বিশিষ্ট অভিনেত্ৰী জ্ঞানদা কাকতিৰ দেহাৱসান । বুধবাৰে শ্বিলঙৰ বেথানী হাস্পতালত শেষ নিশ্বাস ত্যাগ কৰে বৰ্ষীয়ান অভিনেত্ৰীগৰাকীয়ে । মৃত্যুৰ সময়ত তেখেতৰ বয়স আছিল ৯৩ বছৰ । দীৰ্ঘদিন ধৰি শাৰীৰিকভাৱে অসুষ্ঠ হৈ আছিল অভিনেত্ৰীগৰাকী ।
পাৰঘাট ছবিৰ জৰিয়তে বোলছবি জগতত প্ৰৱেশ কৰা জ্ঞানদা কাকতিৰ জন্ম হৈছিল ১৯৩২ চনত, শ্বিলঙত । সৰুৰে পৰা এক সাংস্কৃতিক পৰিৱেশত ডাঙৰ-দীঘল হোৱা জ্ঞানদা কাকতিয়ে শৈশৱতে লাভ কৰিছিল বিষ্ণু প্ৰসাদ ৰাভাৰ সান্নিধ্য । পাৰঘাটৰ পিছত নায়িকা হিচাবে জ্ঞানদা কাকতিয়ে অভিনয় ৰঙা পুলিচ, পুবেৰুণ, সৰাপাত, পিয়লি ফুকন, নৰকাসুৰ, আমাৰ ঘৰ, চাকনৈয়া আদি ছবিত অভিনয় কৰিছিল ।
পূবেৰুণ ছবিখনৰ জৰিয়তে দৰ্শকৰ মাজত জনপ্ৰিয়তা লাভ কৰিছিল বিশিষ্ট অভিনেত্ৰীগৰাকীয়ে । ১৯৬০ চনত বাৰ্লিন চলচ্চিত্ৰ মহোৎসৱত ভাৰতীয় ছবি হিচাবে প্ৰতিযোগিতা শাখাত প্ৰদৰ্শিত হৈছিল এই ছবিখন । উল্লেখ্য যে, আন্তঃৰাষ্ট্ৰীয় চলচ্চিত্ৰ মহোৎসৱত অংশগ্ৰহণ কৰা প্ৰথমগৰাকী অভিনেত্ৰী আছিল জ্ঞানদা কাকতি ।
২০০২ চনত এইগৰাকী অভিনেত্ৰীক অসম চৰকাৰে বিষ্ণু প্ৰসাদ ৰাভা বঁটা প্ৰদান কৰিছিল । ১৯৮৭ চনত প্ৰথম ৰাগিনী ছবিৰ বাবে শ্ৰেষ্ঠ আঞ্চলিক ছবিৰ ৰাষ্ট্ৰীয় বঁটা লাভ কৰিছিল তেওঁ । উল্লেখ্য যে জ্ঞানদা কাকতি আকাশবাণী গুৱাহাটী আৰু শ্বিলং কেন্দ্ৰৰ নিয়মীয়া কণ্ঠশিল্পীও আছিল ।
