অক্টোবৰ মাহত সামগ্ৰী আৰু সেৱা কৰ (জি এছ টি)ৰ মুঠ ৰাজহ সংগ্ৰহ ৯ শতাংশ বৃদ্ধি পাই ১.৮৭ লাখ কোটি টকা হৈছে, যিটো দ্বিতীয় সৰ্বাধিক মাহিলী পৰিসংখ্যা । ঘৰুৱা লেনদেনৰ পৰা অধিক ৰাজহ আৰু অনুপালনৰ উন্নতিৰ বাবে জি এছ টি (GST) সংগ্ৰহ বৃদ্ধি পাইছে । শুকুৰবাৰে প্ৰকাশ পোৱা চৰকাৰী তথ্য অনুসৰি অক্টোবৰ মাহত কেন্দ্ৰীয় জি এছ টি সংগ্ৰহ ৩৩,৮২১ কোটি, ৰাজ্যিক জি এছ টি ৪১,৮৬৪ কোটি, একীকৃত জি এছ টি ৯৯,১১১ কোটি আৰু উপকৰ ১২,৫৫০ কোটি টকা ।
যোৱা মাহত মুঠ জি এছ টিৰ মুঠ ৰাজহ ৮.৯ শতাংশ বৃদ্ধি পাই ১,৮৭,৩৪৬ কোটি টকা হৈছে । এবছৰৰ পূৰ্বৰ একে সময়ছোৱাত জি এছ টি সংগ্ৰহ আছিল ১.৭২ লাখ কোটি টকা ।
তথ্য অনুসৰি ঘৰুৱা লেনদেনৰ পৰা জি এছ টি সংগ্ৰহ ১০.৬ শতাংশ বৃদ্ধি পাই ১.৪২ লাখ কোটি টকা হৈছে । এই সময়ছোৱাত ২০২৪ চনৰ অক্টোবৰৰ ভিতৰত আমদানিৰ ওপৰত কৰ প্ৰায় চাৰি শতাংশ বৃদ্ধি পাই ৪৫,০৯৬ কোটি টকা হৈছে ।
অক্টোবৰ মাহত ১৯,৩০৬ কোটি টকাৰ ৰিফাণ্ড জাৰি কৰা হৈছিল, যিটো যোৱা বছৰৰ একে সময়ছোৱাৰ তুলনাত ১৮.২ শতাংশ বেছি । ৰিফাণ্ডৰ সালসলনি কৰাৰ পিছত শুদ্ধ জি এছ টি সংগ্ৰহ আঠ শতাংশ বৃদ্ধি পাই ১.৬৮ লাখ কোটি টকাৰো অধিক হয় ।
জি এছ টি সংগ্ৰহ বৃদ্ধিয়ে ভাৰতত শক্তিশালী ঘৰুৱা ব্যৱহাৰ আৰু সক্ৰিয় আমদানি কাৰ্যকলাপ সূচায়, যি দেশৰ বিত্তীয় স্বাস্থ্য আৰু অৰ্থনৈতিক পুনৰুদ্ধাৰত ইতিবাচক অৰিহণা যোগায় ।
২০১৭ চনৰ ১ জুলাইত ভাৰতত জি এছ টি প্ৰৱৰ্তন কৰা হৈছিল । জি এছ টি (Compensation to State) Act, 2017 অনুসৰি জি এছ টি ৰূপায়ণৰ ফলত হোৱা যিকোনো ৰাজহ ক্ষতিৰ ক্ষতিপূৰণ ৰাজ্যসমূহক পাঁচ বছৰৰ বাবে প্ৰদানৰ আশ্বাস দিয়া হৈছিল ।
জি এছ টি পৰিষদে, য’ত কেন্দ্ৰীয় বিত্ত মন্ত্ৰীক অধ্যক্ষ আৰু ৰাজ্যৰ বিত্ত মন্ত্ৰীসকলক সদস্য হিচাপে অন্তৰ্ভুক্ত কৰা হৈছে, জি এছ টি নিয়ন্ত্ৰণত এক গুৰুত্বপূৰ্ণ ভূমিকা পালন কৰে ।
