তিনিদিনীয়া ভ্ৰমণসূচীৰে সপত্নীক ভূটানত উপস্থিত অসমৰ মুখ্যমন্ত্ৰী হিমন্ত বিশ্ব শৰ্মা

সোমবাৰে তিনিদিনীয়া আনুষ্ঠানিক ভ্ৰমণসূচীৰে ভূটানৰ ৰাজধানী থিম্ফুত পত্নী ৰিণিকি ভূঞা শৰ্মাৰ সৈতে উপস্থিত হয় অসমৰ মুখ্যমন্ত্ৰী হিমন্ত বিশ্ব শৰ্মা । উপস্থিত হোৱাৰ লগে লগে বিমানবন্দৰত ভূটানৰ বৈদেশিক মন্ত্ৰী লিয়নপো ডি এন ধুংগিয়েলে দুয়োকে ৰাজকীয় আদৰণি জনায় ।

এক্সত পোষ্ট কৰে মুখ্যমন্ত্ৰীগৰাকীয়ে-

দেশখনত উপস্থিত হোৱাৰ পিছত ড০ শৰ্মাই এক্সত পোষ্ট কৰে, “এইমাত্ৰ ভূটানৰ থিম্ফুত উপস্থিত হৈছো । বিমানবন্দৰত মোক আৰু ৰিণিকিক আদৰণি জনোৱাৰ বাবে মই ভূটানৰ বৈদেশিক মন্ত্ৰী মহামহিম লিয়ংপো ডি এন ধুংগিয়ালৰ ওচৰত কৃতজ্ঞ । মই মোৰ তিনিদিনীয়া ভ্ৰমণকালত এই সুন্দৰ দেশখনৰ সৈতে ভাৰতৰ সম্পৰ্ক বৃদ্ধি কৰাৰ বাবে আশাবাদী ।”

ভূটানৰ বৈদেশিক মন্ত্ৰালয়ৰ এক বিবৃতি অনুসৰি ভূটানৰ ৰাজকীয় চৰকাৰৰ আমন্ত্ৰণত হিমন্ত বিশ্ব শৰ্মাই ভূটান ভ্ৰমণ কৰিছে । তেওঁৰ এই ভ্ৰমণসূচীৰ সময়ছোৱাত ভূটানৰ ৰজা-ৰাণীক সাক্ষাৎ কৰাৰ সম্ভাৱনা আছে । তদুপৰি তেওঁ ভূটানৰ প্ৰধানমন্ত্ৰী শ্বেৰিং টবগেক সাক্ষাৎ কৰাৰ লগতে ১৭ ডিচেম্বৰত ভূটানৰ ৰাষ্ট্ৰীয় দিৱস উদযাপনত অংশগ্ৰহণ কৰিব ।

বিবৃতিটোত কোৱা হৈছে যে, “তেওঁ মহামান্য ৰজা আৰু মহামান্য ৰাণী গিয়াল্টছুয়েনক সাক্ষাৎ কৰি প্ৰধানমন্ত্ৰীক সাক্ষাৎ কৰিব । এই ভ্ৰমণৰ সময়ত মুখ্যমন্ত্ৰীগৰাকীয়ে ৰাষ্ট্ৰীয় দিৱস উদযাপনত অংশগ্ৰহণ কৰিব ।” উল্লেখ্য যে, অসমৰ মুখ্যমন্ত্ৰীৰ ভূটানলৈ এয়া প্ৰথম আনুষ্ঠানিক ভ্ৰমণ । ভূটান আৰু অসমৰ মাজত বন্ধুত্ব আৰু চুবুৰীয়া সম্পৰ্কৰ এক মধুৰ, ঐতিহাসিক বন্ধন আছে । এই ভ্ৰমণে এই সম্পৰ্ক আৰু অধিক শক্তিশালী কৰাৰ লগতে ভূটান আৰু ভাৰতৰ ৰাজ্য অসমৰ মাজত ঘনিষ্ঠ সম্পৰ্ক গঢ়ি তুলিব বুলি আশা কৰা হৈছে ।