দীৰ্ঘদিন ধৰি ভাৰতীয় ক্ৰিকেট দলৰ পৰা বাহিৰ হৈ থকা উইকেটকিপাৰ বেটছমেন ঋদ্ধিমান সাহাই ক্ৰিকেটৰ প্ৰতিটো ফৰ্মেটক বিদায় জনোৱাৰ সিদ্ধান্ত লৈছে। সামাজিক মাধ্যমত এটা পোষ্ট শ্বেয়াৰ কৰি সাহাই ঘোষণা কৰে যে শেহতীয়া ৰঞ্জী ট্ৰফী ছিজনেই তেওঁৰ অন্তিম ছিজন হ’ব। ২০২১ চনৰ ডিচেম্বৰত তেওঁ মুম্বাইত অন্তিমখন টেষ্ট মেচ খেলিছিল।যোৱা মাহত ৪০ বছৰীয়া সাহাই ভাৰতৰ হৈ ৪০ খন টেষ্ট আৰু নখন এদিনীয়া খেলিছে। এম.এছ. ধোনীৰ অৱসৰৰ পিছত, সাহা দীৰ্ঘদিন ধৰি ভাৰতৰ প্ৰথম পচন্দৰ উইকেটকিপাৰ বেটছমেন আছিল। টেষ্ট ক্ৰিকেটত সৰ্বাধিক শতক অৰ্জন কৰা ভাৰতীয় উইকেটকিপাৰ সকলৰ তালিকাত সাহা দ্বিতীয় স্থানত আছে। ধোনী আৰু পন্ত যুটীয়াভাৱে প্ৰথম স্থানত আছে। বিশ্ব ক্ৰিকেটৰ অন্যতম শ্ৰেষ্ঠ উইকেটকিপাৰ হিচাপে বিবেচিত সাহাই তেওঁৰ কেৰিয়াৰত ১৩৫৩ টা টেষ্ট ৰাণ সংগ্ৰহ কৰে আৰু তিনিটা শতক অৰ্জন কৰে।সাহাই তিনি বছৰ আগতে ২০২১ চনৰ ডিচেম্বৰত নিউজিলেণ্ডৰ বিৰুদ্ধে তেওঁৰ অন্তিম খন টেষ্ট খেলিছিল। তেওঁ প্ৰথম ইনিংছত ২৭ আৰু দ্বিতীয় ইনিংছত ১৩ ৰাণ সংগ্ৰহ কৰিছিল। তেতিয়াৰ মুখ্য প্ৰশিক্ষক ৰাহুল দ্ৰাবিড় আৰু অধিনায়ক ৰোহিত শৰ্মাই তেওঁক বাহিৰৰ পথ দেখুৱাইছিল আৰু ঋষভ পন্তৰ স্থানত কে এছ ভাৰতক বাছনি কৰিছিল।সাহাই সামাজিক মাধ্যমত  অৱসৰৰ কথা ঘোষণা কৰি লিখিছিল, “ক্ৰিকেটৰ এটা স্মৰণীয় যাত্ৰাৰ পিছত এই ছিজনটো মোৰ অন্তিম টো হ’ব। শেষবাৰৰ বাবে ৰঞ্জী ট্ৰফীত বেংগলৰ হৈ খেলাটো মোৰ বাবে এক সন্মানৰ বিষয়। এই অবিশ্বাস্য যাত্ৰাৰ অংশ হোৱা সকলোকে ধন্যবাদ, আপোনালোকৰ সমৰ্থন মোৰ বাবে বহুত অৰ্থপূৰ্ণ। এই সময়খিনি স্মৰণীয় কৰি তুলিম…”