বৰ্ডাৰ-গাভাস্কাৰ ট্ৰফী ২০২৪-২৫ এতিয়া এক ৰোমাঞ্চকৰ পৰ্যায়ত উপনীত হৈছে । ভাৰত আৰু অষ্ট্ৰেলিয়াৰ মাজত চলি থকা পাঁচখনীয়া খেলৰ টেষ্ট শৃংখলাত তিনিখন টেষ্ট খেলা হৈছে । গাব্বা টেষ্ট ড্ৰ’ হোৱাৰ পাছত এতিয়া ১-১ ব্যৱধানত সমতাত আছে এই শৃংখলা । এতিয়া এই টেষ্ট ছিৰিজত আৰু দুখন মেচ বাকী আছে । মেল’বৰ্ণ ক্ৰিকেট খেলপথাৰত অনুষ্ঠিত হ’ব চতুৰ্থখন টেষ্ট মেচ । বিশ্ব টেষ্ট চেম্পিয়নশ্বিপৰ ফাইনেলত প্ৰৱেশৰ আশা জীয়াই ৰাখিবলৈ ভাৰতে এই টেষ্ট মেচত জয়লাভ কৰাটো গুৰুত্বপূৰ্ণ । যাৰ বাবে ভাৰতীয় দলটো মেলবৰ্ণলৈ ৰাওনা হৈছে ।
ব্রিছবেনৰ পৰা মেলবৰ্ণলৈ ৰাওনা টিম ইণ্ডিয়া-
১৯ ডিচেম্বৰত টিম ইণ্ডিয়াই নিজৰ হোটেলৰ পৰা বাছেৰে বিমানবন্দৰলৈ ৰাওনা হয় । য’ৰ পৰা ভাৰতীয় দলটো মেলবৰ্ণলৈ ৰাওনা হয় । ২৬ ডিচেম্বৰৰ পৰা ৩০ ডিচেম্বৰলৈ মেল’বৰ্ণ ক্ৰিকেট খেলপথাৰত অনুষ্ঠিত হ’ব ভাৰত আৰু অষ্ট্ৰেলিয়াৰ চতুৰ্থখন টেষ্ট মেচ ।
উল্লেখ্য যে মেল’বৰ্ণ ক্ৰিকেট খেলপথাৰক ক্ৰিকেটৰ ঐতিহাসিক খেলপথাৰ হিচাপে গণ্য কৰা হয় । এই পিটছে বেগী বলাৰসকলক প্ৰাৰম্ভিক সহায় কৰে যদিও সময়ৰ লগে লগে বেটছমেনসকলৰ বাবে অনুকূল হৈ পৰে । অৱশ্যে ইয়াত স্পীনাৰসকলৰ বাবে বিশেষ একো নাই ।
বিশ্ব টেষ্ট চেম্পিয়নশ্বিপৰ ফাইনেলৰ বাবে মেলবৰ্ণ টেষ্ট গুৰুত্বপূৰ্ণ-
গব্বা টেষ্টৰ ড্ৰ’ হোৱাৰ লগে লগে ভাৰতৰ স্থান বিশ্ব টেষ্ট চেম্পিয়নশ্বিপৰ পইণ্ট টেবুলত অৱনমিত হৈছে । এতিয়া ভাৰতৰ WTC ফাইনেলত প্ৰৱেশৰ সম্ভাৱনা অতি কম । ভাৰতে এতিয়া আগন্তুক দুয়োখন টেষ্ট মেচতে জয়লাভ কৰিব লাগিব, তেতিয়াহে ফাইনেলৰ দৌৰত থাকিব পাৰিব ।
দুয়োখন মেচত জয়ী হোৱাঃ বাকী দুয়োখন মেচত যদি ভাৰতে জয়লাভ কৰে তেন্তে ১৩৮ পইণ্ট আৰু ৬০.৫২% পইণ্ট শতাংশৰে ফাইনেললৈ যোগ্যতা অৰ্জন কৰিব । ইয়াৰ ফলত অষ্ট্ৰেলিয়া চূড়ান্ত দৌৰৰ পৰা বাহিৰ হ’ব ।
এখনত জয় আৰু এখন ড্র: যদি ভাৰত এখন মেচত জয়ী হয় আৰু এখন ড্ৰ’ হয় তেন্তে পইণ্ট হ’ব ৫৭.০১% আৰু মুঠ পইণ্ট হ’ব ১৩০ । এনে পৰিস্থিতিত অষ্ট্ৰেলিয়াই শ্ৰীলংকাক ২-০ ব্যৱধানত পৰাস্ত কৰিব লাগিব ।
২-২ ব্যৱধানত ছিৰিজ ড্ৰ’ হ’লেঃ ২-২ ব্যৱধানত ছিৰিজ শেষ হ’লে ভাৰতে ১২৬ পইণ্ট আৰু ৫৫.২৬% পইণ্ট লাভ কৰিব । এনে পৰিস্থিতিত অষ্ট্ৰেলিয়াই শ্ৰীলংকাৰ বিৰুদ্ধে জয়লাভ কৰি ভাৰতক অতিক্ৰম কৰিব পাৰে ।
