চেম্পিয়নছ ট্ৰফী সন্দৰ্ভত দীৰ্ঘদিন ধৰি চলি আছে বাদ-বিবাদ । কিন্তু এতিয়াও ওলোৱা নাই ইয়াৰ সমিধান । টিম ইণ্ডিয়াই প্ৰতিযোগিতাখনৰ বাবে পাকিস্তান ভ্ৰমণ নকৰে বুলি বি চি চি আইয়ে নিজৰ স্থিতি দৃঢ়তাৰে অব্যাহত ৰাখিছে । হাইব্ৰিড মডেলৰ অধীনত তেওঁলোকে এই প্ৰতিযোগিতাত অংশগ্ৰহণ কৰিব । এতিয়া চেম্পিয়নছ ট্ৰফীৰ চূড়ান্ত সিদ্ধান্ত আজি অৰ্থাৎ ৫ ডিচেম্বৰ বৃহস্পতিবাৰে লোৱাৰ সম্ভাৱনা আছে ।
খবৰ অনুসৰি আজি আই চি চিৰ নতুন অধ্যক্ষ জয় শ্বাহে এখন বৈঠক অনুষ্ঠিত কৰিব । এই বৈঠকত সকলো ক্ৰিকেট ব’ৰ্ডে অংশগ্ৰহণ কৰাৰ সম্ভাৱনা আছে । জয় শ্বাহ (আই চি চিৰ অধ্যক্ষ)ৰ অধীনত এইখন হ’ব আই চি চিৰ প্ৰথমখন বৈঠক । অৱশ্যে আজিৰ বৈঠকত চেম্পিয়নছ ট্ৰফী সন্দৰ্ভত সিদ্ধান্ত লোৱা হ’ব নে নহয় সেই সন্দৰ্ভত এতিয়াও স্পষ্ট হোৱা নাই, কিন্তু সেয়া আশা কৰা হৈছে ।
অৱশ্যে আজিৰ বৈঠকতে চেম্পিয়নছ ট্ৰফীৰ সূচী প্ৰস্তুত কৰা হ’ব পাৰে বুলিও একাংশ সংবাদ মাধ্যমত দাবী কৰা হৈছে । বৰ্তমান এই সকলোবোৰ সন্দৰ্ভত কোনো আনুষ্ঠানিক তথ্য প্ৰকাশ পোৱা নাই । এতিয়া আজিৰ বৈঠকত প্ৰতিযোগিতাখন সন্দৰ্ভত কি কি সিদ্ধান্ত লোৱা হয় সেয়া গুৰুত্বপূৰ্ণ হ’ব ।
পাকিস্তানৰ হাইব্ৰিড মডেল-
এই পৰ্যন্ত লাভ কৰা তথ্য অনুসৰি হাইব্ৰিড মডেল গ্ৰহণ কৰিবলৈ সাজু হৈছে পাকিস্তান । কিন্তু পাকিস্তানৰ হাইব্ৰিড মডেলত কিছু চৰ্ত ৰখা হৈছে । পাকিস্তানৰ পৰা কোৱা হৈছিল যে এই মডেলৰ অধীনত ফেব্ৰুৱাৰী মাহত অনুষ্ঠিত হ’বলগীয়া আই চি চিৰ ইভেণ্টত ভাৰত-পাকিস্তানৰ মেচসমূহ নিৰপেক্ষ স্থানত অনুষ্ঠিত হ’ব । পাকিস্তান দলেও আই চি চি প্ৰতিযোগিতাৰ বাবে ভাৰত ভ্ৰমণ নকৰে ।
পাকিস্তান ক্ৰিকেট ব’ৰ্ডৰ অধ্যক্ষ মহছিন নাকৱীয়ে কৈছিল, “একপক্ষীয় সিদ্ধান্ত মানি লোৱা নহ’ব । আমি ভাৰতলৈ গৈ থাকিম হ’ব নোৱাৰে, কিন্তু তেওঁলোক পাকিস্তানলৈ নাহে । যিয়েই নহওক, সেয়া সমতাৰ ভিত্তিত হ’ব লাগে ।”
