নিউজীলেণ্ডৰ বিৰুদ্ধে টেষ্ট ছিৰিজত লজ্জাজনক পৰাজয়ৰ সন্মুখীন হ’বলগীয়া হৈছে ভাৰতীয় দল । ৩ খনীয়া মেচৰ টেষ্ট ছিৰিজটোত নিউজীলেণ্ডে ভাৰতীয় দলক হোৱাইট ৱাশ্বেৰে পৰাস্ত কৰে । ইয়াৰ পিছত ৰোহিত শৰ্মাৰ অধিনায়কত্বক লৈ অহৰহ প্ৰশ্ন উত্থাপন হৈ আছে । ৰোহিত শৰ্মাক ভাৰতীয় টেষ্টৰ অধিনায়ক পদৰ পৰা আঁতৰাই দিয়া হ’ব পাৰে বুলি ধাৰণা কৰা হৈছে । কিন্তু এতিয়া প্ৰশ্ন হয় যে যদি ৰোহিত শৰ্মাক অধিনায়ক পদৰ পৰা আঁতৰাই দিয়া হয়, তেন্তে কোনজন খেলুৱৈয়ে দলৰ কমাণ্ড পাব ? ভাৰতীয় টেষ্ট দলৰ অধিনায়ক পদৰ প্ৰতিদ্বন্দ্বী কোন ? বৰ্তমান যশপ্ৰীত বুমৰাহ, ঋষভ পন্ট আৰু শুভমন গীলক পৰৱৰ্তী অধিনায়ক হিচাপে দায়িত্ব দিয়াৰ সম্ভাৱনাই দেখা দিছে !
ভাৰতীয় টেষ্ট দলৰ সহ অধিনায়ক যশপ্ৰীত বুমৰাহ । ইয়াৰ বাহিৰেও তেওঁ প্ৰায় ২ বছৰ পূৰ্বে ইংলেণ্ডৰ বিৰুদ্ধে টেষ্টত টিম ইণ্ডিয়াৰ অধিনায়কত্ব কৰিছিল । যদিও সেই টেষ্টত ভাৰতীয় দলটোৱে পৰাজয়ৰ মুখামুখি হ’বলগীয়া হৈছিল, তথাপিও যশপ্ৰীত বুমৰাহ যে এজন ভাল অধিনায়ক তাত কোনো সন্দেহ নাই । ভাৰতীয় দলৰ হৈ তিনিওটা ফৰ্মেটতে খেলাৰ উপৰিও আই পি এলত মুম্বাই ইণ্ডিয়ানছৰ হৈ অবিৰতভাৱে খেলি আছে স্পীড ষ্টাৰগৰাকীয়ে । এনে পৰিস্থিতিত যশপ্ৰীত বুমৰাহক এই দাবীৰ শক্তিশালী প্ৰতিদ্বন্দ্বি বুলি গণ্য কৰা হৈছে ।
একে সময়তে শুভমন গীলক ভাৰতীয় এদিনীয়া আৰু টি-২০ দলৰ পৰৱৰ্তী অধিনায়ক হিচাপে বিবেচিত কৰা হৈছে যদিও টেষ্ট ফৰ্মেটত শুভমন গীলৰ প্ৰদৰ্শন সন্তোষজনক নহয় । গতিকে ভাৰতীয় দল পৰিচালনাই শুভমন গীলৰ ওপৰতো আস্থা প্ৰদৰ্শন কৰিব পাৰে বুলি ধাৰমা কৰা হৈছে ।
ইয়াৰ বাহিৰেও ঋষভ পন্টকো এই দায়িত্বৰ বাবে ডাঙৰ প্ৰতিদ্বন্দ্বী হিচাপে দেখা গৈছে । নিউজীলেণ্ডৰ বিৰুদ্ধে টেষ্ট শৃংখলাত ঋষভ পন্টৰ প্ৰদৰ্শন আছিল উৎকৃষ্ট । লগতে ঋষভ পন্টে অবিৰতভাৱে টিম ইণ্ডিয়াৰ হৈ খেলি আছে । আই পি এলত দিল্লী কেপিটেলছৰ অধিনায়ক হিচাপে ঋষভ পণ্টে অধিষ্ঠিত হৈছে যদিও ভাৰতীয় দল পৰিচালনাই যশপ্ৰীত বুমৰাহ আৰু শুভমন গীলতকৈ ঋষভ পন্টক অগ্ৰাধিকাৰ দিব পাৰে নেকি বুলিও চৰ্চা চলিছে ? ভাৰতীয় দল পৰিচালনাই ৰোহিত শৰ্মাৰ ঠাইত ভাৰতীয় টেষ্ট দলৰ অধিনায়ক হিচাপে কোনজন খেলুৱৈক বাছি লয় সেয়া চাবলৈ এতিয়া সকলো উৎসুক হৈ আছে ।
