মহাৰাষ্ট্ৰৰ নতুন মুখ্যমন্ত্ৰীৰ শপত গ্ৰহণৰ প্ৰস্তুতি সম্পূৰ্ণ হৈছে । আজি ৫ ডিচেম্বৰ, ২০২৪ তাৰিখে দেৱেন্দ্ৰ ফাড়নৱিছে ৰাজ্যখনৰ নতুন মুখ্যমন্ত্ৰী হিচাপে শপত গ্ৰহণ কৰিব । মুম্বাইৰ ঐতিহাসিক আজাদ ময়দানত অনুষ্ঠিত হ’ব শপতগ্ৰহণ অনুষ্ঠান, য’ত ইতিমধ্যে কটকটীয়া কৰি তোলা হৈছে নিৰাপত্তাৰ ব্যৱস্থা ।
মহাৰাষ্ট্ৰৰ ২১ সংখ্যক মুখ্যমন্ত্ৰী হিচাবে আজি শপত ল’ব দেৱেন্দ্ৰ ফাড়নৱিছে । বাছ ষ্টপেজ আৰু থিয়েটাৰকে ধৰি বিভিন্ন ৰাজহুৱা স্থানত লাইভ সম্প্ৰচাৰ কৰা হ’ব শপত গ্ৰহণ অনুষ্ঠানৰ । এই স্থানসমূহত ইতিমধ্যে এল ই ডি স্ক্ৰীণ স্থাপন কৰা হৈছে । এই কার্যসূচীত মহাযুটী মিত্রজোঁটৰ কেইবাহাজাৰ কাৰ্যকৰ্তা আৰু সমর্থকে অংশগ্রহণ কৰাৰ সম্ভাৱনা আছে ৷
উল্লেখ্য যে, তৃতীয়বাৰৰ বাবে মহাৰাষ্ট্ৰ্ৰৰ মুখ্যমন্ত্ৰী হিচাবে দায়িত্ব গ্ৰহণ কৰিব ফাড়নৱিছে । সন্ধিয়া ৫.৩০ বজাত মুম্বাইৰ আজাদ ময়দানত শপত গ্ৰহণ কৰিব তেওঁ । ফাড়নৱিছৰ লগতে অজিত পাৱাৰেও উপ মুখ্যমন্ত্ৰী হিচাপে শপত গ্ৰহণ কৰিব । একনাথ শ্বিণ্ডেই উপ মুখ্যমন্ত্ৰী হিচাপে শপত ল’ব পাৰে যদিও এতিয়ালৈকে এই বিষয়ে স্পষ্ট হোৱা নাই । প্ৰধানমন্ত্ৰী নৰেন্দ্ৰ মোদী, গৃহমন্ত্ৰী অমিত শ্বাহৰ লগতে বিহাৰৰ মুখ্যমন্ত্ৰী নীতিশ কুমাৰ আৰু অন্ধ্ৰপ্ৰদেশৰ মুখ্যমন্ত্ৰী চন্দ্ৰবাবু নাইডুৱেও এই কাৰ্যসূচীত অংশগ্ৰহণ কৰিব ।
আজাদ ময়দানত কটকটীয়া নিৰাপত্তা-
শপতগ্ৰহণ অনুষ্ঠানত প্ৰধানমন্ত্ৰী নৰেন্দ্ৰ মোদীকে ধৰি সকলো ভি আই পি আৰু ১৫খন ৰাজ্যৰ মুখ্যমন্ত্ৰীসকলৰ আগমনৰ বাবে কটকটীয়া নিৰাপত্তাৰ ব্যৱস্থা কৰা হৈছে । আজাদ ময়দানৰ আশে-পাশে থকা অঞ্চলত ড্ৰ’নৰ দৰে বস্তু নিষিদ্ধ কৰা হৈছে । কেৱল এয়াই নহয়, আজাদ ময়দানত আয়োজন কৰা শপত গ্ৰহণ অনুষ্ঠানত কেৱল নিৰ্ধাৰিত পাছৰ জৰিয়তেহে প্ৰৱেশৰ অনুমতি দিয়া হ’ব । ইয়াৰ সমান্তৰালকৈ যাতায়তৰ দিশটো কিছু নিষেধাজ্ঞা কাৰ্যকৰী কৰা হৈছে । মুম্বাই আৰক্ষীয়ে শপতগ্ৰহণৰ বাবে অহা লোকসকলক ৰাজহুৱা পৰিবহণেৰে আহিবলৈ অনুৰোধ জনাইছে যাতে পাৰ্কিঙৰ কোনো সমস্যা নহয় । ইয়াৰ পিছত বন্ধ কৰি দিয়া হৈছে কিছুমান ডাঙৰ ডাঙৰ পথ । যাত্ৰীসকলৰ বাবে বিকল্প পথৰ ব্যৱস্থা কৰিছে যান-বাহন আৰক্ষীয়ে ।
