কিছুদিন আগলৈকে বিশ্ব টেষ্ট চেম্পিয়নশ্বিপ ২০২৫ৰ পইণ্ট টেবুল একপক্ষীয় যেন লাগিছিল । আন দলসমূহৰ তুলনাত ভাৰতৰ ভাল অগ্ৰগতি আছিল যদিও নিউজীলেণ্ডৰ বিৰুদ্ধে দুখন মেচত টিম ইণ্ডিয়া পৰাস্ত হোৱাৰ পিছত ফাইনেলৰ সকলো সমীকৰণ সলনি হৈছে । এতিয়া ফাইনেলৰ বাবে দুটা বা তিনিটা নহয়, পাঁচটা দলৰ মাজত হৈছে প্ৰত্যক্ষ প্ৰতিযোগিতা । বিশ্ব টেষ্ট চেম্পিয়নশ্বিপ তালিকাত এতিয়া প্ৰতিটো দলে কিমান পইণ্ট অৰ্জন কৰিব পাৰে জানি লওক ।
পাঁচটা দল কোন কোন ?
-বৰ্তমান বিশ্ব টেষ্ট চেম্পিয়নশ্বিপৰ তালিকাত শীৰ্ষত আছে ভাৰত, যাৰ পইণ্ট শতাংশ হৈছে ৬২.৮২ । চলিত টেষ্ট চেম্পিয়নশ্বিপৰ সূচীত এতিয়াও টিম ইণ্ডিয়াই আৰু ৬ খন খেল খেলিব লাগিব । যদি ভাৰতীয় দলে ফাইনেলত স্থান নিশ্চিত কৰিব লগা হয় তেন্তে ৬খন মেচত কমেও চাৰিটা জয় পঞ্জীয়ন কৰিব লাগিব । এতিয়া বাকী মেচসমূহৰ পাছত ভাৰতৰ সৰ্বোচ্চ পইণ্ট শতাংশ হ’ব পাৰে ৭৪.৫৬ ।
-বৰ্তমান ৬২.৫০ পইণ্ট শতাংশৰে দ্বিতীয় স্থানত আছে অষ্ট্ৰেলিয়া । যদি কেংগাৰু দলে সকলো মেচতে জয়ী হয় তেন্তে ই শীৰ্ষত উপনীত হ’ব পাৰে, কাৰণ ইয়াৰ সৰ্বোচ্চ পইণ্টৰ শতাংশ ৭৬.৩২ লৈকে যাব পাৰে । বৰ্তমান অষ্ট্ৰেলিয়াই ঘৰুৱা ক্ষেত্ৰত ভাৰতৰ বিৰুদ্ধে পাঁচখন খেলৰ বৰ্ডাৰ-গাভাস্কাৰ ট্ৰফী খেলিব লাগিব । ইয়াৰ উপৰিও শ্ৰীলংকাৰ বিৰুদ্ধে ২ খন টেষ্ট মেচো আছে ।
-শেহতীয়াকৈ শ্ৰীলংকাই নিউজীলেণ্ডক ২-০ ব্যৱধানত পৰাস্ত কৰিছিল দুখনীয়া মেচৰ টেষ্ট শৃংখলাত । এই ছিৰিজৰ পিছত শ্ৰীলংকাৰ ফাইনেলৰ আশা বাঢ়িছে । বৰ্তমান শ্ৰীলংকা ৫৫.৫৬ পইণ্ট শতাংশৰে তৃতীয় স্থানত আছে আৰু সৰ্বোচ্চ ৬৯.২৩ পইণ্টলৈ উঠিব পাৰে । শ্ৰীলংকাই এতিয়াও দক্ষিণ আফ্ৰিকাৰ বিৰুদ্ধে এখন আৰু অষ্ট্ৰেলিয়াৰ বিৰুদ্ধে দুখন টেষ্ট খেলিব লাগিব ।
-কিছুদিন আগলৈকে নিউজীলেণ্ডো টেবুলৰ তলৰ স্থানত উপস্থিত আছিল যদিও ভাৰতৰ বিৰুদ্ধে দুখন মেচত জয়লাভ কৰাৰ পাছত কিৱি দলটো ফাইনেল খেলাৰ বাবে আশাবাদী । ডব্লিউ টি চিৰ ইতিহাসত প্ৰথমটো বিজয়ী দল নিউজীলেণ্ডৰ সৰ্বোচ্চ পইণ্ট শতাংশ ৬৪.২৯ লৈ বৃদ্ধি পাব পাৰে ।
-দক্ষিণ আফ্ৰিকাৰ বাবে ফাইনেলৰ পথ অতি কঠিন যেন লাগিছে কাৰণ খিতাপৰ সংঘৰ্ষলৈ যাবলৈ হ’লে বাকী থকা সকলো মেচতে জয়ী হ’ব লাগিব যদিও তাৰ পিছতো হয়তো আন দলৰ ওপৰত নিৰ্ভৰ কৰিব লাগিব । দক্ষিণ আফ্ৰিকাই এতিয়াও বাংলাদেশৰ বিৰুদ্ধে এখনকৈ আৰু পাকিস্তান আৰু শ্ৰীলংকাৰ বিৰুদ্ধে দুখনকৈ টেষ্ট মেচ খেলিব লাগিব ।
