দক্ষিণ কোৰিয়াত অব্যাহত আছে অস্থিৰতা । দেশখনৰ পৰিস্থিতি আৰু অধিক অস্থিৰ হৈ পৰে যেতিয়া ৩ ডিচেম্বৰৰ নিশা ৰাষ্ট্ৰপতি ইউন চুক-ইয়লে জৰুৰীকালীন অৰ্থাৎ সামৰিক আইন জাপি দিয়াৰ কথা ঘোষণা কৰে । ইয়াৰ পিছতে এই সিদ্ধান্তৰ বিৰুদ্ধে দেশজুৰি আৰম্ভ হয় প্ৰতিবাদ । প্ৰতিবাদৰ বাবে ৰাষ্ট্ৰপতিয়ে অৱশেষত মাত্ৰ কেইঘণ্টামানৰ ভিতৰতে সামৰিক আইন জাৰি কৰাৰ সিদ্ধান্ত বাতিল কৰিবলগীয়া হয় । কিন্তু ইয়াৰ পিছত পৰিস্থিতি অৱনমিত হয় আৰু প্ৰতিৰক্ষা মন্ত্ৰী কিম ইয়ং-হিউনে সামৰিক আইন জাপি দিয়াৰ দায়িত্ব গ্ৰহণ কৰি নিজৰ পদৰ পৰা পদত্যাগ কৰে । ৰাষ্ট্ৰপতিগৰাকীয়ে তেওঁৰ পদত্যাগ স্বীকাৰ কৰি এতিয়া এই দায়িত্ব চৌদি আৰৱৰ ৰাষ্ট্ৰদূত চয় বিয়ং হ্যুকৰ হাতত অৰ্পণ কৰিছে ।
এই সকলেও পদত্যাগ কৰে-
বিভ্ৰান্তি বিয়পাই অশান্তিৰ সৃষ্টি কৰাৰ বাবে কিম ইয়ং-হিউনে দেশবাসীৰ ওচৰত ক্ষমা বিচাৰে । চীফ অফ ষ্টাফ চুং জিন-ছুক আৰু ৰাষ্ট্ৰীয় নিৰাপত্তা উপদেষ্টা শ্বিন ৱন-চিকেও নিজৰ পদৰ পৰা পদত্যাগ কৰিছে । অৱশ্যে তেওঁলোকৰ পদত্যাগ পত্ৰ গ্ৰহণ কৰা হ’ব নে নহয় সেয়া স্পষ্ট হোৱা নাই ।
অভিযোগ কি-
সংবাদ মাধ্যমৰ বাতৰি অনুসৰি ৰাষ্ট্ৰপতি ইউনক মহাঅভিযোগ দাখিল কৰিবলৈ এজন জ্যেষ্ঠ সামৰিক বিষয়া আৰু বিৰোধী সদস্যই দাখিল কৰা নথিত কোৱা হৈছে যে কিমে ইউনক সামৰিক আইন জাপি দিবলৈ পৰামৰ্শ দিছিল । ৰাষ্ট্ৰপতিৰ চীফ অফ ষ্টাফ চুং জিন-ছুকে নৱনিযুক্ত প্ৰতিৰক্ষা মন্ত্ৰী চয়ক নীতিগত ব্যক্তি বুলি অভিহিত কৰে । তেওঁ নিজৰ কৰ্তব্য নিষ্ঠাৰে পালন কৰে আৰু নিয়ম মানি চলে বুলিও কয় ।
সামৰিক আইন জাপি দিয়াৰ বাবে ৰাষ্ট্ৰপতিৰ বিৰুদ্ধে মহাঅভিযোগ দাখিলৰ দাবী-
দক্ষিণ কোৰিয়াৰ বিৰোধী নেতৃত্বাধীন মিত্ৰজোঁটে বুধবাৰে ৰাষ্ট্ৰীয় সংসদত ৰাষ্ট্ৰপতিগৰাকীয়ে সামৰিক আইন জাপি দিয়াৰ ব্যৰ্থ প্ৰচেষ্টাক লৈ মহাঅভিযোগ দাখিল কৰাৰ প্ৰস্তাৱ উত্থাপন কৰে যদিও তেওঁৰ দলে এই পদক্ষেপৰ বিৰোধিতা কৰিছে । শাসকীয় পিপলছ পাৱাৰ পাৰ্টিৰ জ্যেষ্ঠ নেতা চু কিউং-হোৱে কয় যে পিপলছ পাৱাৰ পাৰ্টিৰ ১০৮ জন সাংসদে ৰাষ্ট্ৰপতিৰ মহাঅভিযোগ নাকচ কৰাত একত্ৰিত হৈ থাকিব ।
ৰাষ্ট্ৰদ্ৰোহ বুলি অভিহিত কৰে-
মূল বিৰোধী দল ডেম’ক্ৰেটিক পাৰ্টিয়ে সামৰিক আইন জাপি দিয়াৰ এই পদক্ষেপক ৰাষ্ট্ৰদ্ৰোহ বুলি অভিহিত কৰে আৰু শনিবাৰৰ ভিতৰত ৰাষ্ট্ৰপতিৰ বিৰুদ্ধে মহাঅভিযোগ দাখিল কৰিবলৈ ভোটদানৰ বাবে দলটোৱে বিধেয়ক এখনৰ নেতৃত্ব দিব বুলি স্পষ্ট কৰে । ডেম’ক্ৰেটিক পাৰ্টিৰ সাংসদ কিম চেউং-ৱনে ৰাষ্ট্ৰীয় সংসদত কয় যে ইউন ছুক-ইয়লৰ শাসনে জৰুৰীকালীন সামৰিক আইন ঘোষণাই আমাৰ জনসাধাৰণৰ মাজত যথেষ্ট বিভ্ৰান্তি আৰু ভয়ৰ সৃষ্টি কৰিছে ।
