যশৱন্ত বাৰ্মাৰ চৰকাৰী বাসগৃহৰ পৰা বিপুল পৰিমাণৰ নগদ ধন উদ্ধাৰৰ গোচৰটো ক্ৰমাৎ উত্তেজনাময় হৈ পৰিছে । মঙলবাৰে ৰাজ্যসভাৰ অধ্যক্ষ জগদীপ ধনখৰে এখন সৰ্বদলীয় বৈঠক আহ্বান কৰি এই বিষয়ত আলোচনা কৰে । অৱশ্যে বৈঠক শেষ হোৱাৰ পাছত এই সন্দৰ্ভত তথ্য দিওঁতে শিৱসেনাৰ (ইউ বি টি)ৰ সাংসদ প্ৰিয়ংকা চতুৰ্বেদীয়ে কয় যে উচ্চ ন্যায়ালয়ৰ ন্যায়াধীশৰ বাসগৃহৰ পৰা নগদ ধন উদ্ধাৰ কৰাৰ অভিযোগ সন্দৰ্ভত ৰাজ্যসভাৰ অধ্যক্ষ জগদীপ ধনখৰে আহ্বান কৰা বৈঠকত কোনো সিদ্ধান্তত উপনীত হ’ব পৰা নগ’ল ।

অহা সপ্তাহত অধিক আলোচনা হ’ব পাৰে-

সাংবাদিকৰ সৈতে হোৱা বাৰ্তালাপত চতুৰ্বেদীয়ে কয় যে এই বিষয়টো অহা সপ্তাহত সংসদত আলোচনা হ’ব পাৰে । চতুৰ্বেদীয়ে কয় যে আজিৰ বৈঠকত কোনো সিদ্ধান্তত উপনীত হ’ব পৰা নগ’ল । এতিয়া অধ্যক্ষই সদনৰ নেতাসকলৰ সৈতে ব্যক্তিগতভাৱে আলোচনা কৰি সিদ্ধান্তত উপনীত হ’ব ।

আলোচনাৰ দাবী টি এম চিৰ সাংসদসকলৰ-

তৃণমূল কংগ্ৰেছৰ সাংসদসকলে কেৱল “এণ্টিচেম্বাৰ”ত নহয়, সদনত এই বিষয়ত আলোচনাৰ দাবী জনায় । টি এম চিৰ এগৰাকী নেতাই কয় যে সদনত বিষয়সমূহ আলোচনা হ’ব লাগে আৰু পদ্ধতি সঠিকভাৱে পালন কৰিব লাগে । লগতে চৰকাৰে সংসদক অপমান কৰা বুলিও কয় তেওঁ ।

সংসদৰ সদ্য সমাপ্ত শীতকালীন অধিৱেশনত কিছু অবিস্মৰণীয় লজ্জাজনক বিতৰ্কৰ সৃষ্টি হয় । আদানী বিষয়ত চৰকাৰ আৰু বিৰোধীৰ মাজত আৰম্ভ হোৱা ৰাজনৈতিক যুদ্ধৰ ফলত তিক্ত অভিযোগ আৰু প্ৰত্যাক্ৰমণৰ পিছত সংবিধান নিৰ্মাতা আম্বেদকাৰৰ নামত জোকাৰণিৰ সৃষ্টি হয় আৰু শেষত গোচৰ ৰুজু হয় । অৱনতি ঘটা সম্পৰ্কৰ মাজতে সংসদীয় ইতিহাসত প্ৰথমবাৰৰ বাবে উচ্চ সদনৰ অধ্যক্ষ তথা উপ-ৰাষ্ট্ৰপতি জগদীপ ধনখড়ৰ বিৰুদ্ধে অনাস্থা প্ৰস্তাৱ দাখিল কৰা হয় । দুয়োপক্ষৰ মাজত হোৱা উত্তপ্ত তৰ্কৰ বাবে উচ্চ সদনৰ ৬০ শতাংশ সময় আৰু লোকসভাৰ ৪২ শতাংশ সময় হুলস্থুলৰ মাজত হেৰাই যায় ।

