ৰাছিয়াৰ প্ৰতিৰক্ষা মন্ত্ৰী আন্দ্ৰেই বেলুছ’ভে ভাৰতৰ প্ৰতিৰক্ষা মন্ত্ৰী ৰাজনাথ সিঙৰ সৈতে ফোনযোগে বাৰ্তালাপ কৰে । ৰাছিয়াৰ প্ৰতিৰক্ষা মন্ত্ৰালয়ে এক বিবৃতিত এই তথ্য প্ৰদান কৰিছে । মন্ত্ৰালয়ে কয় যে ৰাছিয়া আৰু ভাৰতৰ মাজত পাৰস্পৰিক সন্মানৰ ওপৰত ভিত্তি কৰি শক্তিশালী আৰু দীৰ্ঘদিনীয়া বন্ধুত্ব আছে । দুয়োখন দেশৰ নেতাৰ মাজত নিৰ্ভৰযোগ্য দ্বিপাক্ষিক সম্পৰ্ক সুদৃঢ় কৰাৰ ক্ষেত্ৰত আলোচনা হয় ।
জুলাই মাহত মস্কোত ৰাষ্ট্ৰপতি ভ্লাদিমিৰ পুটিন আৰু প্ৰধানমন্ত্ৰী নৰেন্দ্ৰ মোদীৰ বৈঠক আৰু অক্টোবৰ মাহত কাজানত অনুষ্ঠিত হোৱা ব্ৰিকছ সন্মিলনৰ আঁৰত হোৱা বৈঠকৰ ফলত বিশেষ কৌশলগত অংশীদাৰিত্ব গভীৰ হৈ পৰিছে, য’ত প্ৰতিৰক্ষাকো অন্তৰ্ভুক্ত কৰা হৈছে বুলি মন্ত্ৰালয়ে প্ৰকাশ কৰিছে । বিবৃতিটোত বেলুছ’ভৰ উদ্ধৃতি দি কোৱা হৈছে যে, “আমি যিবোৰ চুক্তি হৈছে সেই সকলোবোৰ উচ্চতম পৰ্যায়ত কাৰ্যকৰী কৰিবলৈ প্ৰতিশ্ৰুতিবদ্ধ ।”
বিবৃতি অনুসৰি ৰাছিয়াৰ প্ৰতিৰক্ষা মন্ত্ৰীয়ে কয় যে ৰাছিয়া আৰু ভাৰতৰ মাজত সামৰিক সহযোগিতা বহুপক্ষীয় ৰূপত বিশেষকৈ চাংহাই সহযোগিতা সংস্থা (এছ চি অ’) আৰু এ ডি এম এম প্লাছৰ অধীনত চলি আছে । তেওঁলোকৰ আলোচনাই দুয়োখন দেশৰ মাজত প্ৰতিৰক্ষা আৰু নিৰাপত্তা সম্পৰ্ক আৰু অধিক শক্তিশালী কৰিব বুলি আস্থা প্ৰকাশ কৰে বেলুছভে ।
ৰাছিয়াৰ প্ৰতিৰক্ষা মন্ত্ৰালয়ে আৰু কয়, ভাৰতৰ প্ৰতিৰক্ষা মন্ত্ৰীয়ে এই সময়ছোৱাত কয় যে ভাৰতৰ ওপৰত বহু ধৰণৰ ৰাজহুৱা আৰু ব্যক্তিগত হেঁচা আছে । কিন্তু ভাৰতে সিদ্ধান্ত লৈছে যে ৰাছিয়াৰ সৈতে ঘনিষ্ঠ সম্পৰ্ক অটুট ৰখাই নহয়, এই সম্পৰ্কসমূহো গভীৰ আৰু সম্প্ৰসাৰিত কৰিব । আমি সদায় আমাৰ ৰাছিয়ান সতীৰ্থসকলৰ লগত থাকিম । তেওঁ লগতে কয় যে জি-২০, ব্ৰিকছ আৰু এছ চি অ’ৰ দৰে বহুপক্ষীয় মঞ্চত দুয়োখন দেশৰ মাজত সহযোগিতা বৃদ্ধি পাইছে । ৰাজনাথ সিঙে কয়, আমাৰ সম্পৰ্ক পূৰ্ণ গতিৰে আগবাঢ়িছে ।
