পুনে টেষ্টত নিউজীলেণ্ডৰ হাতত ১১৩ ৰানত পৰাস্ত হৈছে ভাৰত । লগে লগে একেৰাহে দুখন টেষ্ট মেচত পৰাজয়ৰ সন্মুখীন হৈছে ভাৰতীয় দলটো । নিউজীলেণ্ডে ৩৫৯ ৰানৰ লক্ষ্য বান্ধি দিছিল যদিও ভাৰতীয় দলটোৱে মাত্ৰ ২৪৫ ৰানহে সংগ্ৰহ কৰিবলৈ সক্ষম হয় । এই জয়েৰে তিনিখনীয়া টেষ্ট শৃংখলাত নিউজীলেণ্ডে ২-০ ব্যৱধানত অগ্ৰগতি লাভ কৰি শৃংখলা দখল কৰিছে । ইফালে দ্বিতীয়খন টেষ্টত পৰাজয়ৰ পিছত ভাৰত বিশ্ব টেষ্ট চেম্পিয়নশ্বিপ (WTC Final 2025)ৰ ফাইনেলত প্ৰৱেশৰ সমীকৰণো ৰোমাঞ্চকৰ কৰি তুলিছে ।
দ্বিতীয় টেষ্টত পৰাজয়ৰ পিছত ভাৰতীয় দলৰ বাবে, আগন্তুক খেলবোৰ অতি গুৰুত্বপূৰ্ণ হৈ পৰিছে । এই খেলখনৰ পূৰ্বে ভাৰতীয় দলটো পইন্ট টেবুলত ৬৮.০৬ শতাংশৰে শীৰ্ষত আছিল । এতিয়া দ্বিতীয় টেষ্টত পৰাজয়ৰ পিছত, ভাৰতীয় দলৰ বিজয়ৰ শতাংশ ৬২.৮২ লৈ হ্ৰাস পাইছে । তথাপিও ভাৰতীয় দলটো এতিয়াও বিশ্ব টেষ্ট চেম্পিয়নশ্বিপৰ পইন্ট তালিকাত শীৰ্ষত আছে । একে সময়তে, অষ্ট্ৰেলিয়া ৬২.৫০ ৰ সৈতে দ্বিতীয় স্থানত আছে, আনহাতে শ্ৰীলংকাৰ দল তৃতীয় স্থানত আছে ।
ভাৰতীয় দলটো কেনেকৈ বিশ্ব টেষ্ট চেম্পিয়নশ্বিপৰ ফাইনেলত প্ৰৱেশ কৰিব পাৰিব ?
পুনে টেষ্টত পৰাজয়ৰ পিছত, ভাৰতৰ বাবে বিশ্ব টেষ্ট চেম্পিয়নশ্বিপৰ ফাইনেলত উপনীত হোৱাটো সহজ নহয় ৷ এতিয়া ভাৰতৰ ডব্লিউ টি চিত খেলিবলৈ ৬ খন মেচ আছে, য’ত নিউজীলেণ্ডৰ সৈতে এখন টেষ্ট মেচ খেলিব লাগিব আৰু বাকী ৫ খন টেষ্ট মেচ অষ্ট্ৰেলিয়াৰ সৈতে খেলিব লাগিব ৷ এতিয়া ভাৰতে ৬ খন টেষ্ট মেচৰ যিকোনো অৱস্থাত ৪ খন টেষ্ট মেচ জিকিব লাগিব, তেতিয়াহে ভাৰতীয় দলৰ ফাইনেলত উপনীত হোৱাৰ পথ সহজ হ’ব । এতিয়া যদি ভাৰতীয় দলটোৱে ৬ খন খেলৰ ভিতৰত ৩ খনত জয় লাভ কৰে, তেন্তে এনে পৰিস্থিতিত ভাৰতীয় দলটোৱে আন দলৰ বিজয় বা পৰাজয়ৰ ওপৰত নিৰ্ভৰ কৰিব লাগিব ।
এনে পৰিস্থিতিত, টীম ইণ্ডিয়াই এতিয়া পৰৱৰ্তী ৬ খন টেষ্ট মেচত ৪ খন টেষ্ট জিকিবলৈ চেষ্টা কৰিব, যাতে আন দলবোৰৰ ফলাফল ফলাফলৰ ওপৰত নিৰ্ভৰ কৰিব নালাগে । উল্লেখ্য যে, ডব্লিউ টি চি ২০২৫ৰ পইণ্ট তালিকাত, ৰেংকিং মুখ্যতঃ জয়ৰ শতাংশৰ ওপৰত আধাৰিত কৰি নিৰ্ধাৰণ কৰা হয় ।
চাৰি নম্বৰত নিউজীলেণ্ড-
বিশ্ব টেষ্ট চেম্পিয়নশ্বিপৰ পইণ্ট তালিকাত নিউজীলেণ্ড এতিয়া চাৰি নম্বৰত আছে । দক্ষিণ আফ্ৰিকা পাঁচ নম্বৰত আছে । কিৱি দলে এয়া এক ঐতিহাসিক টেষ্ট শৃংখলা জয় কৰিছে ।
ঘৰুৱা মাটিত পৰাজয় ভাৰতৰ-
২০১২ চনৰ পিছত প্ৰথমবাৰৰ বাবে, ভাৰতীয় দলটোৱে ঘৰুৱা টেষ্ট শৃংখলাত পৰাজয়ৰ সন্মুখীন হৈছে । ভাৰতীয় দলটোৱে নিউজীলেণ্ডৰ বিৰুদ্ধে দুয়োখন টেষ্ট মেচ হেৰুৱাইছে । প্ৰথম টেষ্টত নিউজীলেণ্ডে ভাৰতক ৮ উইকেটত পৰাস্ত কৰে । ভাৰতত এয়া নিউজীলেণ্ডৰ প্ৰথম টেষ্ট শৃংখলা জয় ।