বিৰোধী আৰু অধ্যক্ষ ধনখড়ৰ মাজত উত্তেজনা-

বিৰোধীয়ে অধিৱেশনৰ ঠিক পূৰ্বেই আমেৰিকাৰ আদালতত ঔদ্যোগিক আদানীৰ বিৰুদ্ধে অভিযোগ দাখিল কৰাৰ অভিযোগ দুয়োটা সদনত ডাঙৰ বিষয় কৰি তুলিছিল । অধিবেশনৰ প্ৰথম সপ্তাহটো এই বিষয়ত তৰ্ক-বিতৰ্কত পাৰ হয় । ইফালে সংবিধানৰ ৭৫ বছৰৰ গৌৰৱময় যাত্ৰাক লৈ দুদিনীয়া বিশেষ আলোচনাত চৰকাৰ আৰু বিৰোধীয়ে সহমতত উপনীত হয় । কিন্তু এই সময়ছোৱাত বিৰোধীয়ে অধ্যক্ষ ধনখড়ৰ বিৰুদ্ধে বৈষম্যমূলক অভিযোগ উত্থাপন কৰি অনাস্থা প্রস্তাৱৰ জাননী দিয়াৰ বাবে উত্তেজনা আৰু অধিক বৃদ্ধি পায় ৷

লোকসভাত চাৰিখন বিধেয়ক, ৰাজ্যসভাত তিনিখন বিধেয়ক গৃহীত-

কামকাজৰ ক্ষেত্ৰত অধিবেশনৰ প্ৰদৰ্শন মধ্যমীয়া আছিল । এই সময়ছোৱাত লোকসভাত চাৰিখন বিধেয়ক আৰু ৰাজ্যসভাত তিনিখন বিধেয়ক গৃহীত হয় । লোকসভাত পুনৰ উত্থাপন হ’ল চাৰিখন বিধেয়ক । ইয়াৰ ভিতৰত এক দেশ-এক নিৰ্বাচন বিধেয়ক জে পি চি লৈ প্ৰেৰণ কৰা হয় । হুলস্থুল আৰু কামৰ স্তব্ধতাৰ বাবে কেইবাখনো বিধেয়ক দাখিল কৰিব পৰা নগ’ল । এই অধিবেশনত চৰকাৰে ৱাকফ সংশোধনী বিধেয়ক উত্থাপন কৰিব বুলি আলোচনা হৈছিল যদিও সেয়া নহ’ল ।

আম্বেদকাৰৰ সন্দৰ্ভত তিক্ততাই শিখৰত উপনীত হ’ল-

সংসদত চৰ্চিত হয় সংবিধানৰ ৭৫ বছৰীয়া যাত্ৰা । উচ্চ সদনত হোৱা আলোচনাৰ প্ৰতিক্ৰিয়া প্ৰকাশ কৰি আম্বেদকাৰ সন্দৰ্ভত কৰা মন্তব্যক তেওঁক অপমান বুলি অভিহিত কৰি বিৰোধীয়ে গৃহমন্ত্ৰী অমিত শ্বাহৰ পদত্যাগ দাবী কৰে । এই বিষয়ত সংসদৰ ভিতৰত আৰু বাহিৰত দুয়োটা দলে মুখামুখি হৈছিল । একে ক্ৰমতে দুয়োপক্ষৰ মাজত হোৱা হতাহতিত বিজেপিৰ দুজন সাংসদ আহত হয় । ইয়াৰ পিছতে বিজেপিয়ে ৰাহুলৰ বিৰুদ্ধে এফ আই আৰ দাখিল কৰে ।

দুয়োখন সদনৰ কাৰ্যবিধিৰ ওপৰত এক দৃষ্টি-

সংবিধানৰ ৭৫ বছৰীয়া জয়ন্তী উপলক্ষে সংসদৰ দুয়োখন সদনত দুদিনীয়া আলোচনাত সকলো দলৰ জ্যেষ্ঠ নেতাৰ সৈতে প্ৰধানমন্ত্ৰীয়ে অংশগ্ৰহণ কৰে । আলোচনাৰ সময়ত দুয়োপক্ষই ইজনে সিজনৰ বিৰুদ্ধে গুৰুতৰ অভিযোগ উত্থাপন কৰে । সংবিধানৰ প্ৰস্তাৱনা, ৭৫ বছৰৰ কৃতিত্ব আৰু প্ৰত্যাহ্বান আৰু অভাৱৰ ওপৰত এজনো বক্তাই মতামত ৰখা নাছিল । বিৰোধীয়ে চৰকাৰক সংবিধান দুৰ্বল কৰাৰ অভিযোগ উত্থাপন কৰাৰ বিপৰীতে শাসকীয় দলে কংগ্ৰেছৰ কাৰ্যকালত সংঘটিত হোৱা ভুল আৰু অতিমাত্ৰাক আলোকপাত কৰে ।

