সোমবাৰে কৰ্ণাটকৰ বেংগালুৰুস্থিত য়েলাহাংকা বায়ুসেনা ষ্টেচনত পঞ্চদশ সংস্কৰণৰ এৰো ইণ্ডিয়া উদ্বোধন কৰে প্ৰতিৰক্ষা মন্ত্ৰী ৰাজনাথ সিঙে । এই অনুষ্ঠানত তেওঁ কয় যে গুৰুত্বপূৰ্ণ আৰু আগশাৰীৰ প্ৰযুক্তিৰ সংগম ‘এৰো ইণ্ডিয়া-২০২৫’এ আজিৰ অনিশ্চয়তাৰ সৈতে মোকাবিলা কৰিবলৈ পাৰস্পৰিক সন্মান, পাৰস্পৰিক স্বাৰ্থ আৰু পাৰস্পৰিক লাভৰ ভিত্তিত সম বিচাৰধাৰাৰ দেশসমূহৰ মাজত সম্পৰ্ক অধিক শক্তিশালী কৰাৰ এক মঞ্চ প্ৰদান কৰিব ।
বিশ্বৰ আগত প্ৰযুক্তিগত উন্নতি প্ৰদৰ্শন-
‘এৰো ইণ্ডিয়া-২০২৫’এ দেশৰ ঔদ্যোগিক সামৰ্থ্য আৰু প্ৰযুক্তিগত অগ্ৰগতি বিশ্ববাসীৰ আগত প্ৰদৰ্শন কৰিব বুলি তেওঁ আস্থা প্ৰকাশ কৰে । ইয়াৰ উপৰিও বন্ধুত্বপূৰ্ণ দেশসমূহৰ সৈতে সহযোগিতামূলক সম্পৰ্ক আৰু অধিক শক্তিশালী কৰিব । তেওঁ কয় যে যেতিয়া ৰাষ্ট্ৰসমূহ একেলগে শক্তিশালী হ’ব আৰু উন্নত বিশ্ব ব্যৱস্থাৰ দিশত কাম কৰিব তেতিয়াহে স্থায়ী শান্তি লাভ কৰিব পৰা যাব ।
প্ৰতিৰক্ষা মন্ত্ৰীগৰাকীয়ে কয় যে পাঁচদিনীয়া এই অনুষ্ঠানত সমগ্ৰ বিশ্বৰ চৰকাৰী প্ৰতিনিধি, উদ্যোগ মুৰব্বী, বায়ুসেনাৰ বিষয়া, বিজ্ঞানী, প্ৰতিৰক্ষা বিশেষজ্ঞ, ষ্টাৰ্ট-আপ, শিক্ষাবিদ আৰু অন্যান্য অংশীদাৰসকলে অংশগ্ৰহণ কৰিব আৰু এই সংগমেৰে ভাৰতৰ অংশীদাৰসকলক সকলোৰে সুবিধাৰ বাবে অধিক ঘনিষ্ঠ কৰি তুলিব ।
তেওঁ কয় যে আমি প্ৰায়ে ক্ৰেতা আৰু বিক্ৰেতা হিচাপে যোগাযোগ ৰাখোঁ, য’ত আমাৰ সম্পৰ্ক লেনদেন পৰ্যায়ত থাকে । কিন্তু আন এটা স্তৰত আমি আমাৰ অংশীদাৰিত্বক ক্ৰেতা-বিক্ৰেতাৰ সম্পৰ্কৰ বাহিৰলৈ ঔদ্যোগিক সহযোগিতাৰ স্তৰলৈ লৈ যাওঁ । সম বিচাৰধাৰাৰ দেশৰ সৈতে সহ-উৎপাদন আৰু সহ-বিকাশৰ বহু সফল উদাহৰণ আমাৰ হাতত আছে ।
ভাৰতবৰ্ষই এক পৰিৱৰ্তনশীল পৰ্যায়ৰ মাজেৰে পাৰ হৈ গৈছে-
তেওঁ কয় যে ভাৰতে এক পৰিৱৰ্তনশীল পৰ্যায়ৰ মাজেৰে পাৰ হৈ গৈছে, দ্ৰুতগতিত উন্নয়নশীল ৰাষ্ট্ৰৰ পৰা উন্নত ৰাষ্ট্ৰলৈ আগবাঢ়িছে । প্ৰধানমন্ত্ৰী নৰেন্দ্ৰ মোদীৰ নেতৃত্বত চৰকাৰৰ এক সুদৃঢ়, স্থায়ী আৰু সুচিন্তিত কাঠামোৰ ফলত দেশত এক সজীৱ আৰু সমৃদ্ধিশালী প্ৰতিৰক্ষা উদ্যোগৰ পৰিৱেশ ব্যৱস্থাৰ সৃষ্টি হৈছে । পূৰ্বে ৰাষ্ট্ৰীয় অৰ্থনীতিৰ এক উপাদান হিচাপে দেখা নোপোৱা প্ৰতিৰক্ষা উদ্যোগ খণ্ড আজি সামগ্ৰিক অৰ্থনীতিৰ সৈতে সম্পূৰ্ণৰূপে একত্ৰিত হৈছে। এই খণ্ডটো এতিয়া মটৰৰ দৰে হৈ পৰিছে, ভাৰতীয় অৰ্থনীতিৰ বৃদ্ধিৰ ইঞ্জিনক শক্তি প্ৰদান কৰিছে ।
দেশতেই বহু সামগ্ৰী নিৰ্মাণ কৰা হৈছে-
যোৱা এৰো ইণ্ডিয়াৰ সাফল্যৰ কথা উল্লেখ কৰি তেওঁ কয় যে অস্ত্ৰ মিছাইল, নতুন প্ৰজন্মৰ আকাশ মিছাইল, অটনমাছ পানীৰ তলৰ বাহন, মানৱবিহীন জাহাজ, পিনাকা গাইডেড ৰকেট আদি বহু উচ্চ প্ৰযুক্তিৰ সামগ্ৰী থলুৱাভাৱে নিৰ্মাণ কৰা হৈছে । তেওঁ আগন্তুক সময়ত প্ৰতিৰক্ষা উৎপাদনৰ পৰিসংখ্যা ১.২৭ লাখ কোটি টকা আৰু প্ৰতিৰক্ষা ৰপ্তানিৰ পৰিসংখ্যা ২১ হাজাৰ কোটি টকা অতিক্ৰম কৰাৰ লগতে প্ৰতিৰক্ষা খণ্ড যাতে অভূতপূৰ্ব গতিৰে বৃদ্ধি পায় তাৰ বাবে চৰকাৰৰ অদম্য সংকল্প পুনৰবাৰ উল্লেখ কৰে ।
