আজি ভুৱনেশ্বৰত ১৮ সংখ্যক প্ৰবাসী ভাৰতীয় দিৱস সন্মিলন উদ্বোধন কৰিব প্ৰধানমন্ত্ৰী মোদীয়ে । তেওঁ ভাৰতৰ বিশ্বব্যাপী সংযোগৰ ক্ৰমবৰ্ধমান গুৰুত্ব আৰু দেশৰ ভৱিষ্যত গঢ় দিয়াত প্ৰৱাসীসকলৰ ভূমিকা সম্পৰ্কে বক্তব্য আগবঢ়াব । ১০ জানুৱাৰীত ৰাষ্ট্ৰপতি দ্ৰৌপদী মুৰ্মুৱে কাৰ্যসূচীৰ সামৰণি অধিৱেশনৰ সভাপতিত্ব কৰিব । এই সন্মিলনত অংশগ্ৰহণৰ বাবে ৫০খনতকৈও অধিক দেশৰ পৰা বৃহৎ সংখ্যক প্ৰৱাসী ভাৰতীয়ই পঞ্জীয়ন কৰিছে ।
প্ৰৱাসী ভাৰতীয় এক্সপ্ৰেছৰ ফ্লেগ অফ কৰিব প্ৰধানমন্ত্ৰীয়ে-
ইয়াৰ লগতে এদিনীয়া ভ্ৰমণৰ সময়ত মোদীয়ে প্ৰৱাসী ভাৰতীয় এক্সপ্ৰেছৰ ফ্লেগ অফ কৰিব । এইখন প্ৰৱাসী ভাৰতীয়ৰ বাবে বিশেষ পৰ্যটন ৰে’ল, যিখন ৰে’ল দিল্লীৰ নিজামুদ্দিনৰ পৰা যাত্ৰা কৰি তিনি সপ্তাহৰ বাবে পৰ্যটন আৰু ধৰ্মীয় গুৰুত্বপূৰ্ণ কেইবাটাও স্থান ভ্ৰমণ কৰিব ।
উল্লেখ্য যে, এয়া ভাৰত চৰকাৰৰ এটা ডাঙৰ অনুষ্ঠান, য’ত প্ৰৱাসী ভাৰতীয়সকলক সংযোগ কৰি ইজনে সিজনৰ লগত যোগাযোগৰ বাবে সক্ষম কৰিবলৈ এক মঞ্চৰ ব্যৱস্থা কৰা হৈছে । ইয়াৰ বিষয়বস্তু হৈছে উন্নত ভাৰতত প্ৰবাসী ভাৰতীয়সকলৰ অৱদান ।
৭০খন দেশৰ ৩ হাজাৰ প্ৰবাসী ভাৰতীয়ই অংশগ্ৰহণ কৰিব-
৭০ খনতকৈও অধিক দেশৰ পৰা প্ৰায় ৩ হাজাৰ প্ৰৱাসী ভাৰতীয় (এন আৰ আই) লোকে অংশগ্ৰহণ কৰিব, যিয়ে ভাৰতৰ অৰ্থনৈতিক, সাংস্কৃতিক আৰু পৰ্যটন উন্নয়নত তেওঁলোকৰ অৱদানৰ বিষয়ে আলোচনা কৰিব । ইয়াৰ ভিতৰত উন্নত ভাৰতৰ দৃষ্টিভংগীও অন্তৰ্ভুক্ত হ’ব । ট্ৰিনিদাদ আৰু ট’বাগোৰ ৰাষ্ট্ৰপতি ক্ৰীষ্টিন কাৰ্লা কাংগালু এই সন্মিলনৰ মুখ্য অতিথি । ভাৰ্চুৱেলভাৱে তেওঁ এই সন্মিলনত ভাষণ দিব ।
উল্লেখ্য যে ওড়িশাত প্ৰথমবাৰৰ বাবে প্ৰবাসী ভাৰতীয় দিৱসৰ আয়োজন কৰা হৈছে । এই কাৰ্যসূচীত প্ৰধানমন্ত্ৰী মোদীকে ধৰি বহু কেন্দ্ৰীয় মন্ত্ৰীয়ে অংশগ্ৰহণ কৰিব । ইয়াত সাংস্কৃতিক অনুষ্ঠানৰো আয়োজন কৰা হৈছে ।