ৰাজ্যসভাত অধ্যক্ষ জগদীপ ধনখড়ৰ বিৰুদ্ধে উত্থাপন কৰা হৈছে অনাস্থা প্ৰস্তাৱ । বিৰোধীয়ে উচ্চ সদনত এই সন্দৰ্ভত জাননী দিছে । বিৰোধী দলসমূহে মঙলবাৰে উপ ৰাষ্ট্ৰপতি জগদীপ ধনখড়ৰ বিৰুদ্ধে অনাস্থা প্ৰস্তাৱ উত্থাপন কৰাৰ বাবে অনুচ্ছেদ ৬৭বিৰ অধীনত জাননী দিছিল । জাননীখন ৰাজ্যসভাৰ মহাসচিব পি চি মোদীক হস্তান্তৰ কৰা হৈছে । ইয়াৰ পূৰ্বে, সোমবাৰে উপ-ৰাষ্ট্ৰপতি জগদীপ ধনখড় আৰু বিৰোধী দলসমূহৰ নেতাসকলৰ মাজত সংঘৰ্ষ শীৰ্ষত উপনীত হয় । সংঘৰ্ষৰ পিছত, বিৰোধীয়ে ধনখড়ক তেওঁৰ কাৰ্যকালৰ পৰা আঁতৰাবলৈ অনাস্থা প্ৰস্তাৱ উত্থাপন কৰাৰ সিদ্ধান্ত লয় ।

সূত্ৰ অনুসৰি, কংগ্ৰেছ, আৰ জে ডি, টি এম চি, চি পি আই, চি পি আই-এম, জে এম এম, আপ, ডি এম কে-কে ধৰি প্ৰায় ৬০ জন বিৰোধী সাংসদে জাননীখনত স্বাক্ষৰ কৰিছে । বিৰোধী দল আৰু ৰাজ্যসভাৰ অধ্যক্ষৰ মাজত চলি থকা অচলাৱস্থাৰ পৰিপ্ৰেক্ষিতত কংগ্ৰেছৰ নেতৃত্বত জাননীখন আহিছিল । উপ ৰাষ্ট্ৰপতিৰ অপসাৰণৰ বাবে এটা প্ৰস্তাৱ উত্থাপন কৰিবলৈ নিম্নতম প্ৰয়োজনীয় ভোটৰ সংখ্যা হৈছে ৫০ ।

প্ৰকৃততে, বিৰোধী বহুতো বিষয়ত ধনখৰৰ ওপৰত ক্ষোভিত । শেহতীয়াকৈ তেওঁ শাসকীয় দলৰ সদস্যসকলক উচ্চ সদনত কংগ্ৰেছ-ছৰোছ সম্পৰ্কৰ বিষয়টো উত্থাপন কৰিবলৈ অনুমতি দিছিল । কংগ্ৰেছৰ সাংসদ দিগ্বিজয় সিঙে ৰাজ্যসভাৰ অধ্যক্ষক পক্ষপাতদুষ্ট বুলি অভিযোগ কৰিছিল । চলিত বৰ্ষৰ আগষ্ট মাহৰ আৰম্ভণিতে, বিৰোধী মিত্ৰজোঁটৰ দলসমূহে উপ ৰাষ্ট্ৰপতিক তেওঁৰ পদৰ পৰা অপসাৰণৰ বাবে এক প্ৰস্তাৱ উত্থাপন কৰাৰ বাবে জাননী দিয়াৰ কথা বিবেচনা কৰিছিল । 

সংবিধানৰ অনুচ্ছেদ ৬৭ (খ) অনুসৰি, ৰাজ্যসভাৰ তদানীন্তন সকলো সদস্যৰ সংখ্যাগৰিষ্ঠতাৰ দ্বাৰা ৰাজ্যসভাৰ দ্বাৰা গৃহীত এক প্ৰস্তাৱৰ দ্বাৰা উপ-ৰাষ্ট্ৰপতিক তেওঁৰ কাৰ্যালয়ৰ পৰা আঁতৰ কৰিব পাৰি । ইয়াৰ উপৰিও, লোকসভাৰ সেউজ সংকেতো পাব লাগে ।