মহাকাশত ভ্ৰমণ কৰাটো ক্ৰমান্বয়ে সহজ হৈ পৰিছে । শেহতীয়াকৈ বিশ্বৰ প্ৰথমটো বাণিজ্যিক মহাকাশ অভিযান আৰম্ভ কৰা হৈছিল যিটো অতি সফল হৈছিল । বৰ্তমান আমেৰিকাৰ মহাকাশ সংস্থা আৰু অংশীদাৰ সংস্থাসমূহে যৌথভাৱে নিৰ্মাণ কৰা আন্তঃৰাষ্ট্ৰীয় মহাকাশ কেন্দ্ৰটোৱেই হৈছে মহাকাশত উপস্থিত একমাত্ৰ মহাকাশ কেন্দ্ৰ । কিন্তু ২০৩০ চনৰ ভিতৰত ইয়াক ডি-অৰ্বিট কৰা হ’ব । কিন্তু কথাটো ইয়াতেই শেষ নহয় । এতিয়া বিশ্বৰ বহু কোম্পানীয়ে নতুন মহাকাশ কেন্দ্ৰ নিৰ্মাণৰ বাবে প্ৰস্তুতি চলাইছে । তেনে এটা নাম হৈছে VAST Aerospace Company যিয়ে অতি সোনকালে নিজৰ বাণিজ্যিক আৰু বিলাসী মহাকাশ ষ্টেচন Haven-1 নিৰ্মাণৰ বাবে সাজু হৈছে ।
এইটো হ’ব বিশ্বৰ প্ৰথমটো বাণিজ্যিক মহাকাশ কেন্দ্ৰ, অৰ্থাৎ সাধাৰণ মানুহেও ইয়াত থাকি মহাকাশৰ অভিজ্ঞতা লাভ কৰিব পাৰিব । VAST হৈছে এটা ব্যক্তিগত মহাকাশ কোম্পানী, যিয়ে ২০২৫ চনত নিজৰ মহাকাশ ষ্টেচন হেভেন-১ মুকলি কৰাৰ দাবী কৰিছে । প্ৰেছ বিজ্ঞপ্তিৰ জৰিয়তেও কোম্পানীটোৱে নিজৰ ডিজাইন দাঙি ধৰিছে । কোম্পানীটোৱে নিজৰ এক্স হেণ্ডেলত মহাকাশ কেন্দ্ৰটোৰ চূড়ান্ত ডিজাইনো শ্বেয়াৰ কৰিছে ।
ভিতৰৰ পৰা VAST ৰ এই মহাকাশ কেন্দ্ৰটো অতি বিলাসী, যাৰ তিনিটা ভিডিঅ’ কোম্পানীটোৱে মুকলি কৰিছে । দেখাত এখন বিলাসী হোটেল যেন লাগে । সংবাদ মাধ্যমৰ বাতৰি অনুসৰি ইলন মাস্কৰ কোম্পানী স্পেচএক্সৰ সহযোগত এই মহাকাশ কেন্দ্ৰটো উৎক্ষেপণ কৰা হ’ব । ইয়াৰ উৎক্ষেপণৰ বাবে ব্যৱহাৰ কৰা হ’ব স্পেচএক্সৰ ফেলকন-৯ ৰকেট । কোৱা হৈছে যে প্ৰথম অভিযানত ৪ জন মহাকাশচাৰীয়ে অংশগ্ৰহণ কৰিব আৰু তেওঁলোকে ৩০ দিন হেভেন-১ৰ ভিতৰত সময় কটাব ।
উপলব্ধ তথ্য অনুসৰি মহাকাশ কেন্দ্ৰটোৰ দৈৰ্ঘ্য ১০.১ মিটাৰ আৰু প্ৰস্থ ৩.৮ মিটাৰ হ’ব । মহাকাশ কেন্দ্ৰটোত এটা ডেক নিৰ্মাণ কৰা হ’ব য’ত খিৰিকীৰে পৃথিৱীৰ এক দৰ্শনীয় দৃশ্য দেখা যাব । ইয়াত যাত্ৰীসকলে আৰামত শুব পাৰিব আৰু কম মাধ্যাকৰ্ষণ শক্তিতো কোনো সমস্যাৰ সন্মুখীন নহ’ব ।
ইয়াৰ ভিতৰত ফিটনেছ চিষ্টেম অৰ্থাৎ জিমো থাকিব । ইয়াৰ লগতে মনোৰঞ্জন ব্যৱস্থাৰে সজ্জিত ব্যক্তিগত কোঠাও নিৰ্মাণ কৰা হ’ব । এই মহাকাশ কেন্দ্ৰৰ অভ্যন্তৰীণ ডিজাইন প্ৰস্তুত কৰাত নাছাৰ মহাকাশচাৰী এণ্ড্ৰু ফ্যুষ্টেলে গুৰুত্বপূৰ্ণ ভূমিকা পালন কৰিছে । ইয়াৰ ভিডিঅ’টো ছ’চিয়েল মিডিয়াত যথেষ্ট ভাইৰেল হৈ পৰিছে ।
