বিশ্বৰ সকলো প্ৰান্তত সুৰক্ষিত থাকিব লাগিব হিন্দু, বাংলাদেশী সংখ্যালঘুৰ সুৰক্ষাৰ দাবীত গৰজি উঠিল আমছু । বাংলাদেশৰ শেহতীয়া পৰিস্থিতিক লৈ আজি সৰৱ হৈ উঠিল আমছু । লগতে বৰ্তমানৰ বাংলাদেশৰ পৰিস্থিতি তথা হিন্দুৰ ওপৰত হোৱা আক্ৰমণৰ বিষয়ত দেশখনৰ সহকাৰী আয়ুক্তলৈ স্মাৰক পত্ৰ প্ৰদান কৰে আমছুৱে ।
দেশখনত সংখ্যালঘু তথা হিন্দুসকলৰ ওপৰত হোৱা অত্যাচাৰক তীব্ৰ গৰিহণা দিয়ে আমছু নেতৃত্বই । তেওঁলোকে কয় যে, ‘বাংলাদেশৰ অন্তৱৰ্তীকালীন চৰকাৰ হোৱাৰ পৰাই বিপদত সংখ্যালঘু’ । লগতে বাংলাদেশ চৰকাৰে হিন্দু তথা সংখ্যালঘুসকলক নিৰাপত্তা প্ৰদানৰ দাবী জনায় আমছুৱে ।
আমছুৰ সভাপতি ৰেজাউল কৰিম সৰকাৰে বাংলাদেশী সংখ্যালঘুৰ সকলো সুবিধাৰ ব্যৱস্থা কৰাৰ বাবে মহম্মদ ইউনুছ চৰকাৰক দাবী জনায় । লগতে তেওঁ বাংলাদেশী সংখ্যালঘুৰ স্বাৰ্থত প্ৰধানমন্ত্ৰী নৰেন্দ্ৰ মোদীয়ে প্ৰত্যক্ষ হস্তক্ষেপ কৰাৰ বাবেও দাবী উত্থাপন কৰে । তেওঁ কয় যে, ‘বাংলাদেশী সংখ্যালঘুৰ নিৰাপত্তাৰ বাবে ব্যৱস্থা লওক ভাৰতৰ প্ৰধানমন্ত্ৰীয়ে । বিশ্বৰ যিকোনো দেশতে যি সংখ্যালঘুৱেই নহওক নিৰাপত্তা পাব লাগে । আমি যেনেকৈ ইয়াত সংখ্যালঘু, বিশ্বৰ বিভিন্ন প্ৰান্তত তেনেকৈ বিভিন্ন সংখ্যালঘু আছে ।‘
ইফালে সংখ্যালঘুক নিৰাপত্তা নিদিলে জংগী আন্দোলনৰো হুংকাৰ দিয়ে আমছুৱে । তেওঁলোকে কয় যে, ‘বিশ্বৰ যি প্ৰান্ততে অস্থিৰ পৰিবেশ হয়, মানৱ জাতিয়ে তাতেই মাত মাতিব লাগে । আমি সচেতন নাগৰিক হিচাপে, ভাৰতবাসী হিচাপে এই সম্পৰ্কত মাত মাতিছো । অসমৰ দৰে বাংলাদেশতো সকলো জাতি-জনগোষ্ঠী নিৰাপদ হৈ থাকক । বিশ্বৰ সকলো দেশত সুৰক্ষিত থাকিব লাগিব সংখ্যালঘু ।’
