শিৱসেনা (UBT)ৰ মুৰব্বী উদ্ধৱ থাকৰেই মঙলবাৰে নাগপুৰৰ বিধান ভৱনত থকা কক্ষত মহাৰাষ্ট্ৰৰ মুখ্যমন্ত্ৰী দেৱেন্দ্ৰ ফাড়নৱীছক সাক্ষাৎ কৰে । এই বৈঠকত উদ্ধৱ থাকৰেৰ সৈতে শিৱসেনাৰ (ইউ বি টি)ৰ বিধায়ক আদিত্য থাকৰে, অনিল পৰব আৰু বৰুণ সৰদেশাই উপস্থিত থাকে । উল্লেখ্য যে উদ্ধৱ থাকৰেই ৰাজ্যিক বিধানসভাৰ চলি থকা শীতকালীন অধিৱেশনত অংশগ্ৰহণ কৰিবলৈ মঙলবাৰে নাগপুৰত উপস্থিত হয় । য’ত তেওঁ সন্ধিয়া শিৱসেনা (ইউ বি টি) বিধানসভা দলৰ বৈঠকতো অংশগ্ৰহণ কৰিব ।
ফাড়নৱিছক সাক্ষাতৰ পিছত কি ক’লে আদিত্যই-
শিৱসেনাৰ নেতা আদিত্য থাকৰে মুখ্যমন্ত্ৰী দেৱেন্দ্ৰ ফাড়নৱিছক সাক্ষাৎ কৰি কয় আজি আমাৰ দলৰ মুৰব্বী উদ্ধৱ থাকৰে মুখ্যমন্ত্ৰী দেৱেন্দ্ৰ ফাড়নৱিছ আৰু বিধানসভাৰ অধ্যক্ষ ৰাহুল নাৰ্ভেকাৰক সাক্ষাৎ কৰে । এয়া এটা পদক্ষেপ আগবাঢ়িছে ।
তেওঁ কয় যে মহাৰাষ্ট্ৰ চৰকাৰৰ হৈ কাম কৰাৰ সময়ত দুয়ো (শাসক দল আৰু বিৰোধীয়ে) ৰাজনৈতিক পৰিপক্কতা দেখুৱাই দেশ আৰু ৰাজ্যৰ স্বাৰ্থত একেলগে কাম কৰিব লাগে । ইয়াৰ সমান্তৰালকৈ আদিত্য থাকৰেই কয় যে বৈঠকৰ সময়ত বিৰোধী দলৰ নেতাৰ পদৰ ওপৰত কোনো আলোচনা হোৱা নাছিল ।
উল্লেখ্য যে ২০ নৱেম্বৰত অনুষ্ঠিত নিৰ্বাচনত মহা বিকাশ আঘাড়ীৰ তিনিটা দলে ১০ শতাংশ আসন লাভ কৰিব নোৱাৰাৰ বাবে ১৫ সংখ্যক বিধানসভাত বিৰোধীৰ কোনো নেতা নাই । শিৱসেনাই (ইউ বি টি) ২০, কংগ্ৰেছে ১৬ আৰু এন চি পি (এছ পি) ১০ খন আসন লাভ কৰে । উল্লেখযোগ্য যে মহাৰাষ্ট্ৰ বিধানসভাৰ নিৰ্বাচনত বিজেপি, শিৱসেনা আৰু এন চি পিৰ মহাযুটী মিত্ৰজোঁটে ২৮৮খন আসনৰ ভিতৰত ২৩০খন আসন লাভ কৰাৰ বিপৰীতে বিৰোধী দল মহা বিকাশ আঘাড়ী মাত্ৰ ৪৬খন আসনত সীমাবদ্ধ আছিল ।
উদ্ধৱৰ আক্ৰমণ-
ইয়াৰ পূৰ্বে নাগপুৰ পোৱাৰ লগে লগে উদ্ধৱ থাকৰেই মহাৰাষ্ট্ৰ চৰকাৰৰ ওপৰত তীব্ৰ আক্ৰমণ কৰে । সাংবাদিকৰ সৈতে বাৰ্তালাপৰ সময়ত তেওঁ ৰাজ্য চৰকাৰৰ পৰা ‘এক দেশ, এক নিৰ্বাচন’ বিধেয়ক কাৰ্যকৰী কৰাৰ পূৰ্বে এক স্বচ্ছ নিৰ্বাচনী প্ৰক্ৰিয়া গঢ়ি তুলিবলৈ দাবী জনায় । তেওঁ আৰু কয় যে নিৰ্বাচন আয়ুক্তৰ বাছনিও নিৰ্বাচনৰ জৰিয়তে কৰিব লাগে । অৱশ্যে এই কাম কেনেকৈ কৰিব পাৰি সেই বিষয়ে তেওঁ উল্লেখ কৰা নাছিল ।
