দক্ষিণ প্ৰশান্ত মহাসাগৰৰ এখন দ্বীপ ৰাষ্ট্ৰ ভানুআটুত মঙলবাৰে (১৭ ডিচেম্বৰ) পুৱা প্ৰায় ৭:১৫ বজাত ৭.৩ প্ৰাবল্যৰ ভূমিকম্পই দেশখনত ব্যাপক ধ্বংসলীলাৰ সৃষ্টি কৰে । ভানুআটুৰ মূল দ্বীপ এফাটেৰ পৰা ৩০ কিলোমিটাৰ দূৰত্বত ৫৭ কিলোমিটাৰ গভীৰতাত ভূমিকম্পৰ কেন্দ্ৰবিন্দু আছিল । এই ভূমিকম্পৰ ফলত এতিয়ালৈকে ভানুআটুত ১৪ জন লোকে প্ৰাণ হেৰুৱাইছে আৰু শতাধিক লোক আহত হৈছে ।
আমেৰিকাৰ ভূতাত্ত্বিক জৰীপৰ তথ্য অনুসৰি প্ৰাৰম্ভিক ভূমিকম্পৰ পিছতো অঞ্চলটোত কেইবাটাও আফটাৰশ্বক অনুভৱ হৈছে । ইয়াৰ ভিতৰত বুধবাৰে (১৮ ডিচেম্বৰ) পুৱা ৫.৫ মাত্ৰাৰ কম্পনো আছিল । স্থানীয় আৰক্ষীয়ে জনোৱা মতে, ভানুআটুত ‘জৰুৰীকালীন অৱস্থা’ জাৰি কৰা হৈছে, যাতে মানুহৰ চলাচলত বাধা আৰোপ কৰিব পৰা যায় ।
অষ্ট্ৰেলিয়াৰ ডি এফ এ টি বিভাগে কি ক’লে ?
অষ্ট্ৰেলিয়াৰ বৈদেশিক পৰিক্ৰমা আৰু বাণিজ্য বিভাগে কয় যে তেওঁলোকে অঞ্চলটোৰ কেইবাজনো অষ্ট্ৰেলিয়ানৰ বিষয়ে অৱগত । ইফালে বৈদেশিক মন্ত্ৰী পেনি ৱঙে মঙলবাৰে নিশা (১৭ ডিচেম্বৰ) এক বিবৃতিত কয় যে ভানুআটুত ভূমিকম্পৰ ফলত ব্যাপক ক্ষতি হৈছে আৰু বুধবাৰে অষ্ট্ৰেলিয়াই সাহায্য সামগ্ৰী প্ৰেৰণ কৰিব ।
অষ্ট্ৰেলিয়াৰ এক নিউজ নেটৱৰ্কে প্ৰকাশ কৰা অনুসৰি ৰাষ্ট্ৰসংঘৰ মানৱীয় কাৰ্যালয়ে জনোৱা মতে, প’ৰ্ট ভিলাৰ বিমানবন্দৰ আৰু বন্দৰলৈ যোৱা পথসমূহ ক্ষতিগ্ৰস্ত হৈছে, যাৰ ফলত সাহায্যৰ প্ৰচেষ্টাত বাধা আহিব পাৰে ।
