বৰ্তমান শিৰোনামত আছে নীতিশ কুমাৰ ৰেড্ডী । কিয়নো ভাৰত আৰু অষ্ট্ৰেলিয়াৰ মাজত অনুষ্ঠিত পাঁচখনীয়া খেলৰ টেষ্ট শৃংখলাৰ চতুৰ্থখন মেচত তেওঁ মেলবৰ্ণত ভাৰতীয় দলৰ বাবে সংকটমোচকৰ ৰূপত অৱতীৰ্ণ হৈছে । মেচখনৰ তৃতীয় দিনা (২৮ ডিচেম্বৰ) দলৰ প্ৰথম ইনিংছত অল ৰাউণ্ডাৰ নীতিশ ৰেড্ডীয়ে এক দুৰ্দান্ত শতক অৰ্জন কৰে । তেওঁৰ টেষ্ট কেৰিয়াৰৰ এই শতকটো বিশেষ কাৰণ যেতিয়া তেওঁ ক্ৰীজলৈ আহিছিল তেতিয়া ভাৰত ফ’ল’ অ’নৰ ভাবুকিৰ সন্মুখীন হৈছিল । কিন্তু তেওঁৰ ইনিংছে এই ভাবুকি দূৰ কৰাত সহায় কৰে । অতি সাধাৰণ পৰিয়ালৰ পৰা অহা নীতিশ ৰেড্ডীৰ নেট ৱৰ্থ তথা মুঠ সম্পত্তিৰ কথা ক’বলৈ গ’লে সেয়া কোটি টকাত আছে । আনহাতে তেওঁৰ হাতত দামী গাড়ী আৰু বাইকৰো এক বৃহৎ সংগ্ৰহ আছে ।
মেলবৰ্ণত টিম ইণ্ডিয়াৰ নায়ক-
অষ্ট্ৰেলিয়াৰ মেলবৰ্ণত টিম ইণ্ডিয়াৰ নায়ক হিচাপে পৰিগণিত হোৱা নীতিশ কুমাৰ ৰেড্ডীৰ জন্ম হৈছিল ২০০৩ চনৰ ২৬ মে’ত অন্ধ্ৰ প্ৰদেশৰ বিশাখাপট্টনমত । পিতৃয়ে হিন্দুস্তান জিংক কোম্পানীত কাম কৰিছিল যদিও পুত্ৰৰ সপোন আছিল আৰম্ভণিৰে পৰাই ক্ৰিকেটাৰ হোৱা, যিটো পূৰণ কৰিবলৈ তেওঁ আনকি চাকৰি এৰি আহিছিল আৰু পিতৃ আৰু কঠোৰ পৰিশ্ৰমৰ সহায়ত নীতিশ ৰেড্ডীয়ে আন্তঃৰাষ্ট্ৰীয় ক্ৰিকেটত আত্মপ্ৰকাশ কৰিছিল । এতিয়া তেওঁ প্ৰথম টেষ্ট অভিষেক ঘটায়ে নিজৰ শক্তিশালী প্ৰদৰ্শনেৰে উজ্জলি উঠিবলৈ সক্ষম হৈছে ।
নীতিশৰ সম্পত্তি-
সাধাৰণ পৰিয়ালত জন্মগ্ৰহণ কৰা নীতিশ কুমাৰ ৰেড্ডীয়ে প্ৰথম অৱস্থাত আৰ্থিক অসুবিধাৰ সন্মুখীন হ’বলগীয়া হ’লেও আজি তেওঁৰ হাতত কোটি কোটি মূল্যৰ সম্পত্তি আছে । টিম ইণ্ডিয়াৰ হৈ সকলো ফৰ্মেটতে উজ্জ্বল প্ৰদৰ্শন আগবঢ়োৱা নীতিশ ৰেড্ডীয়ে আই পি এলৰ পৰাও উপাৰ্জন কৰিছে কোটি কোটি টকা । খবৰ অনুসৰি নীতিশ ৰেড্ডী নেট ৱৰ্থ ৮ কোটি টকাতকৈও অধিক (আনুমানিক)।
২০২৩ চনত তেওঁ আই পি এলত প্ৰৱেশ কৰিছিল আৰু ছানৰাইজাৰ্ছ হায়দৰাবাদে তেওঁক ২০ লাখ টকাত ক্ৰয় কৰিছিল যদিও ২০২৫ চনৰ আই পি এলত তেওঁৰ দলটোৱে তেওঁক ৬ কোটি টকাৰ বিপুল পৰিমাণৰ বিনিময়ত ৰিটেইন কৰে ।
বিলাসী গাড়ী আৰু বাইকৰ সংগ্ৰহ-
নীতিশ কুমাৰ ৰেড্ডী গাড়ী আৰু বাইকৰ প্ৰতি অতি আকৰ্ষিত আৰু তেওঁৰ সংগ্ৰহো আচৰিত । খবৰ অনুসৰি তেওঁৰ সংগ্ৰহত টয়োটা হাইৰাইডাৰ আৰু অন্যান্য গাড়ীও আছে । ইয়াৰ উপৰিও তেওঁৰ বাইক সংগ্ৰহত আছে BMW G 310 GS আৰু Jawa 42 ।
