বিশ্বৰ সৰ্বাধিক দৰমহা পোৱা চি ই অ’ৰ (CEO) কথা যেতিয়াই কোৱা হয় তেতিয়াই সত্য নাডেলা, সুন্দৰ পিচাই আৰু ইলন মাস্কৰ দৰে ডাঙৰ ডাঙৰ নাম মানুহৰ মনলৈ প্ৰায়ে আহে । অৱশ্যে এই নামবোৰ আমি এতিয়া ক’বলৈ ওলোৱা ব্যক্তিজনৰ সন্মুখত সামান্য । আমি ভাৰতীয় মূলৰ জগদীপ সিঙৰ কথা কৈছোঁ । এইগৰাকী জগদীপ সিঙৰ বাৰ্ষিক দৰমহা ১৭,৫০০ কোটি টকা । অৰ্থাৎ এদিনতে প্ৰায় ৪৮ কোটি টকা উপাৰ্জন কৰে তেওঁ ।
কোন জগদীপ সিং ?
জগদীপ সিং এজন ভাৰতীয় মূলৰ উদ্যোগী যিয়ে ২০১০ চনত কোৱাণ্টামস্কেপ নামৰ এটা কোম্পানী প্ৰতিষ্ঠা কৰিছিল । এই কোম্পানীটোৱে বৈদ্যুতিক বাহন (EV)ৰ বাবে চলিড ষ্টেট বেটাৰীৰ কাম কৰে । তেওঁলোকৰ বেটাৰীয়ে বৈদ্যুতিক বাহন উদ্যোগত এক বৈপ্লৱিক পৰিৱৰ্তন আনিছে । চাৰ্জিং সময় হ্ৰাস কৰা আৰু শক্তিৰ কাৰ্যক্ষমতা বৃদ্ধি কৰাটোৱেই তেওঁলোকৰ বেটাৰীৰ আটাইতকৈ ডাঙৰ বৈশিষ্ট্য । উদ্ভাৱনৰ ক্ষেত্ৰত এনে অৱদানৰ বাবে তেওঁ বিশ্বব্যাপী স্বীকৃতি লাভ কৰিছিল ।
জগদীপ সিঙৰ শিক্ষা-
জগদীপ সিঙে ষ্টেনফৰ্ড বিশ্ববিদ্যালয়ৰ পৰা বি টেক আৰু কেলিফৰ্ণিয়া বিশ্ববিদ্যালয়ৰ পৰা এম বি এ ডিগ্ৰী লাভ কৰিছে । ইয়াৰ পিছত তেওঁ বহুতো ডাঙৰ ডাঙৰ নামী কোম্পানীত কাম কৰাৰ লগতে নিজাকৈ কোম্পানী আৰম্ভ কৰে । তেওঁৰ কঠোৰ পৰিশ্ৰম আৰু দৃষ্টিভংগীয়ে কোৱাণ্টামস্কেপক কেৱল এটা সফল ব্যৱসায় নহয়, প্ৰযুক্তি উদ্ভাৱনৰ এক নতুন সংজ্ঞাও কৰি তোলে ।
ইমান বৃহৎ দৰমহা কেনেকৈ লাভ কৰে ?
জগদীপ সিঙৰ কোম্পানী কোৱাণ্টামস্কেপ ২০২০ চনত আমেৰিকাৰ শ্বেয়াৰ বজাৰত তালিকাভুক্ত হৈছিল । বিনিয়োগকাৰীৰ প্ৰবল সমৰ্থনৰ বাবে কোম্পানীটোৰ মূল্য তীব্ৰভাৱে বৃদ্ধি পায় । সিঙৰ দৰমহা পেকেজত ২.৩ বিলিয়ন ডলাৰৰ শ্বেয়াৰ অন্তৰ্ভুক্ত কৰা হৈছিল, যাৰ ফলত তেওঁৰ বাৰ্ষিক আয় প্ৰায় ১৭,৫০০ কোটি টকা হৈছে । এই দৰমহাই তেওঁক উদ্যোগটোৰ ভিতৰতে সৰ্বাধিক দৰমহা পোৱা লোকৰ ভিতৰত এজন কৰি তোলাই নহয়, তেওঁ কৰা কামৰ উৎকৃষ্টতাও প্ৰকাশ কৰে ।
২০২৪ চনত চিইঅ’ পদৰ পৰা পদত্যাগ-
কিন্তু ২০২৪ চনৰ ফেব্ৰুৱাৰী মাহত জগদীপ সিঙে কোৱাণ্টামস্কেপৰ চি ই অ’ পদৰ পৰা পদত্যাগ কৰে । তেওঁ কোম্পানীটোৰ দায়িত্ব শিৱ শিৱৰামৰ হাতত অৰ্পণ কৰে । অৱশ্যে এই সিদ্ধান্তৰ পিছতো তেওঁৰ যাত্ৰা বন্ধ নহ’ল । বৰ্তমান তেওঁ এটা ‘ষ্টীল্থ ষ্টাৰ্টআপ’ৰ চি ই অ’ হিচাপে কাম কৰি আছে আৰু ভৱিষ্যতৰ প্ৰযুক্তিৰ ওপৰত কাম কৰি আছে ।
এক নতুন যাত্ৰা আৰু নতুন প্ৰত্যাহ্বান-
জগদীপ সিঙৰ সৈতে জড়িত তথ্য তেওঁৰ ছ’চিয়েল মিডিয়া একাউণ্ট (@startupjag)ত উপলব্ধ । ইয়াত পোৱা তথ্য অনুসৰি তেওঁ পুনৰবাৰ এনে প্ৰকল্পৰ কাম কৰি আছে যিয়ে ভৱিষ্যতে ডাঙৰ পৰিৱৰ্তন আনিব পাৰে। তেওঁৰ নতুন ষ্টাৰ্টআপটো এতিয়াও গোপন, কিন্তু তেওঁৰ অতীতৰ কাম আৰু দৃষ্টিভংগীলৈ চালে স্পষ্ট যে তেওঁৰ পৰৱৰ্তী পদক্ষেপটোও চমৎকাৰ হ’ব ।
