বৰ্তমান দক্ষিণ কোৰিয়াত ৰাজনৈতিক অস্থিৰতা দেখা গৈছে । সামৰিক আইন জাপি দিয়াৰ ঘোষণা আৰু তাৰ পিছত সিদ্ধান্ত বাতিল কৰাৰ পিছত কেৱল বিৰোধীৰ সন্মুখীন হোৱাই নহয় জনসাধাৰণৰো ক্ষোভৰ সন্মুখীন হ’বলগীয়া হৈছে দেশখনৰ ৰাষ্ট্ৰপতি । এনে পৰিস্থিতিত কেৱল বিৰোধীয়েই নহয় তেওঁৰ মন্ত্ৰীসভাৰ বহু সদস্যই বিদ্ৰোহী সুৰ লৈছে । বহুতে পদত্যাগ কৰিছে । ৰাষ্ট্ৰপতিৰ বিৰুদ্ধেও ওলমি আছে মহাঅভিযোগৰ তৰোৱাল ।
দক্ষিণ কোৰিয়াৰ সংবাদ সংস্থা য়নহাপে প্ৰকাশ কৰা অনুসৰি ৰাষ্ট্ৰপতি ইউন চুক ইয়লৰ মুখ্য কৰ্মচাৰীকে ধৰি কেইবাজনো শীৰ্ষ সহায়কে পদত্যাগ কৰিছে । কোৱা হৈছে যে ১২ গৰাকী কেবিনেট মন্ত্ৰীয়ে পদত্যাগ দাখিল কৰিছে । আন বহু শীৰ্ষ নেতাইয়ো পদত্যাগ কৰাৰ প্ৰস্তাৱ দিছে ।
কেৱল বিৰোধীয়েই নহয় মন্ত্ৰীসভাৰ বহু নেতাই সামৰিক আইনৰ সিদ্ধান্তৰ বিৰোধিতা কৰিছে । তেওঁৰ দল পিপল পাৱাৰ পাৰ্টিৰ জ্যেষ্ঠ নেতা হান ডং হুনে মূল বিৰোধী নেতা লি জে-ম্যুঙৰ সৈতে হাত মিলাই এই সিদ্ধান্তক ভুল বুলি অভিহিত কৰিছে ।
ৰাষ্ট্ৰপতিৰ বিৰুদ্ধে মহাঅভিযোগ দাখিল কৰাৰ দাবীত ৰাজপথত ৰেলী উলিওৱা হৈছে । তেওঁৰ বিৰুদ্ধে দুৰ্নীতি আৰু ক্ষমতাৰ অপব্যৱহাৰৰ অভিযোগ উত্থাপন হৈছে ।
ৰাষ্ট্ৰপতিৰ বিৰুদ্ধে মহাঅভিযোগ দাখিলৰ দাবী-
ৰাষ্ট্ৰপতিৰ ঘোষণা আৰু তাৰ পিছত সেই সিদ্ধান্ত বাতিলে তেওঁলৈ বিপদ কঢ়িয়াই অনা যেন পৰিলক্ষি হৈছে । কোৱা হৈছে যে সংসদত ৰাষ্ট্ৰপতিৰ বিৰুদ্ধে মহাঅভিযোগ দাখিল কৰা হ’ব পাৰে । ৰাষ্ট্ৰীয় সংসদৰ দুই তৃতীয়াংশতকৈ অধিক সাংসদে যদি ইয়াৰ সপক্ষে ভোট দিয়ে, তেন্তে তেওঁৰ বিৰুদ্ধে মহাঅভিযোগ দাখিল কৰিব পৰা যাব । উল্লেখ্য যে ৰাষ্ট্ৰপতিৰ পিপল পাৱাৰ পাৰ্টিৰ ৰাষ্ট্ৰীয় বিধানসভাত ৩০০ জন সাংসদৰ ভিতৰত ১০৮ জন সাংসদ আছে ।
ৰাষ্ট্ৰপতিলৈ বিৰোধীৰ চৰম সীমা-
দক্ষিণ কোৰিয়াৰ বিৰোধী দলে ৰাষ্ট্ৰপতি য়ুক চৰম সীমা দিছে যে যদি তেওঁ শীঘ্ৰেই ৰাষ্ট্ৰপতি পদৰ পৰা পদত্যাগ নকৰে তেন্তে তেওঁৰ বিৰুদ্ধে মহাভিযোগ দাখিল কৰা হ’ব ।
ৰাষ্ট্ৰীয় সংসদৰ দুই তৃতীয়াংশতকৈ অধিক সাংসদে যদি ইয়াৰ সপক্ষে ভোট দিয়ে, তেন্তে তেওঁৰ বিৰুদ্ধে মহাঅভিযোগ দাখিল কৰিব পৰা যাব । মহাঅভিযোগ দাখিলৰ প্ৰস্তাৱ সাংবিধানিক আদালতত দাখিল কৰা হ’ব । যদিহে ৯ জন ন্যায়াধীশৰ ভিতৰত কমেও ৬জনে অনুমোদন দিয়ে, তেন্তে পৰৱৰ্তী প্ৰক্ৰিয়া আৰম্ভ কৰা হ’ব । এই সময়ছোৱাত চূড়ান্ত সিদ্ধান্ত নোলোৱালৈকে ৰাষ্ট্ৰপতিয়ে নিজৰ ক্ষমতা ব্যৱহাৰ কৰাত নিষেধাজ্ঞা আৰোপ কৰা হ’ব । এই সময়ছোৱাত প্ৰধানমন্ত্ৰীয়ে অন্তৱৰ্তীকালীন নেতা হিচাপে কাম চোৱাচিতা কৰিব । মহাঅভিযোগ দাখিলৰ ৬০ দিনৰ ভিতৰত নিৰ্বাচন অনুষ্ঠিত কৰিব লাগিব ।
ইফালে বৰ্তমান দক্ষিণ কোৰিয়াত প্ৰায় ৩০ হাজাৰ আমেৰিকান সৈনিক নিয়োজিত হৈ আছে । এনে পৰিস্থিতিত আমেৰিকাই কয় যে আমি এই সমগ্ৰ ঘটনাটোৰ ওপৰত চকু ৰাখিছো । আমি কোনো কাৰণতে সামৰিক আইন সমৰ্থন নকৰো ।
