সংসদৰ শীতকালীন অধিৱেশনৰ প্ৰথম দিনা, সোমবাৰে লোকসভা আৰু ৰাজ্যসভাত প্ৰচণ্ড হুলস্থুলৰ সৃষ্টি হয় । দুয়োখন সদনত আমেৰিকাত আদানীৰ বিৰুদ্ধে উত্থাপিত অভিযোগ আৰু ইউ পিৰ সম্ভলত সংঘটিত হিংসাত্মক পৰিস্থিতিৰ ওপৰত আলোচনাৰ দাবী উত্থাপন কৰা হয় । ইয়াৰ মাজতে বিৰোধী সাংসদসকলে হুলস্থুলীয়া পৰিৱেশৰ সৃষ্টি কৰে । ইয়াৰ বাবে অৱশেষত দুয়োখন সদন বুধবাৰলৈকে স্থগিত ৰখা হয় ।
খবৰ অনুসৰি ৰাজ্যসভাত বিৰোধীয়ে মণিপুৰৰ হিংসা আৰু কেৰালাৰ ৱায়ানাদত সংঘটিত দুৰ্যোগ সন্দৰ্ভত স্থগিত ৰখাৰ প্ৰস্তাৱ দিছিল । কিন্তু এই বিষয়বোৰ আলোচনা কৰিব পৰা নগ’ল । ইফালে হিংসাৰ বিষয়টোক লৈ বিৰোধী সাংসদে বিজেপিক শলঠেকত পেলাই । এই সময়ছোৱাত সমাজবাদী পাৰ্টিৰ সাংসদ ধৰ্মেন্দ্ৰ যাদৱকে ধৰি আন একাংশ দলৰ সদস্যই উচ্চস্বৰে নিজৰ মতামত প্ৰকাশ কৰিবলৈ চেষ্টা কৰিছিল । ইয়াৰ মাজতে এছ পিৰ সভাপতি অখিলেশ যাদৱকো থিয় হৈ থকা দেখা গৈছিল । আন বিৰোধী দলৰ সদস্যসকলেও বিভিন্ন বিষয় উত্থাপন কৰিবলৈ চেষ্টা চলাইছিল । বিৰোধীৰ হুলস্থুলৰ বাবে দুয়োখন সদনতে শূন্য ঘন্টা আৰু প্ৰশ্নকাল অনুষ্ঠিত কৰিব পৰা নগ’ল ।
ৰাজ্যসভাত কি ক’লে বিৰোধী নেতাসকলে ?
ৰাজ্যসভাত বিৰোধী দলৰ নেতা মল্লিকাৰ্জুন খৰ্গে, ভাৰতীয় কমিউনিষ্ট পাৰ্টি-মাৰ্ক্সবাদী (চিপিআই-এম)ৰ জন ব্ৰিটাছ, কংগ্ৰেছৰ নীৰজ ডাংগী, প্ৰমোদ তিৱাৰী আৰু অখিলেশ প্ৰসাদ সিং আৰু আম আদমি পাৰ্টিৰ সঞ্জয় সিং আদিয়ে আদানী গ্ৰুপৰ বিৰুদ্ধে আমেৰিকাৰ অভিযুক্তসকলে দাখিল কৰা উৎকোচৰ অভিযোগ আলোচনাৰ দাবীত জাননী দিয়ে । আম আদমি পাৰ্টিৰ ৰাঘৱ চাদ্দাকে ধৰি বিৰোধী দলৰ আন একাংশ সদস্যই মণিপুৰ আৰু উত্তৰ প্ৰদেশৰ সম্ভলত হিংসাত্মক পৰিস্থিতিৰ বিষয়টোক লৈ জাননী দিছিল ।
এই সকলোবোৰ জাননী নাকচ কৰি অধ্যক্ষ ধনখৰে খৰ্গেক নিজৰ মতামত দাঙি ধৰাৰ সুযোগ দিয়ে । আদানী গ্ৰুপৰ বিৰুদ্ধে উত্থাপিত অভিযোগ গুৰুতৰ বুলি খৰ্গে কয় । তেওঁ কয় যে যদি তালিকাভুক্ত কাৰ্যক্ৰম স্থগিত ৰখা হয় তেন্তে বিৰোধী সদস্যসকলে বুজাব পাৰে যে এইটো এটা অতি গুৰুত্বপূৰ্ণ বিষয় আৰু ইয়াৰ প্ৰভাৱ সমগ্ৰ দেশক কেনেদৰে পৰিছে ।
তেওঁ অভিযোগ কৰে যে বিশ্ব পৰ্যায়ত দেশৰ ভাবমূৰ্তি কলংকিত হৈছে আৰু তথাপিও প্ৰধানমন্ত্ৰী নৰেন্দ্ৰ মোদীয়ে আদানীক সমৰ্থন কৰিছে । কিন্তু খাৰ্গে আন একো কোৱাৰ আগতেই অধ্যক্ষই কয় যে তেওঁ ইতিমধ্যে এই বিষয়ত দিয়া জাননী নাকচ কৰিছে সেয়েহে তেওঁলোকে ইয়াক উত্থাপন কৰিব নোৱাৰিব । ইয়াৰ পাছতে কংগ্ৰেছকে ধৰি আন বিৰোধী দলৰ সদস্যসকলে নিজৰ স্থানত থিয় হৈ খৰ্গেক কথা ক’বলৈ অনুমতি দিবলৈ দাবী জনাই থাকিল ।
