সমগ্ৰ দেশতে উদযাপন কৰা হৈছে  সংবিধান দিৱসঃ দেশবাসীক অভিনন্দন জ্ঞাপন প্ৰধানমন্ত্ৰী মোদীৰ

আজি সমগ্ৰ দেশতে উদযাপন কৰা হৈছে  সংবিধান দিৱস । প্ৰধানমন্ত্ৰী মোদীয়ে এই দিৱস উপলক্ষে ভাৰতৰ সকলো নাগৰিককে অভিনন্দন জ্ঞাপন কৰিছে । প্ৰধানমন্ত্ৰী মোদীয়ে ছ’চিয়েল মিডিয়া প্লেটফৰ্ম ‘এক্স’ত এটা পোষ্ট কৰিছে । পোষ্টত তেওঁ লিখিছে, ‘ভাৰতীয় সংবিধানৰ ৭৫ সংখ্যক বাৰ্ষিকী উপলক্ষে সকলো নাগৰিকক আন্তৰিক শুভেচ্ছা জনাইছো ।’  উল্লেখ্য যে ১৯৪৯ চনৰ আজিৰ দিনটোতে ভাৰতৰ সংবিধান গৃহীত হৈছিল । এই বছৰ সংবিধান গৃহীত হোৱাৰ ৭৫ বছৰ সম্পূৰ্ণ হৈছে ।

উচ্চতম ন্যায়ালয়তো অনুষ্ঠিত হ’ব কাৰ্যসূচী-

সংবিধান দিৱস উপলক্ষে বৰ্তমান সংবিধান সদন বুলি কোৱা পুৰণি সংসদ ভৱনৰ কেন্দ্ৰীয় প্ৰেক্ষাগৃহত মূল অনুষ্ঠানৰ আয়োজন কৰা হৈছে । এই অনুষ্ঠানত ৰাষ্ট্ৰপতি, উপ-ৰাষ্ট্ৰপতি, প্ৰধানমন্ত্ৰী, লোকসভাৰ অধ্যক্ষ, কেন্দ্ৰীয় মন্ত্ৰী, সংসদৰ সদস্যকে ধৰি অন্যান্য বিশিষ্ট ব্যক্তিসকল উপস্থিত থাকিব । ভাৰতৰ সংবিধান গৃহীত হোৱাৰ ৭৫ বছৰ সম্পূৰ্ণ হোৱা উপলক্ষে প্ৰধানমন্ত্ৰী মোদীয়ে সন্ধিয়া প্ৰায় ৫ বজাত উচ্চতম ন্যায়ালয়ৰ প্ৰশাসনিক ভৱন কমপ্লেক্সৰ প্ৰেক্ষাগৃহত সংবিধান দিৱস উদযাপনত অংশগ্ৰহণ কৰিব । তেওঁ ভাৰতীয় ন্যায়পালিকাৰ বাৰ্ষিক প্ৰতিবেদন (২০২৩-২৪) প্ৰকাশ কৰিব । এই উপলক্ষে তেওঁ উপস্থিত থকা সমাৱেশতো ভাষণ দিব । উচচতম ন্যায়ালয়ৰ উদ্যোগত এই কাৰ্যসূচীৰ আয়োজন কৰা হৈছে । এই অনুষ্ঠানত ভাৰতৰ মুখ্য ন্যায়াধীশৰ লগতে উচ্চতম ন্যায়ালয়ৰ অন্যান্য ন্যায়াধীশসকলো উপস্থিত থাকিব ।

অমিত শ্বাহেও জনালে অভিনন্দন-

সংবিধান দিৱসত কেন্দ্ৰীয় গৃহমন্ত্ৰী অমিত শ্বাহে ৰাইজক শুভেচ্ছা জনাইছে । তেওঁ কয় যে ভাৰতৰ দৰে বিশাল দেশত গণতন্ত্ৰৰ শক্তি হৈছে ইয়াৰ সংবিধান, যিয়ে জাতীয় ঐক্য আৰু অখণ্ডতাৰ মন্ত্ৰ প্ৰদান কৰে । ১৯৪৯ চনৰ ২৬ নৱেম্বৰত সংসদৰ কেন্দ্ৰীয় প্ৰেক্ষাগৃহত সংবিধান সভাৰ দ্বাৰা গৃহীত হয় আৰু ১৯৫০ চনৰ ২৬ জানুৱাৰীত এই সংবিধান বলবৎ হয় । সংবিধান দিৱসত আন্তৰিক শুভেচ্ছা জ্ঞাপন কৰি শ্বাহে কয় যে আজি ভাৰতে পূৰ্ণ উৎসাহেৰে সংবিধানৰ ৭৫ বছৰীয়া জয়ন্তী উদযাপন কৰিছে ।

তেওঁ ‘এক্স’ত লিখিছে, “বাবাছাহেব ভীমৰাও আম্বেদকাৰ জীকে ধৰি সংবিধানৰ সকলো শিল্পীৰ অৱদানৰ স্মৃতিত, (প্ৰধানমন্ত্ৰী নৰেন্দ্ৰ) মোদী জীয়ে ‘সংবিধান দিৱস’ উদযাপন কৰিবলৈ আৰম্ভ কৰে । ভাৰতৰ দৰে বিশাল দেশৰ গণতন্ত্ৰৰ শক্তি হৈছে আমাৰ সংবিধান, যিয়ে প্ৰতিজন ব্যক্তিৰ ন্যায় আৰু সম অধিকাৰ সুনিশ্চিত কৰি জাতীয় ঐক্য আৰু অখণ্ডতাৰ মন্ত্ৰ প্ৰদান কৰে । আমি বিশ্বাস কৰোঁ যে সংবিধান কেৱল মঞ্চত দেখুৱাবলগীয়া কিতাপ নহয়, ইয়াক সম্পূৰ্ণ ভক্তিৰে আত্মসাৎ কৰি জনজীৱনত আমাৰ সৰ্বোচ্চ অৱদান আগবঢ়োৱাৰ চাবিকাঠি । আহক ! এই সংবিধান দিৱসত শক্তিশালী, সমৃদ্ধিশালী আৰু স্বাৱলম্বী ভাৰত গঢ়ি তোলাৰ প্ৰতিশ্ৰুতি লওক ।”