বলীউডৰ পৰা এটা দুখৰ খবৰ আহিছে। প্ৰবীণ অভিনেতা মনোজ কুমাৰৰ দেহাৱসান।মুম্বাইৰ কোকিলাবেন ধীৰুভাই আম্বানী চিকিৎসালয়ত ৮৭ বছৰ বয়সত শেষ নিশ্বাস ত্যাগ কৰে প্ৰবীণ অভিনেতা গৰাকীয়ে।
কিছুদিন ধৰি অসুস্থ হৈ আছিল তেওঁ । মনোজ কুমাৰৰে চলচ্চিত্ৰ জীৱনত বহু দেশপ্ৰেমমূলক চিনেমা কৰিছিল।সেইবাবেই অনুৰাগীসকলে মৰমেৰে তেওঁক ‘ভাৰত কুমাৰ’ বুলি অভিহিত কৰিছিল।
মনোজ কুমাৰৰ প্ৰকৃত নাম আছিল হৰিকৃষ্ণ গিৰি গোস্বামী।১৯৩৭ চনৰ ২৪ জুলাইত জন্মগ্ৰহণ কৰা মনোজ কুমাৰে নিজৰ আদৰ্শ দিলীপ কুমাৰৰ সন্মানত নিজৰ পৰ্দাৰ নামটো ৰাখিছিল ।
মনোজ কুমাৰৰ মৃত্যুৰ খবৰে সমগ্ৰ বলিউডতে শোকৰ ছাঁ পেলোৱাৰ লগতে চলচ্চিত্ৰ অনুৰাগীসকলকো মৰ্মাহত কৰিছে।
উল্লেখ্য যে, ভাৰতীয় চলচ্চিত্ৰ জগতখনলৈ আগবঢ়োৱা অৱদানৰ বাবে তেওঁক পদ্মশ্ৰী সন্মানেৰে সন্মানিত কৰা হৈছিল। তাৰোপৰি তেওঁ আছিল সন্মানীয় দাদাচাহেব ফাল্কে বঁটা বিজয়ীও।
ভাৰতীয় চিনেমাই পৰিৱৰ্তনৰ এক পৰ্যায়ৰ মাজেৰে পাৰ হৈ যোৱাৰ সময়ত তেওঁৰ চিনেমা যাত্ৰা আৰম্ভ হৈছিল।মনোজ কুমাৰে কেৱল অভিনয়ৰ দক্ষতাৰে নহয়, চিনেমাত দেশপ্ৰেম আৰু সামাজিক চেতনাক সজীৱ কৰি তোলাৰ সামৰ্থ্যৰে নিজকে বিশিষ্ট কৰি তুলিছিল।
১৯৫৭ চনত ফেশ্বন ছবিৰ জৰিয়তে মনোজ কুমাৰে অভিনয় জীৱন আৰম্ভ কৰিছিল যদিও তেওঁৰ কেৰিয়াৰৰ প্ৰকৃত টাৰ্নিং পইণ্ট আহিছিল ১৯৬৫ চনত শ্বহীদ ছবিখন মুক্তি পোৱাৰ লগে লগে।
এই ছবিখনে তেওঁক এক নতুন পৰিচয় দিলে আৰু ইয়াৰ পৰাই তেওঁৰ যাত্ৰা ছুপাৰষ্টাৰ হোৱাৰ দিশত আগবাঢ়িল।ইয়াৰ পিছত তেওঁ কেতিয়াও পিছলৈ ঘূৰি চাব লগা হোৱা নাই।
মনোজ কুমাৰৰ ছবি কেৱল বক্স অফিচত হিট হোৱাই নহয়, তেওঁৰ গীতসমূহো দৰ্শকৰ মাজত জনপ্ৰিয় হৈ পৰিছিল।উপকাৰ ছবিৰ পৰা তেওঁৰ বিখ্যাত গীত ‘মেৰে দেশ কি ধৰ্তি সোনা উগলে’ আজিও দেশপ্ৰেমৰ অনুভূতি জগাই তোলা এক প্ৰতীকত পৰিণত হৈছে।
এনেধৰণৰ গীত আৰু কাহিনী মানুহৰ অন্তৰত আজিও সজীৱ হৈ আছে।মনোজ কুমাৰৰ মৃত্যুত শোকস্তব্ধ দেশবাসী ।
