ৰাজ্যসভাত সংবিধান সন্দৰ্ভত আলোচনাৰ অন্তিম দিনটোত গৃহমন্ত্ৰী অমিত শ্বাহে কংগ্ৰেছক তীব্ৰ সমালোচনা কৰে । ইয়াৰ মাজতে তেওঁ ইউনিফৰ্ম চিভিল কোড (UCC)ৰ বিষয়তো কংগ্ৰেছক তীব্ৰ আক্ৰমণ কৰে । ইউনিফৰ্ম চিভিল কোড (ইউ চি চি) আৰু মুছলিম পাৰ্চনেল ল’ সন্দৰ্ভত গৃহমন্ত্ৰীয়ে কয় যে কংগ্ৰেছে স্পষ্ট কৰি দিব লাগে যে দেশত সমান আইন থাকিব লাগে নে নাই । শ্বাহে কয় যে কংগ্ৰেছে মুছলিম পাৰ্চনেল ল’ ৰ লগতে হিন্দু সংহিতা বিধেয়কখন কাৰ্যকৰী কৰিছিল যদিও ইয়াক সাধাৰণ আইন বুলি নামাকৰণ কৰি কংগ্ৰেছে তুষ্টিকৰণ আৰম্ভ কৰিছিল । তেওঁ কয় যে বিবাহ আৰু বিবাহ বিচ্ছেদৰ বাবে পৃথক আইন অনাৰ অৰ্থ কি ?
গৃহমন্ত্ৰীগৰাকীয়ে কয় যে উচ্চতম ন্যায়ালয়ে কেইবাবাৰো ইউ চি চি অনাৰ কথা কৈছে যদিও কংগ্ৰেছে ইয়াক এৰাই চলিছিল । দিগ্বিজয় সিঙৰ বক্তব্যৰ কথা উল্লেখ কৰি তেওঁ কয় যে কংগ্ৰেছে নিজেই এই সন্দৰ্ভত কাম বন্ধ কৰি আহিছে । সমাজৰ বৃহৎ পৰিৱৰ্তনৰ বাবে আইনৰ ন্যায়িক ব্যাখ্যা আৰু পৰামৰ্শ বিবেচনা কৰা হ’ব বুলিও শ্বাহে কয় । উত্তৰাখণ্ডত ইউ চি চি ৰূপায়ণৰ বাবে বিজেপিৰ প্ৰচেষ্টা সন্দৰ্ভত আলোচনা কৰি তেওঁ কয় যে বিজেপিয়ে প্ৰতিখন ৰাজ্যতে ইয়াক কাৰ্যকৰী কৰিব ।
আম্বেদকাৰৰ ধাৰণা গ্ৰহণ কৰাটো প্ৰয়োজনীয়-শ্বাহ
আলোচনাত ড০ আম্বেদকাৰৰ কথা উল্লেখ কৰি শ্বাহে কয় যে তেওঁৰ নাম লোৱাতকৈ তেওঁৰ ধাৰণা গ্ৰহণ কৰাটো অধিক গুৰুত্বপূৰ্ণ । লগতে আম্বেদকাৰৰ মন্ত্ৰীসভাৰ পৰা পদত্যাগ আৰু পণ্ডিত নেহৰুৰ পত্ৰৰ কথাও উল্লেখ কৰে । একে সময়তে কেশৱানন্দ ভাৰতী গোচৰৰ উদাহৰণ দি শ্বাহে কংগ্ৰেছক তীব্ৰ সমালোচনা কৰে ।
গৃহমন্ত্ৰীগৰাকীয়ে লগতে কয় যে, বিজেপি আৰু কংগ্ৰেছ দুয়ো সংবিধানত পৰিৱৰ্তন কৰিছিল যদিও বিজেপিয়ে গণতন্ত্ৰক শক্তিশালী কৰাৰ বাবে সংশোধনী কৰাৰ বিপৰীতে কংগ্ৰেছে নিজৰ ক্ষমতা ৰক্ষাৰ বাবে সংশোধনী কৰিছিল । ইয়াৰ দ্বাৰা দলৰ চৰিত্ৰ উন্মোচিত হয় । সংবিধান জোকাৰি মিছা কথা কৈ কংগ্ৰেছ দলৰ নেতাসকলে এক ঘৃণনীয় প্ৰচেষ্টা চলাইছিল । কংগ্ৰেছক কাকা কালেলকাৰৰ প্ৰতিবেদন দমন কৰাৰ অভিযোগ উত্থাপন কৰি তেওঁ কংগ্ৰেছক সংৰক্ষণ বিৰোধী বুলিও অভিযোগ উত্থাপন কৰে ।
