এডিলেইড টেষ্টত ভাৰতীয় দলৰ পৰাজয়ৰ দুখ অনুৰাগীয়ে নাপাহৰোতেই আন এক বেয়া খবৰ প্ৰকাশ পাইছে । মেচখনত বেগী বলাৰ মহম্মদ চিৰাজ আৰু অষ্ট্ৰেলিয়াৰ বেটছমেন ট্ৰেভিছ হেডৰ মাজত বাকযুদ্ধ দেখা গৈছিল । আন্তঃৰাষ্ট্ৰীয় ক্ৰিকেট পৰিষদ তথা আই চি চিয়ে এই যুঁজখনক লৈ বৃহৎ ব্যৱস্থা গ্ৰহণ কৰিছে । এডিলেইডত সংঘৰ্ষৰ পিছত দুয়োগৰাকী খেলুৱৈয়ে নিজৰ মৌনতা ভংগ কৰি ইজনে সিজনৰ বিৰুদ্ধে বক্তব্য প্ৰদান কৰে । ইয়াৰ পিছত এই বিষয়টোৱে গতি লাভ কৰে । এতিয়া এই সন্দৰ্ভত আই চি চিয়ে কঠোৰ ব্যৱস্থা গ্ৰহণ কৰিছে ।
ঘটনাটো কি-
এডিলেইড টেষ্টত ভাৰতীয় দলৰ সন্মুখত দেৱাল হৈ থিয় দিছিল ট্ৰেভিছ হেড । তেওঁ ভাৰতীয় বলাৰক বেটিং পৰাক্ৰমেৰে ব্যতিব্যস্ত কৰি তুলিছিল, য’ত ছিৰাজো অন্তৰ্ভুক্ত আছিল । হেডে চিৰাজক তীব্ৰ প্ৰহাৰ কৰিছিল । কিন্তু যেতিয়া মহম্মদ ছিৰাজে ট্ৰেভিছ হেডৰ উইকেট দখল কৰে তেতিয়া তেওঁক অতি আক্ৰমণাত্মক দেখা গৈছিল । দুয়োৰে মাজত বাকযুদ্ধৰ সৃষ্টি হয় । মেচৰ অন্তত ট্ৰেভিছ হেডে কয় যে তেওঁ চিৰাজৰ প্ৰশংসা কৰিছিল আৰু বেগী বলাৰজনে তেওঁৰ প্ৰতি বেয়া আচৰণ কৰিছিল । একে সময়তে ছিৰাজে হেডৰ বক্তব্য নাকচ কৰি হেডে তেওঁক গালি-গালাজ কৰা বুলি প্ৰকাশ কৰে । এতিয়া আই চি চিয়ে দুয়োজন খেলুৱৈক কঠোৰ শাস্তি বিহিছে ।
দুয়োজন খেলুৱৈয়ে শাস্তি পালে-
মহম্মদ চিৰাজৰ বিৰুদ্ধে কঠোৰ ব্যৱস্থা গ্ৰহণ কৰি আই চি চিয়ে তেওঁৰ মেচ মাচুলৰ ২০ শতাংশ জৰিমনা বিহিছে । কিন্তু ট্ৰেভিছ হেডৰ ওপৰত কোনো পেনাল্টি আৰোপ কৰা হোৱা নাই, বৰঞ্চ তেওঁক আই চি চিয়ে ১ ডেমিৰেট পইণ্ট দিছে । আই চি চিৰ আনুষ্ঠানিক বিবৃতিত কোৱা হৈছে যে, ‘চিৰাজ আৰু হেডক অনুশাসনমূলক ৰেকৰ্ডত ১-১ ডিমেৰিট পইণ্ট দিয়া হৈছে, যিটো যোৱা ২৪ মাহত তেওঁলোকৰ প্ৰথম অপৰাধ ।’
চিৰাজ আৰু হেডৰ ওপৰত কোনো মেচ নিষেধাজ্ঞা জাৰি কৰা হোৱা নাই । আই চি চিয়ে চিৰাজক আচৰণ বিধিৰ ২.৫ অনুচ্ছেদ উলংঘা কৰাৰ বাবে দোষী সাব্যস্ত কৰাৰ বিপৰীতে হেডৰ বিৰুদ্ধে আচৰণ বিধিৰ ২.১৩ অনুচ্ছেদ উলংঘা কৰি ব্যৱস্থা গ্ৰহণ কৰিছে । ভাৰতীয় দলটোৱে খেলখনত ১০ উইকেটত পৰাজয়ৰ সন্মুখীন হ’বলগীয়া হয় । এতিয়া পৰৱর্তী মেচত টিম ইণ্ডিয়াই কেনে প্রদর্শন কৰিব সেয়া লক্ষ্যণীয় হ’ব ।
